¹ Ndani zira injahamu shilina lya Keresite. Kambuzi, lizwaro lyanga yandi paka shumupupo wo muchena. ² Ndatikya ndina maswabi ngama kuru indi wutuku iwahati pwara ku mutima anga. ³ Kakulinandili ketire akya, yeme tota, ndibe icuto sheshi ku tuwa koku Keresite, ku yimana bakwanga iwu mukowa anga shinyama. ⁴ Bapa ma Isiraele. Ku añurwa ukwawa, indi kanya, indi wumbiya, indi ku pewa murawo, indi ku rapera Urezya, indi sepiso. ⁵ Indi ibakare ku Keresite amatadzwa ku kutyekuwa kwi nyama - Yeye ndu Rezya izuto kozo. Araperwe ku twara mamini sizi. Amen. ⁶ Kono kaku tikya zi sepiso zu Rezya za shitiri. Kakowo mo Isiraele ibati wulya mo Isiraele. ⁷ Nanga iwu rusinga rwa Abburahama abana bakye. Kono, ''Isha Isaka rusinga rwe sharu beruwa akyo.'' ⁸ Ngahopa, abana wi nyama ka bana wu Rezya. Kono abana wi sepiso bati wikuwa rusinga. ⁹ Mi ngapani mayi i sepiso: '' Mukakanda kapani shandiye, mi umwana mushimani wa pewe ku Sara.'' ¹⁰ ka zopani ngaho, kono indi ku Rebbeka aku shangana abana ku murwa muxiki, yeye shetu Isaka- ¹¹ Bapundi kabara cire ku pakowa mi kabara cire ku panga wubbi kapa wuqa, akya muyana kano Urezya wugipe wukuli shera ku kye, ka shimisebezi kono shilibaka lya yeye yatati bera. ¹² Kwata tikya kukye, ''Baba kuru mbwa bayakye bapundi.'' ¹³ Akyopa tandi shukwata ñoruwa: ''Ndati shaka Jakowo, kono ndiku twaya Isau.'' ¹⁴ Shikya tatihweta cware? Kuna kuha shiyama ku Rezya? Kusiye kuba akyo. ¹⁵ Mata zira Mushe, ''Shendibe ni zuxuma kuyindi shandira xuma, ndiyuvure mutuku ishandi yuvura wutuku.'' ¹⁶ Cwarehe, intaba iku mwi qumu ayamati pweraka kapa yama tishaka, kono ina mwi qumu Urezya, yama tiqe zuxuma. ¹⁷ Liñolo lyatikya ku Faro, ''Shilibaka lini pundata kurera, atikya ndiraqe iqumu anga kuwe, indi ku tikya lini lyanga lyu yuvuhare lyuvu kolyo.'' ¹⁸ Nanga ndipakyo, Urezya ana zuxuma kuya mati shaka, hape yamati shaka mati mapanga kwaha yuvusisa. ¹⁹ Cware yewe shutikya kume, ''Shikya pumati nyaza? Kakuli iwe ndutyeri ku shaka zamati shaka?'' ²⁰ Yemwa, kono wendi yani yutyeri ku kwi taba zibbi ku Rezya? Kana kapoto ka kapanga pulima, sheka tikya kuya maka panga, ''Shikya pumandi panga akyopani?'' ²¹ Kapa yama panga arakini maata ku lima, kupanga pulirwaba lixiki kapoto kati kutye kuwa indi akamwe kahati ku tyekuwa? ²² Shikya ati Urezya, ashi shaka kwiqe wuqyu indi iqumu akye, akuli pata ahuru inako yinde shuzu poto zuwuqyu izata panjurwa ku bbura? ²³ Cware ati mata panga zopani shuku licera akya, ku yibahaza wufumu wa kye sha kanya ka kye shuzu poto tuzu xuma, zamata panjira kare kanya? ²⁴ Cware ati mata panga zopani kutswe, yamata beruwa, kapakati lya Majuda ngaho, kono indi kuwu lyuvu? ²⁵ Tandi shamata hweta moku Hoseya: ''Bayeyi bahali imbanga shandi babera atikya imbabga, mi murwakazi yahati sunuwa shandi mubere ya mati sunuwa. ²⁶ Shibata zuruwa akya kuwo, yenwe kani bayeyi banga, papa ngaho shaba beruwe bayeyi wu Rezya.''' ²⁷ Isaya mata hweta kuza Isiraele, ''iparo abana ba Isiraele indi puyakuba tandi ncawu apu liwatye, shuku yakuwe bati mushaka ngaho. ²⁸ Kakuli Shikati shapange za mati hweta ku lyuvu shuku haliyeha.'' ²⁹ Katandzi Isaya mata hweta kare, ''shikati kambe amatisire bayuku kambe tayaru muka tandi Sodoma, indi kuba tandi Gomora.'' ³⁰ Shikya ta ku hweta hee? Atikya Shicaba, shahara ku shaka wu shiyama, shashangana wu shiyama, wu shiyama shu tumero. ³¹ Kono Isiraele, iyaharu ku shaka wu shiyama, amaba pare shu murawo. ³² Shikya? Shuku tikya amaba wushake shi tumero, kono nokoti ishi mubberiko kakuli bara qaqara pu lyuwe. ³³ Tandi shukuru ku ñoruwa, ''Lyaya, Ndati bikuwa mo Siyone liwe lyati lika mi liwe lyaku qaqara, mi yamati shitura ku kye kamuni afwe zu shweni.''