1 Kel-li é palavra di Nhordes, ki ben pa meiu di vizon pa Mikeias, morastita, na tenpu di Joton, Akas y Izekias, reis di Juda, kontra Samaria ku Jiruzalen. 2 Nhos obi, nhos tudu povu. Nhos obi, tera y tudu ki sta na bo. Ki Sinhor Nhordes sirbi di tistimunha kontr nhos, Sinhor di Se santu tenplu. 3 Nhos odja! Nhordes dja sai di Se lugar; E ta dixi y E ta piza riba di lugaris mas altu na tera. 4 Muntanhas ta direte se dianti; rubera ta ser diretidu sima vela dianti di lumi, sima águ que ta lansadu di lugar altu. 5 Tudu kel-li trokadu raboita di Jako y trokadu di pekadus di kaza di Israel. Kal ki era mutivu di raboita di Jako? Ka era Samaria? Y di kes lugar altu di Juda? Ka era Jiruzalen? 6 N ta faze de Samaria un munti di ruina na kanpu, sima un lugar pa plantadu vinhedus. N ta leba ses pedra di kunstrusson pa rubera y N ta dexa ses fundason diskubertu. 7 Tudu ses imaji skulpida ta ser kebradu padas-padas; y tudu oferta ki ta oferesidu pa el ta ser kemadu. Y di tudu ses ídulus N ta faze un ruina. Pamodi e djunta-s ku pagamentu di se prostituison y sima pagamentus di prostituta es ta bira. 8 Trokadu es razon, N ta lamenta y N ta uiva; N ta anda diskalsu y nunpriti; N ta lamenta sima xakais y N ta jeme sima kruxa. 9 Pamodi ses frida ka ten kura, pamodi txiga ti Juda, y alkansa porton di nha povu, ti Jiruzalen. 10 Ka nhos papia di kel-li na Gati; y nen ka nhos txora. Na Bete-Leafra N lanbuxa na po. 11 Nhos pasa, moradoris di Safir, ku burgonha y nunpriti. Ka nhos sai, moradoris di Zaanan. Beth-Ezel, nhos txora pamodi nhos proteson dja tradu. 12 Pamodi moradoris di Maroti sa ta spera ansiozamenti pa notisia sabi, pamodi Nhordes dja traze kalamidadi ti portons di Jiruzalen. 13 Nhos ata kabalu na karuajen, nhos ki ta mora na Lakis. Abo, Lakis, bo ki kumesa ta pui fidja di Sion peka, pamodi infrason di Israel atxadu na bo. 14 Purisu, bu ta oferese un prizenti di dispidida pa Morezeti; sidadi di Akazibi ta ngana reis di Israel. 15 N ta trze un konkistador pa nhos, moradoris di Maresa; brilhu di Israel ta ben di Adulon. 16 Nhos raspa nhos kabesa y nhos kora nhos kabelu trokadu fidjus di bus dilísia. Nhos bira kareka sima ágias, pamodi nhos fidjus ta ben lebadu pa izíliu.