Oyino ndjo nkango yaKarunga yayiro kwaMika muMorashtite mumayuva ava Jotham, Ahaz, na Hezekiah, hompa wavaJudah, ovyo akengire vyakuhamena Samaria ntani na Jerusalem. ² Teererenu, namuvantjeya anwe vantu. Teererenu, udjuni, ntani navintjeya ovyo vyakaro mwenu. Pulitirenu Hompa Karunga akare mbangi yokumukananitanwe, Hompa mukutundilira muntembeli yendi yokupongoka. ³ Kenga, karunga kutunda mo mulivango lyendi, uye ngaya palivu na kulyata pamavango amanene muudjuni. ⁴ Ndundu ngadi deuhuruka kuntji yendi, madamenena ngaa kugaunuka, yira unanga kumeho yomundiro. ⁵ Navintjeya vino munkonda yomaudito ava Jacob, ntani mukondasi yondjo yomundjuwo yaIsrael. Maudito munke aJacob? Kapisi Samaria vene? Mavango munke aJuda amanene? Kapisi Jerusalem vene? ⁶ "Ngani renkita vaSamaria vavangi vokudjonaura mafuva, livango lyokukunina sitondo somandjembere, ntani ngani mutetera uye mawe palivu mulidamenena ntani ngani yiva ntundiliro yendi. ⁷ Siswi sendi nasintjeya ngasikutapera mukukutapera mukukugaunuka na kutjokauka, ntani djapo dendi nadintjeya odo awana ngava disora nomundiro, ntani ngani djonaurapo viKarunga vyovinapempa vyendi navintje. Mukondasi uye kwapongeka ndjapo dendi novimaliva vyokusondelita nka." ⁸ Mukonda yositambo sino ngani guva nakulira; Ngani yenda mpadi-mpadi ntani nomuherehere; Ngani lira yira mbwawa. Ntani ngalira vafe yira kakuru. ⁹ Uyeko vironda vyendi kwato kuviveruka, vyaya kwaJudah, vyayatika kumavero avantu vande, kuJerusalem. ¹⁰ Kapisi ngomuvitante kuhamena ovyo muGathi; kapisi ngomu lire vene. KuBeth Leaphrah ngani kusindumuna naumwande mumbundu. ¹¹ Mpitenu, vatungi vamuShaphir, muhere-here ntani noliswau. Vatungi vomuZaanan mwasa rupuka. Beth Ezel kuna kulira vafe, mukungi wavo vanava upu. ¹² Vatungi vomuMaroth kuna kutaterera mbudi yoyiwa unene-nene, mukondasi lidjonauro linaya palivu litunde kwa Karunga kumavero aJerusalem. ¹³ Kutira mbunga yo nkambe, vatungi vamu Lachish, Anwe, va Lachish, ntundiliro yondjo yovakamali muZion, maudito ko ava Israel kwaa wana moye. ¹⁴ Mposi ove ngautape lidjobwano lyondjapo muMoresheth Gath; doropa yaAkzib nga swaukita vaHompa vamuIsrael. ¹⁵ Ngani yita nka mufundi koye, vatungi vomuMareshah; uwa wavaIsrael ngauya muAdullam. ¹⁶ Kurura nokuteta huki doye vanukeko omo vahuguvara. Kurenke naumoye likorongongo yira karukodi, vanuke voyeko ngava kuyendera mumburundu kutunda koye.