¹ Na kel dia, es le livru di Muzes dianti di povu. Atxadu skrebedu ki ninhun di amunitas o muabitas dibia djuntaba ku povu di Deus, pa senpri. ² Kel-li kuntise pamodi es ka ben ti povu di Israel ku pon y ku águ, ma es kontrata Balaon pa amaldisoa Israel. Ma, nos Deus transforma maldison na benson. ³ Asi ki es obi Lei, es sipara di Israel kada pesoa ki era stranjeru. ⁴ Anti di kel-li, saserdoti Iliazibi era inkaregadu di dipózitu di kaza di nos Deus. El era parenti di Tubias. ⁵ Iliazibi pripara pa Tubias un sala grandi undi es ta guardaba oferta di serial, insensu, utensíliu, dízimus di serial, vinhu nobu y óliu, ki diziginadu pa livitas, kantoris, porterus y kuntribuison pa saserdotis. ⁶ Ma, duranti tudu kel tenpu, N ka staba na Jiruzalen. Na trijézimu sugundu anu di reinadu di Artaxersi, rei di Babilonia, N bai pa rei. Dipos di algun tenpu, N pidi pirmison pa rei pa N prti, ⁷ Y nton N ritorna pa Jiruzalen. N intendi mal ki Iliazibi faze, kantu é da Tubias un sala na korti di kaza di Deus. ⁸ N staba txeu furiozu y N tra tudu artigu duméstiku di kaza di Tubias pa fora di sala. ⁹ N ordena pa purifika sala y N pui na el di nobu artigu di kaza di Deus, ofertas di serial y insensu. ¹⁰ N fika ta sabi ki livitas ka staba ta resebe ses padas y ki es fujiba kada un pa se kanpu, livitas ku kantoris ki fazeba obra. ¹¹ Nton N konfronta ofisiais y N fla: Pamodi ki kaza di Deus sta diskuidadu? N djunta tudu y N pu-s na ses postu. ¹² Nton, tudu Juda traze dízimu di sirial, vinhu nobu y azeti pa dipózitu. ¹³ N dizigina pa ser tizoreru di dipozitu Selemias, saserdoti y Zadoki, skrivon; y di livitas, Pedaías. Djuntu ku es staba Anan, fidju di Zakur, fidju di Matanias, pamodi es era kunsideradu kunfiavel. Ses diver era distribui suprimentu pa ses asosiadus. ¹⁴ Lenbra, nha Deus, di es kuza li y ka bu distrui bon obra ki N faze pa kaza di Deus y ses sirbisus. ¹⁵ Na kel dia, N odja na Juda povu ta piza lagar na sábadu, ta traze karga di sirial ki era karegadu riba jumentu y tanbe vinhu, uvas, figus y tudu tipu di karga pizadu ki es traze pa Jiruzalen na dia di sábadu. N protesta pamodi es staba ta bende kumida na kel dia. ¹⁶ Omis di Tiru ki ta moraba na Jiruzalen traze pexi y tudu tipu di merkadoria y es ta bendeba na sábadu pa pesoas di Juda y na sidadi. ¹⁷ Nton, N konfronta lídiris di Juda: Ki mal é kel-li ki nhos sa ta faze, prufanandu dia di sábadu? ¹⁸ Nhos ka sabe ma nhos pai tanbe faze kel-li? Y nos Deus ka traze tudu es mal riba nos y riba es sidadi? Gosi, nhos sa ta traze ira riba di Israel, prufanandu sábadu. ¹⁹ Ora ki sukuru ben riba portons di Jiruzalen, anti di sábadu, N ta ordena ki porta fitxadu y ki ka abridu ti dipos di sábadu. N puzisiona alguns di nhas servus na portons, pa ki ninhun karga ka entra na dia di sábadu. ²⁰ Merkadoris ku vendedoris di tudu tipu di merkadoria akanpa fora di Jiruzalen un o dos bes. ²¹ Ma N aviza-s: Pamodi ki nhos sa ta akanpa na otu ladu di muru? Si nhos faze kel-la di nobu, N ta bota nhos mon. Di kel dia pa dianti, es ka torna ben na sábadu. ²² Nton, N ordena pa livitas pa purifika y ben guarda porta, pa santifika dia di sábadu. Tanbe na kel-li, nha Deus, lenbra di mi; ten mizerikordia di mi, trokadu di aliansa di lialdadi que Bu ten mostradu pa mi. ^{23 24} Na kes dia, tanbe N odja Judeus ki kazaba ku mudjeris di Asdodi, Amon y Muabi. Metadi di ses fidjus ta falaba língua di Asdodi. Ninhun di es ka ta kunsigiba falaba lingua di Juda, ma so lingua di un di otus povus. ²⁵ N konfronta-s y N amaldisua-s, N dadji na alguns di es y aranka-s kabelu. N faze-s jura pa Deus, ta fla: Ka nhos da nhos fidja pa ses fidjus, nen ka nhos toma ses fidja pa nhos fidju. ²⁶ Salumon, rei di Israel, ka peka trokadu di es tipu di mudjeris? Na meiu di monti nason ka izistiba rei sima el, y el era amadu pa se Deus, y Deus faze-l rei riba tudu Israel. Ma, ses spozas stranjeiras faze-l peka. ²⁷ Nu dibia, nton, sukuta-nhos, ta faze tudu es mal y aji di manera trasueru kontra Deus, sta kazadu ku mudjeris stranjeras? ²⁸ Un di kes fidju di Joiada, fidju di Iliazibi, xefi di saserdoti, era jenru di Sanbalati, oronita. Purisu, N faze-l fuji di nha prizensa. ²⁹ Lenbra di es, nha Deus, pamodi es kontamina saserdosiu, aliansa di saserdosiu y livitas. ³⁰ Asi, N purifika-s di tudu kuzas stranjeru y N stabelese diveris pa saserdoti y livitas, kada un pa se propri tarefa. ³¹ N pruvidendia oferta di madera na tenpu diziginadu y na kumesus.