¹ Puloknai-puloknai sa kikasihi, iti ayelah surat sakaruweh sa kuki tulis gikayo. Huang karuweh surat hio, kuki bausaha nyamelum pikiranko sa murni nihi cara ngingatkan ko, ² supaya kayo ngingat panderan-panderan sa dahulu haot pander nihi nabi-nabi kidus dan parintah-parintah Tuhan dan Juru Salamat nangkah ire rasul. ³ Pertama-tama, kanarasalah bahwa andrau-andrau terahir nereh, ire pangeya kakan hawi de umba hawa nafsu ire sa badosa. ⁴ Ire kakan bapander, "Tawe janji tentang kahawi-E? Gana sejak itak datu taka matei, kaluhane masih tatap takia kalah sa awalan penciptaan." ⁵ Gana ire sangaja koingat kanyataan bahwa nihi firman-E, langit haot naan neke sadi, dan bumi deulah neke ranu dan nangkah ranu. ⁶ Nihi ranu hio lei, dunia sa naan saat hio dekanahancur nihi ranu bajir. ⁷ Namun, nihi firman sa sama, langit dan bumi sa naan rahat ti deingkeh de tutung nihi apui nihi andrau panghakiman dan kahancuran ulun-ulun jahat. ⁸ Puloknai-puloknai sa kikasihi, ada detanan kanyataan sa isa iti: Bagi Tuhan, isa andrau kalah saribu taun dan saribu taun kalah isa andrau. ⁹ Tuhan bakoi piji balambat-lambat mamenuhi janji-E kalah sa de angap papire ulun sabagai katalambatan. sabalike, Aye sabar tahadapko gana Aye bakoi kakan isaulun pun galis, tatapi de kaluhan ulun indut hawi nihi pertobatan. ¹⁰ Andrau kahawi Tuhan akan hawi kalah saulun pangalat, dan langit kakan lenyap nihi suara sa tamam mehet. Benda-benda langit akan tatutung galis dan maleleh gana apui sa tamam malaing, dan dunia baserta sagala huange lei akan tatutung galis. ¹¹ Jaka sagala sasuatu aka dehancurkan, nihi cara iti, kalahawekah saharuse kayo welum? Bakoikah kayo harus welum barasih dan mangapdi nihi Allah, ¹² sambil ngandrei-ngandrei dan palaju andrau kahawi allah? Pada andrau Tuhan, langit kakan hancur gana apui, dan kaluhan banda-banda langit maleleh gana malaing. ¹³ Namun, sasuai nihi janji Allah, taka ngandrei-ngandrei langit dan bumi sa bio, uneng ulun-ulun bujur tau muneng. ¹⁴ Puloknai-puloknai sa kikasihi, gana taka ngandrei hal iti, maka bausahalah gagiat supaya Allah kahalu kayo bakoi badosa, bakoi banoda, dan badamai nihi Allah. ¹⁵ anggapbo kasabaran Tuhan sabagai kasempatan de taka narima kasalamatan. Sama kalah sa Paulus, puloknai terkasih taka, tuliskan gi kayo nihi hikmat sa deami Allah geaye. ¹⁶ lei bapander hal-hal iti huang kaluhan surate sa lain. Bujur naan hal-hal sa heka demengerti satau de putarbalikkan nihi ulun-ulun sa buntat dan sa leme imane. Ire gin ngulahe nihi bagian-bagian lain neke Kitab Suci, sa ngakibatkan kagalisan atas tenga ire kakarep. ¹⁷ Puloknai-puloknai sa kikasihi, gana kayo haot karasa hal iti, bahati-hatilah supaya kayo ada detunda sasat gene kasalahan neke ulun-ulun sa kenal hukum. Adalah kayo lau neke imanko sa tagap. ¹⁸ Namun, kahante Huang anugerah dan pangenalan akan Tuhan dan Juru Salamat taka, Yesus Kristus. Bagi Ayelah kamuliaan, saati dan hampe salawah-lawahe! Amin.