¹ Paulo, ihulyehwa lya Jeeso Kirisiti, ne mwakwe Timoti cha Filimoni, mweetu musunwa mane itutenda naye, ² mane ne inchizyetu Afia, ne Achipasi isolye kuninetu, ne ikereke injirira munzuvo yaako. ³ Chishemo chive naawe ne chisemo chizwa kwe Ireeza Isheetu ne kwa Simwiine Jeeso Kirisiti. ⁴ Inaako zoonse nilitumera kwee Ireeza. Ku kuzeza mwi itapero zaangu. ⁵ Nivazuwi che irato lyiwina naalyo kwa Simwiine Jeeso ne kuva rumeri voonse. ⁶ Ni rapera kuti kutendisana ne itumero yiwiina naayo iwoolye kuteenda zoonse zishiyeme zitwiina naazo cha Kirisiti. ⁷ Mukuti nivaavi ne kusanga kukaando ne kukozwa inkulo chevaka lye irato lyaako, mukuti inkulo zavarumeri ziva vusuluswa naawe, mulyikani. ⁸ Chikwiina vulyo, nangati ni kolyete mwa Kirisiti ku kucho kuti uchite zowoola kuchita, ⁹ mmi chevaka lye irato, Ni sikukumbira nangati kwiina vulyo- Iime, Paulusi, mukulukwaame, mmi hanu ni musuminwa wa Kirisiti Jeeso. ¹⁰ Ni kukumbira chevaka lyo mwaanangu Onesimasi, Ini vazaalyi ni nisumiinwa. ¹¹ Ya sana aveena ituso kwaako, lyinu hanu chiwiina ituso koonse kwaako ne kwaangu. ¹² Ni muvooza kwaako, iye inkulo yaangu tota. ¹³ Ni saka kalyi nimulyiviikira, kuti anitendere mumaziimo aako, Ha nisina mukusuminwa chevaka lye ivangelyi. ¹⁴ Kono Ime kananivasuni kuchita chimwi ninisazuwiire maikuto aako. Kananivasuni kuti musevezi waako mulotu weti nochite usiye kuuchita chokukakanizwa kono ive chokusuna kwaako. ¹⁵ Mweendi chechwechi chingi avazwiiswa kwaako che nakozana, kuti navozekezwa kwaako kwiiza kwikalyirira. ¹⁶ Kasiri muhikana, kono kuva vutuka kumuhikana, mweetu yosunitwa. Usunitwa sihulu kwaangu, ne ahulu si hulu kwaako, koonse munyama ne mwa Simwiine. ¹⁷ Mmi chikuti unihiinda siina nimulyikani waako, umuhiinde sina njeme. ¹⁸ Chikuti ava kufosekeza kapa wiina chakukorota, uruwerese Ime. ¹⁹ Iime, Paulusi, njini ng'ola iizi che iyaanza lyaangu: Ka nikuruwere. Isini kukulwiira kuti uwe unikorota chimwi. ²⁰ Ng'ii, mwaangu, unisangisa momenso a Simwiine; sumunune inkulyo yaangu kwa Kirisiti. ²¹ Nizumina kuzuwisisa kwaako, Ni kung'olyera. Niizi kuti kochite kuzaamba muniva kumbiri. ²² Chenako iswana uni vakanyeza inzuvo yokulala, nizumina kuti che mirapero yeenu kani vozekezwa kweenu. ²³ Epafurasi, musuminwa kuninaangu mwa Kirisiti Jeeso, u kurumeresa. ²⁴ Ne Mareko, Aristarchus, Demasi, ne Luke, vanitenda naavo. ²⁵ Mikoonde ya Simwiine Jeeso Kirisiti ive no luhuho lwaako. Ameni.