¹ Wuqa kya basitye ma Juda? Zikya bati shangana ku mupato? ² Kukuru mwi njira koyo. Shi tandzi, nanyina tandi shi mayi Urezya ngata bikiwa kuwo. ³ Cware tandi ma Juda babamwe kali baku itumero? Kamuni ishe bashire ku sepahara ku Rezya? ⁴ Ku siye kuba kyo. Shuku tikya, ni siye Urezya ashanga nehe ni njahamu, nanga nduku tikya muyeyi kwekye ana imbuzi. Tandi shukuru ku ñoruwa, ''Atikya mati kwana kwi quwa ku chena mu mayi aye, ube yamati kyira pushu kuya pwi katuro.'' ⁵ Kono ati kau muchena ndukwiqe wuchena wu Rezya, shikya taku hweta? Tati kwana ku tikya Urezya ka muchena tilyata wuqhu wakye pwilyiiro lyetu? (Ndati sikawo mayemo umuyeyi.) ⁶ Ku siye kuba akyo! Cware ingahare Urezya isha yatura lyuvu? ⁷ KOnoati imbuzi anga yati mwanahara shi mbuzi anga muku murumba, shikya pundishi yaturuwa tandi mugwezabbi? ⁸ Shikya putaha tikya, putali shibiha wupaki wimbuzi tatikya, mi puta hati fwana nizita ti hweta, ''Ti panga wubbi, atikya wuqa wuye''? bashi nyazuwa bapa ku shiyama. ⁹ Shikya cware? Tatili kusa tswe bahalinwe? Yemwe. Tata nyazuwa kare kwetu ma Juda indi ma Gerike, kowo, shukuba mwishi lishibe. ¹⁰ Zopani tandi muzali zuñwerwa: ''Kuku yo muchena, tindi muxiki. ¹¹ Kuku yamati yuvusisa. Ku njemwa yamati shaka Urezya. ¹² Kuwoo bata yaru muka. Paxiki babi baba njemwa ituso. Ku njemwa yamatisi wuqa, kuku, tindi muxiki.'' ¹³ ''Mi lyuwu uzimbazi (mabita). Zindime zawo zati kitaka. Zi ndime awo zi fanu zizi nywaka zi namo.'' ¹⁴ ''Mromo awo yayira zukuto indi zezibbi.'' ¹⁵ ''Zikondo zawo zupuba kutira kukata igazi. ¹⁶ Ku wumbara indi ku ku shandisa kuna mu zinjira zawo. ¹⁷ Bayeyi bapani kabayi zire injara ikozo.'' ¹⁸ ''Ku njemwa kuywapa Urezya mwa mesho awo.'' ¹⁹ Pani kali tayiba kocho shu murawo wati hweta, ndati hwetga kubana mwishi lyu murawo. Zopani ku tikya muromo kowo wuti qamwi, mi lyuvu kolyo lili tabama ku mirandu alyo ku Rezya. ²⁰ Zopani ku tikya kuku mumbiri ishawu chenisiwa shu musebezi u murawo mwa mesho akyee. Shu murawo kwatiya ku yiba kapa amano ushibe. ²¹ Kono kudzwa pani kuruka ku Rezya ku murawo wata panguwa ku yibahara. Wata yiminwa ku murawo indi ba Porofita. ²² ndu ku tikya, ku ruka ku Rezya shi tumero ku Jeso Keresite kuwo kowo ibati tishira. ku njemwa mubati fapanera. ²³ Kowo batarasi kupanga shibe mi bata tsuruwa kwi kanya Urezya. ²⁴ Induku bikuwa ba bachena shizi xuma zu Rezya shuku palisuwa sha Jeso Keresite. ²⁵ Shuku tikya Urezya matapa Jeso Keresite shitabero shuku tishira muma rwapa akye. Mata raqe akyopa rusuno rwakye, ama lyaye zibe zintandzi zimwi nako iyikuli pata. ²⁶ Zopani kozo zatara sisini kwiqe wuqa wakye mu kakanda kapani. Zopaniku tikya alyiqe yehaline naqa, indi kwiqe kuyaka muyeyi kwekye shuku tishira ku Jeso. ²⁷ Ku lirumba ikure kuna? Kwatamana. Shu murawo wure? Wuku sebeza? Yemwa, kono shu murawo uku tishira. ²⁸ Tati kwenjira atikya muyeyi mati yakuwa shuku tishira kuku musebezi umurawo. ²⁹ Urezya, Urezya ama Juda kwee? Ka ku tikya Urezya uwu lyuvu? Eye, indi lyuvu akyopa. ³⁰ Ati, ku tikya, Urezya muxiki, mbwa yake Mbwa yake indi baba tsura shuku tishira (mupato), indi bahali batsura shuku tishira. ³¹ Kana tati mana murawo shuku tishira? Kusiye kuba akyo! Tati gisa murawo.