1 2 3 Kaha inewo zi luhuho,vakwangu chikwame,ka ni suni kuti mu vulye kwiziva.Mwiizi kuti che mu siilyi vaphagana,mu va hambulyiswa ku veireeza va seena lyinzwi, mwi inzira ze mu va hitirwa naavo.Lyinu ni saka kuti mwi izive kuti ka kwiina yo wambiswa ne luhuho lwe Ireeza yiiti naati, ''Jeeso u kutitwa.'' Ka kwiina yiiti chocho,'' Jeeso nje Ireeza,'' kunze cho luhuho lu jolola. 4 5 6 Lyinu kwiina inewo zi siyene siyene mi luhuho lu mwiina.Mane kwiina misevezi e siyene siyene,mi Ireeza u mwiina.Mane kwiina mishovo ye misevezi,mi nje Ireeza u mwiina yo zi chita kuti zi wolyeke mo umwi ne umwi. 7 8 Lyinu ku umwi ne umwi u hewa ku tondezwa ko luhuho kuti vonse va vulyerwa.Mukuti ku umwi u hewa ne luhuho linzwi lya maano,ne ko zumwi linzwi lyo kwiiziva ne luhuho lu swana. 9 10 11 Ko zumwi u hewa itumero ne luhuho lu swana,ne umwi inewo zo kuhoza ne luhuho lumwina.Ko zumwi ku hewa misevezi ye inunuho,ne ko zumwi cheporofiti.Ko umwi ku hewa ku woola ku tawula inhuho,ko umwi ku siyana-siyana kwe indimi,ne ko zumwi ku talusa kwe indimi.Mi luhuho lu mwina ne lu swana lu teenda mu zonse izi, ne luha muntu umwi ne umwi,mwa sala. 12 13 siina muviri mu ulyi u mwiina mane wiina inungu zingi mane zonse inungu ze muviri u swana,lyinu mu kwiina vulyo cha Kirisiti.Mukuti che luhuho lu mwiina tu va koloverezwa mu muviri u mwiina,nandi vajuta nandi Vaherika,nandi vasungitwa nandi vahulwiirwa,mane tu vonse tu va chitirwa ku nywinsikwa luhuho lu mwiina. 14 15 16 17 Mukuti muviri ka hena inungu i mwiina,mi zingi.Haiva iteende ni lyiti,'' ka kani iteende, ka hena ni inungu ye muviri,'' ka hena lyi niine kwi inungu ye muviri.Mane haiva kutwi ne ku swanerwa ku cho,'' Mukuti ka kahena ni lyinso, ka hena ni inungu ye muviri,'' ka hena inungu ye muviri e niini.Haiva muviri wonse nuulyi lyinso,ku zuwa ni kwiina hayi? Haiva muviri wonse nuulyi kutwi,ku nunkuza nu kwiina hayi? 18 19 20 Mi Ireeza ava zaalyi inungu imwi ne imwi yo muviri siina mwa va ichiti.Mane haiva zonse ni zi vavi inungu i mwiina,muviri nu wiina hayi? Lyinu hanu kwiina inungu zingi,mi muviri u mwina. 21 22 23 24 Lyinso keeti che lyita iyanza,'' ka ni ku saki.'' Nandi mutwi ku cho itende,'' ka ni ku saki.'' Mi inungu zo muviri zi lolyeka kusakola zi sakahala.Ne inungu ze muviri ze tu nahanera ni zi seena ku kutekwa, tu ziha ikute ikaando, mane unungu zeetu zi sa lolyeki ziina chiriti chikaando.Lyinu inungu yeetu i lolyeka ka ku si sakahalyi kuti i hindwa che kukutekwa,mukuti yeena kalyi kukutekwa.Mi Ireeza ava nungiri inungu zonse hamwiina,mane a vahi ikute lyingi avo vava lyi vulyite. 25 26 27 A va chti ichi kuti sanzi ne kuvi ne patalala mukati kwe muviri,mi kuti inungu zi lyi vavalyere che kuhalyinsana kumwiina.Mane haiva umwi na nyanda,inungu zonse zi nyanda hamwiina.Nandi inungu i mwiina ha e kotekwa,inungu zonse zi lyi itumera hamwiina.Hanu mu muviri wa Kirisiti ne inungu zaawo mu mwiina. 28 29 Mane Ireeza ava salyi mwi ikereke chentanzi vapositola,chevuveri vaporofiti,chevutaatu vakutazi,kuzwaho avo va chita misevezi mikulu,kuzwaho inewo ze kuhoza,avo va lyeeta ituso,avo va chita misevezi ye izamayiso,naavo va veena indimi zi siyenesiyene.A vonse vapositola? A vonse va poroifiti? A vonse vakutazi? A vonse va chita misevzi mikulu? 30 31 A vonse veena inewo zi kuhoza? A vonse va wamba che indime? A vonse va talusa indime? Mu sake ahulu inewo zi kaando.Mane mu ni mu toondeza inzira e shiyeme ahulu.