¹ Wayah iti,gene karunia-karunia Rohani,pulaksanai-pulaksanai,kukui bakoi hamen kayo bakoi ngarasa e. ² Kayo karasa aye hio katika kayo masih jari ulun-ulun sa mete ngataru Allah,kayo na santawang napot berhala muna,sameh awe kayo na tunda. ³ Gene hio,kuki mawara napot kayo bahwa bakoi isa lei,sa bapander ulah Roh Allah,sa ngeau,"Yesus terkutuk,"balalu bakoi naan isa lei sa kiuh ngeau,"Yesus aye hio Tuhan,"sa lain ulah Roh Kudus. ⁴ Naan ajoh karunia Rohani,tapi Roh e sameh. ⁵ Balalu,naan ajoh karunia pelayanan,tapi Tuhan e sameh. ⁶ naan ajoh gawian,tapi Allah sa sameh sa ngagawi kaluhan hal e huang kaluhan ulun. ⁷ Napot tiap-tiap ulun na karuniakan penyantena Roh mata kamaeh sasameh. ⁸ napot sa isa na ami antuhan-antuhan hikmat nangkah Roh balalu napot sa lain antuhan-antuhan pangarasa ulah Roh sa sameh. ⁹ Napot sa lain na ami Iman ulah Roh sa sameh,napot sa lain karunia-karunia panyamare ulah Roh sa isa hio. ¹⁰ napot sa lain na ami gawian-gawian mukjizat,napot sa lain nubuatan.Napot sa lain na ami ka tau mat mambeda roh-roh,napot sa lain ajoh masam bahasa lela,nihi sa lain ma artikan bahasa-bahasa lela hio. ¹¹ Kaluhan e iti na ulah Roh sa isa nihi sa sameh,sa mambagi napot masing-masing ulun,sameh sa na aheng E.Setiap ulun percaya aye hio Bagian tekei tenga Kristus ¹² Sameh nihi tenga aye hio isa,tapi naan ajoh anggota tenga,biar lei ajoh,aye isa tenga,sameh hio lei Kristus. ¹³ Gene,ulah isa Roh,takam kaluhan haot na baptis gi huang isa tenga,maeh ulun Yahudi atawa ulun Yunani,maeh hio walah atawa ulun merdeka,balau takam kaluhan na ami ngoot tekei isa Roh. ¹⁴ Gene tenga bakoi ekat tekei isa anggota tapi ajoh anggota. ¹⁵ amun pee ngeau,"gene kuki bakoi tangan,jari kukibakoi bagian tekei tenga,"bakoi baarti aye bakoi bagian tekei tenga. ¹⁶ Balalu,amun silu ngeau,"gene kuki bakoi mate,kuki bakoi anggota tenga,"bakoi baarti aye bakoi bagian tenga. ¹⁷ amun kaluhan tenga aye lah mate,ta awe kah pangarengei?amun kaluhan silu,ta awe kah pangenguh? ¹⁸ Tapi,wayah iti Allah haot ngandak anggota-anggota hio,satiap ulun tekei here,ta huang tenga,sameh awe sa naaheng E. ¹⁹ Amun kaluhan e aye hio isa anggota,ta awekah tenga? ²⁰ Jari,mula ajoh anggota,tapi ekat isa tenga. ²¹ Gene hio,mate bakoi tau ngeau napot tangan,"kuki bakoi perlu nihi kayo!"atawa lagi,ulu napot pee,"kuki bakoi perlu nihi kayo!" ²² Sa waleng e,anggota-anggota tenga sa katena e labih maleme sabujur e sa panga na perlukan. ²³ Balalu,anggota-anggota tenga sa na kono bakoi terhormat,justru ami bo penghormatan sa labih.balalu anggota-anggota tenga,sa na kono takam bakoi susuk balua,harus na ulah magin susuk balua, ²⁴ gene bagian-bagian sa haot susuk balua bakoi memerlukan e.Tapi,Allah haot ngatur tenga hio nihi ngami penghormatan labih hante napot anggota-anggota sa kurang, ²⁵ Mat bakoi naan perpecahan huang tenga,tapi mat anggota-anggota hio kiuh memperhatikan isa nihi sa lain. ²⁶ amun isa anggota rara,kaluhan anggota rara hayak aye.amun isa anggota na muliakan,kaluhan anggota ba sanang hayak aye. ²⁷ wayah iti kayo aye hio tenga Kristus balalu kayo masing-masing aye hio anggota-anggota e. ²⁸ Allah haot manetapkan huang Jemaat,ka isa aye hio here Rasul,karueh aye hio here Nabi,ka telu aye hio here Guru,udi mukjizat-mukjizat,karunia-karunia pa nyamare,pangawatan,kepemimpinan,nihi ba bagai-bagai bahasa. ²⁹ Inonkah kaluhan e Rasul?inonkah kaluhan e guru?inonkah kaluhan e pangulah mukjizat? ³⁰ Inonkah kaluhan e naan karunia pa nyamare?inonkah kaluhan e ba pander nihi bahasa-bahasa?inonkah kaluhan e mengartikan? ³¹ Tapi,hamen bo nihi bujur-bujur karunia-karunia sa panga hante.Balalu,kuki sagar nutui napot kayo lalan sa lawit labih maeh.