^{1 2} A ka ni hulwiirwa? A ka hena ni muapositola? A ka hena ni va voni Jeeso Kirisiti siwiine weetu? A hena mu vavereki kunina vangu mwe Ireeza? haiva nini saalyi ni muapositola ku vamwi,vutuka niina vulyo kweenu.Mukuti mu chi shupo che vuapositola vwangu mwe Ireeza. ^{3 4 5 6} Ichi nje kulyi taka kwangu kwaavo va ni tatuva: A ka twiina iswaneero yo kulya ne kunywa? A ka twiina iswaneero ye ku lyi hindira mukulwakazi yo zumiine,siina vaapositola vonse mu va chita,and va kweetu vechiswiso mwe Ireeza ne Sifasi? nandi njeme vulyo ne Banabasi va lukeere ku vereka? ^{7 8} Njeni yo chitira niiri Isolye ka ha kushinyeherwa kwaakwe? Njeni yo vwaala luwa lo mufeine che ku vula kulya chihantu cha teni? nandi njeni yo lyera mberere cho ku vula kunywa muziriri kwiilyi? A ni wamba izi zintu kuya che itata ze muntu? A mulawo naawo ka u wambi ichi? ^{9 10 11} Mukuti ku ngolyetwa mu mulawo wa Mushe,'' Sanzi u tuulyi indava he ngombe chi e lyaata imbuto.'' A toota ingombe Ireeza ya tokomera awulu? A ka wambi ka heetu? Ku va ngolyerwa uswe,mukuti iye yo lyima u lukeere ku lyimina mwi isuluhero, mane iye yo siinza u lukeere ku siinza mwi isuluhero ye kulyiha ne vamwi.Haiva tuva vwaalyi zintu ze luhuho mukati keenu,a kungi kweetu ku siinza zintu ze chinyama kweenu? ^{12 13 14} Haiva vamwi vava chitahaza uwu musevezi kuzwa mweenu, a ka twiina kuzambirize? nihakuvavolyo, ka hena tuva sake iyi iswanero.Kunzelyovulyo,tu va zimanini chimwi ne chimwi kunze lyo kuva chikaneeri ku manzwi a Kirisiti. A ka mwiizi kuti avo va tendera mwi ikereke va hinda zilyo zaavo mwi ikereke? A ka mwiizi kuti avo va tenda ha rapererwa va kopanera icho chi zwiswa ha rapererwa? Chi nzira e swana,siwiine a va laolyi kuti avo va twaala manzwi va lukeere ku hinda vuhalo vwaavo kuzwa mu manzwi. ^{15 16} Mi ka niini ku saka nehaili yeezi iswaneero.Mane ka ni ngolyi ichi kuti chimwi ni chi chitirwa. Ni woola kufwa kunze lyo kuti umwi a ni vindisa uko kulyi temba. Mukuti haiva nini chumayera manzwi, ka nina ivaka lyo kulyi temba, chivaka lyo kuti ni lukeere ku chita ichi.Mane vukaavo vuve kwaangu haiva nini sa chumayeeri manzwi! ^{17 18} Mukuti haiva nini chita ichi choku suna,niina ituwero.Mi haiva ni saalyi kusuna, ni siina muziyo u va heewa ime.Lyinu ituwero yangu chinzi? Kuti ha ni chumayera, ni ve kuha manzwi na seena kulyiha mane vulyo cho ku sa teendesa iswaneero zangu mu manzwi ku maninini. ^{19 20} Mukuti nangati ni hulwiirwa ku vonse,ni vavi muhikaana ku vonse, kuti ni woolye ku zunda vungi.Kuva Juta ni vavi siina Mujuta,kuti ni woolye ku zunda Vajuta.Kwaavo veena kunse lyo mulawo, ni vavi siina iye wiina kunse lyo mulawo kuti ni zunde avo veena kunsi lyo mulawo.Ni va chiti ichi nangati ime kavuhangu ka hena ni veena kunsi lyo mulawo. ^{21 22 23} Kwaavo veena kunze lyo mulawo,ni vaavi siina njeye wiina kunze lyo mulawo,nangati ka hena ni veena kunze lyo mulawo we Ireeza kavuhangu,mi kunsi lyo mulawo wa Kirisiti.Ni va chiti ichi kuti ni zunde avo veena kunze lyo mulawo.Kwaavo ve seena ziho,ni va vulyi ziho,kuti ni woolye ku zunda va seena ziho.Ni vavi zintu zonse ku vantu vonse,kuti che nzira zonse mwindi ni haza vamwi. ^{24 25 26 27} A ka mwiizi kuti mumaviro vangombolya vonse va ngombola luviro,mi uzo umwiina vulyo u tambula ituwero? Lyinu mu ngombweere ku tambula ituwero.Muntu wa maviro u chitisa kulyi woonda mu kulyi tukuseza kwaakwe konse.Va chitira vulyo ku tambula inkomoki e fwa,mi uswe tu ngombola kuti mwendi ne tu tambulye inkomoki e sa fwi.Lyinu ka ni ngombulyi ne ku seena ivaka nandi kubokisa choku kava luhuho.Mi ni haterera muviri wangu ne ku chita muhikana,kuti ha ni mana ku chumayera ku vamwi, ime kavuhangu sanzi ni zuswa.