¹ Vanavangu, niming'olyera izi ziintu kuti musiye kuchiti chivi. Mmi chikuti umwi u chita chivi, tuuna muzimanini kwa Taayo, Jeso Kirisiti iye yo shieme. ² Iye nje chitavero che zivi zetu. Mmi ising'i zeetu vulyo, kono neze Inkanda yonse. ³ Mmi chechi twiizi kuti tumwiizi: chikuti to chirira milawo Yaakwe. ⁴ Yo chokuti, "Niizi Ireeza" mmi nase chiriri mulao waake, u cheenga, mmi vusakusima kavukwiina kwaalyi. ⁵ Mmi umwi no umwi wichirira liinzwi lyakwe, vusakusima, moozo muntu kuti kusuna kwe Ireeza kuva shiyamiswa. Ichi twiizi kuti twiina mwaalyi. ⁶ Iye yochokuti wiina mwe Ireeza naye vulyo uswanezi kuyenda sina Jeso Kirisiti mwa vayenderi.. ⁷ Vasunwa, kani ming'olyeri molao mihya, mmi usiri ngowona wuna molao wa kalye umuvazuwi kumatangiro. Mulao wakalye nje liinzwi limuvazuwi. ⁸ Hape niming'olyera mulao muhya, wina vusakusima mwa Kirisiti ni mweenu, mukuti keerima chi kamana, mmi iseri lyovusakusima chiri veera. ⁹ Iye yolichokuti wina mwiseri mmi natoyete mwaake, usiina mukeerima ne sunuhanu. ¹⁰ Iye yosuni mwaakwe usisheere mwiseri mmi kakwina inako yokudadalyi kwaalyi. ¹¹ Mmi yotoyete mwaakwe wiina mukeerima mmane uyenda mukeerima; keezi nekwakaya mukuti keerima chikavahofuhaza meenso aakwe. ¹² Ni ming'olyera, vanavangu banini, mukuti zivi zeenu chimuvaziwoonderwa chevaka lye iizina lyaakwe. ¹³ Ni ming'olyera, veshaavovaana, mukuti mumwiizi iye yavenako kuzwa kumatangiro. Ni ming'olyra, valombwaana, mukuti chimuvazundi vuvi. Ni ming'olyera, vahwirezana mukuti mwiizi Taayo. ¹⁴ Ni vaming'olyeri, vaashaavaana, mukuti mwiizi iye winaho kuzwa kumatangiro. Nivaming'olyeri, valombwana, mukuti mukolyete, mukuti manzwi e Ireeza ashaala kweenu, mmi chimuvazundi vuvi. ¹⁵ Musiye kusuna inkaanda nangati zintu ziina mukanda, chikuti muntu usuni inkaanda, irato lya Taayo kalikwina kwaalyi. ¹⁶ Mukuti zintu zonse ziina munkaanda - kuzweinkulo kuze inyama, ne kuzweikuloku zivonwa chamenso, ne kulyinyemwina zo vuhalo- kazizwi kwa Taayo kono zizwa munkanda. ¹⁷ Inkanda ne zisunaantu zayo zimana. Mmi umwi no umwi yochita kusuna kwe Ireeza kaveho kuya kumamanimani. ¹⁸ Vahwiirezana inako ya mamanimani. Moona mumuvazuwi kuti antikiristi chokeza, hanu va antikirisiti vaangi chivaveza. Ichi chulwiira kuti che nako ya mamanimani. ¹⁹ Va vaazwi kweetu mmi kaheena va valyikuzwa kweetu. Aho kalyi vavalyi kuzwa kwetu ni vavashalyi naashwe. Kono chingavayenda, vavalyitondeza kuti kavazwi kweetu. ²⁰ Kono muva singwa naye yo Salyitwa, mmi muvonse mwiizi vusakusima. ²¹ Kana nivaming'olyeri mukuti kamwiizi vusakusima, kono mukuti muvwiizi, mmi mukuti kakwiina kucheenga kuzwa muvusakusima ²² Njeeni yo cheenga, njeye yo sampula kuti Jeso je Kirisiti? Uuzo muntu nje antikirisiti mukuti ulyisampula Taayo ne Mwaana. ²³ Kakwiina yolyisampula Mwaana wiina ne Taayo. Umwi ne umwi yo tambula Mwaana chokuswana utambula ne Taayo. ²⁴ Hairi uwe uhinde chimwi ne chimwi cho vazuwi kuntaazi uchirivikire. Chikuti chovazuwi kuntaanzi nochilyivikira. Moona vulyo kamuve mu Mwaana ne mwa Taayo. ²⁵ Mmi iyi nje sepiso yavatuhi: vuhalo vusamani. ²⁶ Ni vaming'olyeri izi ziintu chavanavaantu veti ni vamizwiisa munzira. ²⁷ Hairi unwe, kusingwa kumuvatambulyi kwaalyi kushaala kweenu, mmi kamusaki umwi kurutwa ne umwi muuntu. Mmi kusingwa kweenu chikumiruta chimwi ne chimwi mane vuniti kapa kuchenga, kono moona mumuvarutwa, muve mwaalyi. ²⁸ Lyinu hanu, vanavaangu, muvenaye, kokuti hakuti cho voneka, katuve ne isepo inkaando ising'i kufweinsoni hakuti chokeeza. ²⁹ Chikuti wiizi kuti iye ushiyeme, mwiizi kuti umwi ne umwi yo chita chishiyeme ava zaalwa naaye.