¹ Ai di mi ! Ami é sima kenha ki ta kodje frutu di veron dipos di kodjeta, dipos rikodje uvas na vinhedu: ka ten mas katxu di fruta pa kodje, nen figu nobu, ki ami N ta dizeja txeu. ² Pesoas dretu dja dizaparese di tera y ka ten nen un pesoa justu na tudu umanidadi. Tudu ta konta mintira, ta pripara armadilha pa baza sangi; kada un sa ta kasa se propri irmon ku un redi. ³ Bus mon e dretu so pa fazi mal: guvernanti ta iziji dinheru , y juiz ta seta subornu , e kel omi puderosu sa ta fla otus kuze kes podi ganha , asi , es ta planeja djuntu. ⁴ Midjor des e sima un spinheru , kel mas justu entri es e pior k un serka di spinhu. Keli e dia k foi ditu pa bus guardas , dia di punison .Gosi ta kumesa ses konfuson ⁵ Ka bu kredita na ninhun visinhu , nen ka bh pui bh konfiansa na ninhun amigu ,ten kuidadu ku kuzas k bh ta papia , ti mesmu pa mudjer k ta deta na nhos brasu. ⁶ pamodi fidju ka ta rispeta pai , fidja ta labanta kontra mai , y nora , kontra si sogra. y inimigus di omi e kes di bu propi kaza . ⁷ Ma, Ami N ta odja pa Nhordes. N ta spera pa Deus di nha salvason; nha Deus ta obi-m. ⁸ Ka bu fika kontenti a ruspetu di mi, nha inimigu; sikre N kai, N ta labanta, ora k N xinta na trevas, Nhordes ta ser nha lus ⁹ Pamodi N peka kontra Nhordes, N ta aguenta se ira, ti ki E julga nha kazu y izekuta se juizu riba di mi. E ta leba-m pa lus, y N ta odja-L ta risgata-m na se justisa. ¹⁰ Nton, nha inimigu ta odja keli y e ta ser kubertu di burgonha, el, ki flaba : undi sta Nhordes, bu Deus? Nhas odjus ta odja pa el; ta ser pizadu sima lama na rua ¹¹ Dia pa kunstrui bu muru ta txiga; na kel dia, bus frontera ta ser spadjadu pa mas lonji. ¹² Na kel dia bu povu ta ben pa bo, di Asiria y di sidadis di Ijitu, desdi Ijitu ti grandi riu, Eufratis, di mar pa mar y di muntanha pa muntanha. ¹³ Kes tera ta ser abandonadu, trokadu kes algen ki sta vive la gosi, trokadu frutu di ses ason. ¹⁴ Gia bu povu ku bu vara, ribanhu di bu eransa. Es ta vive es so na un floresta, serkadu di tera fertil. Dexa -s kume pastu na Bazan y Giliadi, sima na tenpus antigu. ¹⁵ Sima na dia ki bu sai di tera di Ijitu, N ta mostra-s maravilhas. ¹⁶ Nason ta odja y ta fika na burgonha ku ses puder. Es ta da ku mon na ses boka y obidu ta fika surdu. ¹⁷ Es ta lenbe puera sima kobra, sima kriatura ki ta rasteja na tera. Es ta sai ta treme di ses toka; ku pavor es ta ben pa Bo, Nhordes, nos Deus, y es ta xinti medu trokadu Bo. ¹⁸ Kenha ki é Deus sima Bo, ki ta tra pekadu, ki ta purdua infrason di restu di Bu eransa? Bu ka ta mante Bu ira pa senpri, pamodi Bu ta ama mostra-nu Bu amor lial. ¹⁹ Abo, di nobu, bu ta ten konpaxon di nos malvadesa dibaxu di Bus pe. Bu ta fulha tudu nos pekadu na fundu di mar. ²⁰ Bu ta da verdadi pa Jako y amor lial pa Abraon, sima Bu jura pa nos ansestral antigamenti.