¹ Paulusi, muapositola- ising'i muapositola yozwa ku vaantu kapa che ziho za vaantu, kono cha Jeeso Kirisiti ne Ireeza Isheetu, ya va muvuusa ku vafu- ² ne vamweetu voonse veena naame, kwi ikereke za Magalata: ³ Chisemo chive kweenu ne kushiyama ku zwa kwe Ireeza Isheetu ne Simwiine Jeeso Kirisiti, ⁴ ya valyineeri che zivi zeetu kuti a woolye kutu hulula cheyinu iinako, kuya cho kusuna kwe Ireeza Isheetu, ⁵ kwaalyi kuve ne kuvereenga kuya ku mamanimani. Ameni ⁶ Ni komoketwa kuti chi musaanduka cho vuhweeruhweeru kuzwa kwaalyi ya va misuumpi che chisemo cha Kirisiti. Ni komoketwa kuti musandukira kwi ivangeri iingi, ⁷ Iichi kachichokuti kwiina ivangeri iingi, mmi kwiina vamwi vaantu va michitira vukaavo va vasaka kuchincha ivangeri ya Kirisiti. ⁸ Mmi nangati uuswe kapa ing'iloyi lizwa kwi iwulu chi lyimilwiira kaha ivangelyi yiingi kuuda ituvamilwiiri uuswe, mu musiye a kutiwa. ⁹ Moona mu tuvawaambi ku kataanzi, lyinu hape Ni michokuti, ¹⁰ "Chikuti wuumwi muuntu na miruta ivangelyi yiingi kuunda imuva tambulyi, mu musiye a kutiwa". Lyinu hanu nisaka kusangisa vaantu? Chikuti Ni silyika ku sangisa vaantu, Ka heena Ni muhikaana we Kirisiti. ¹¹ Mukuti Ni saka kuti mwiizive, vakwaangu, kuti ivangelyi i Ni varuta kaheena ivangelyi yo muuntu. ¹² Kana Ni ni vaizuwi cho wumwi muuntu, kapa kuirutiwa. Kono, niva itoondezwa ne Jeeso Kirisiti. ¹³ Mu vazuwi kaha vuhalo vwaangu muchi Judaisimu, mu Ni valyi kusulula ikereke ye Ireeza kuzaamba chilyikanyo ne kuti ni valyikulyika ku isinya. ¹⁴ Ni vazwiiri havusu muchi Judaisimu ku zaamba vamwaangu vaangi, vo mushovo weetu. Mu ni va woondesa cho vusakusima milawo ye chizo chi ve isheetu. ¹⁵ Kono Simwiine, ya va nisalyi ni siina muchivumbiro chi va mmmayo, mmi naani lyisalyira che chisemo chaakwe, ¹⁶ ava saangi ku toondeza Mwanaakwe chaangu, kuti ni woolye kuwaamba chaakwe ku va Hedeni. Kana Ni va wambinsani ne nyama ne malaha cho vuhweeru. ¹⁷ Kana Ni va yeendi kwa Jerusalema kwa vana vavavi maaposotola ku intaanzi aangu. Kono, Ni vayi kwa Arabiya nina voola kwa Damasika. ¹⁸ Mu masulye e zirimo zotatwe Ni naaya kwa Jerusalema ni na keeziva Kesifasi mmi Ni neekala naaye mazuva eena ikumi ne minwe imana iyaanza. ¹⁹ Mmi kakwiina moapositola i Ni vaavoni kuunda a Jaakovo, mwaanchaa Simwiine. ²⁰ Zi Ni ming'olyera, Ni mi sepisa havusu vwe Ireeza, kuti ka Ni waambi mapa. ²¹ Kuzwaaho Ni vayendi kunkaanda za Siriya ne Chilichiya. ²² Imme kana niveeni kwiziva ikereke za Judeya ziina kwa Kirisiti. ²³ Va valyi kuzuwa vulyo ni kuwambiwa, " Mukwaame ya valyi ku tusukulula hanu cho ruta kaha itumero ya valyi kulika kusinya." ²⁴ Mane va va teembi Ireeza chaangu.