¹ Palavra di Amos, un di kes pastor di Tekoa, ki resebe pa revelason di Israel. E resebe-l na tenpu di Uzias, rei di Juda, y tanbe na tenpu di Jerobuon, fidju di Joas, rei di Israel, dos anu antis di teremotu. ² E fla: "Nhordes ta grita di Sion, E ta labanta se vos di Jiruzalen. Padja di kes partor ta murutxa, y piku di Kamelu ta seka". ³ Si ki Nhordes fla: "Pa tres pekadu di Damasku, si kre pa kuatu, N ka ta anula kel kastigu, pamodi es kaba ku Gileadi ku instrumentu di feru. ⁴ Nta manda lumi pa kaza di Azael ki ta kaba ku fortaleza de Ben Adadi. ⁵ Nhordes fla: "N ta ben kebra kes gradi di Damasku, N ta ben kaba ku abitanti di rubera di Aven y tanbe ku omi ki ta pega kel baston de Bete-Eden. Y povu di Siria ta lebadu prezu pa Kir". ⁶ Si ki Nhordes fla: "Pa tres pekadu di Gaza, si kre pa kuatu, N ka ta anula kel kastigu, pamodi es leba prezu tudu povu y es da pa Edon. ⁷ N ta ben manda lumi pa muralha di Gaza ki ta kaba ku se fortaleza. ⁸ Nhordes fla: "N ta ben distrui kes omi ki ta mora na Asdodi y kes omi ki ta pega na kel baston di Askelon. N ta ben poi nha mon kontra Ekron, y kes restu di filisteu ta ben sufri". ⁹ Si ki Nhordes fla: "Pa tres pekadu di Tiro, si kre pa kuatu, N ka ta anula kel kastigu, pamodi es leba prezu tudu povu pa Edon y es kebra se lasu di amizadi. ¹⁰ N ta ben manda lumi na muralha di Tiru ki ta ben kaba ku se fortaleza." ¹¹ Si ki Nordes fla: "Pa tres pekadu di Edon, si kre pa kuatu, N ka ta anula kel kastigu, pamodi e toka se irmon dianti ku spada y e abandona tudu mizerikordia. Se ira ka kaba, y si raiba ka tenba fin. ¹² N ta ben manda lumi pa Teman ki ta kaba ku ses palasiu di Bozrah". ¹³ Si ki Nhordes fla: "Pa tres pekadu di povu di Amon, si kre kuatu, N ka ta anula kel kastigu, pamodi es abri bariga di kes mudjer prenha di Gileadi, pa es omenta ses txon. ¹⁴ Nordes fla: "N ta pui lumi na muralha di Raba ki ta kaba ku kes palasiu, ku rabulisu na tenpu di gera, ku tenpestadi na tenpu di txeu bentu. ¹⁵ Se rei ta bai pa prizon, el ku tudu ses ministru djuntu".