¹ Paulusi, mutanga Jeso Keresite, kuberuwa mu apositora mi indi kubi shirwa kurupati shulyiyi lyu Rezya, ² yamata sepisa baporofita bakye sha mañoro ndama chena, ³ ku hweta za Mwana'kye yama taya muru singa rwa Davida shi nyama. ⁴ Kwenda shu mupupo uwati chenisa mata zuwura shi qhumu kuraqho Mwana Urezya shuku tambuswa ku bafu, Jeso Keresite shikati etu. ⁵ Shakye tati chinjira rusuno indi wu apositora shuku tikya itumero mu mishowo koyo, shilibaka li lina lyakyee. ⁶ Mu mishowo yopa, indinwe nati beruwa atikya ni shanganehe koku Jeso Keresite. ⁷ Kuwo kowo ibana ma Roma ibati shakuwa ku Rezya mi indi ku beruwa bayeyi bakye baba chena: Rusuno kunwe indi shixamu ku dzwa ku Rezya Shetu indi Shikati Jeso Keresite. ⁸ Intandzi, Ndati kambira Urezya sha Jeso Keresite sha kwenu, shuku tikya itumero enu yati hwetuwa lyuvu kolyo. ⁹ Akyopa Urezya mandi yimina, yu mupupo anga wati bberishira shu wurumiwa wa Mwana'kye, indati dzera kuwuso ku hweta ku nwe. ¹⁰ Nikanditi rungira mu zitapero zanga munjira kozo atikya tidzere ku wuso pani shiku shaka ku Rezya mu kuya ku nwe. ¹¹ Ndati shaka ku ni mwana, atikya ndinipe zupo zu mupupo, atikya zini gise. ¹² Zopandi, nanwe ndati shaka atikya tiligise, kwetu mwi tumero, yiyenu indi yi yanga. ¹³ Pani amanda ku shaka atikya nisiye kuyiba, bakwenga, atikya ndati shaka kuya ku nwe (ndaru ku cikisiwa indi papani), atikya ndishangane zipata mwikyo lyenu, tandi shina tishangana ni lyuvu kolyo. ¹⁴ Ndati korota kowo indi ma Gerike indi madzwa shire, kowo ba basauka indi ba bagigi, ¹⁵ Cware, tandime, ndumu yi mina ku hweta lyiyi indi kokunwe ibana mo Roma. ¹⁶ Shuku tikya yemwa ndaku swabera ivangeli, dhi qhumu Urezya shuku paliswa ku muyeyi kwekye ya mati tishira, ma Juda itandzi piri mi ndu kwakuya ma Gerike. ¹⁷ Shuku ruka ku Rezya kwatara qewe shuku tishira kwi tumero, tandi shukuta ñoruwa, ''Ba bashiyama shaba pare shi tumero.'' ¹⁸ Shu wugyu wu Rezya wata mwenisiwa ku dzelira kw lyiiro ku rwenisa bababbi mi indi bayeyi bababbi shuwubbi batidzwa kwi niti. ¹⁹ Zopani ishuku tikya iza yibahara ku Rezya zati mwanahara kuwo. Urezya mata ba mweni shira. ²⁰ Iza kyee zaha mwanahara, kubera i qhumu akyee mi indi wukuru wa kyee, zati mwanahara naqa, ku dzelira kwi tandzi ulyuvu, mwi zuto izata panguwa. atikya kuku ku shapura. ²¹ Zopani ishuku tikya, nanga ndiba yi zire Urezya, amabaku mu kotura atikya Urezya, amb kuli tumera. nanga ndipakyo, babi ba bagigi mu miyanakono awo, mi mitima awo yahati yanakana naqa ina muka rema. ²² Batili mwana wusauka, kono batiya kuba babagigi. ²³ Bata yaru muna i kanya yu Rezya yahati fwa mi bati yi fwanisa shi swaniso shu muyeyi ishati fwa, ziini, shi batana shama kondo anee, mi indi zati kokuba. ²⁴ Cware Urezya mata bapa atikya bayendye mu mitima awo yati shashira kwisi za masira, atikya basiye kuku tyeka mi mbiri awo. ²⁵ Imbo bati yaru muna injahamu Urezya kuyi panga imbuzi, mi bati rapera zipanguwa ku siye yeye yamata zipanga, (mupangi) yamati rumbuwa kutwara kwaha mana. Amen. ²⁶ Shi libaka lyopani, Urezya mata basiya kwenda mu yati shashira mitima awo, mi barwakazi bawo batali chicha wu mbiya wawo niba baku muwu mbiya. ²⁷ Akyopa, indi barwa bata siya wu mbiya wawo ni barwakazi mi bapisuwa ku kutabera ba bamwe. Bapa barwa ibatarasi zopa zezibbi ni bayeyi indi kuli tambwira murandu wati ba rukyera zisi ziba tarasi. ²⁸ Shuku tikya amaba tishire ku yiba haza Urezya muzu hweta zawo, mata bapa amano ngahali ndingo naqa, atikya barasi izuto za hali ndizo. ²⁹ Bata yira zahali zi shiyama, runya, zitakazo zuku fuma, wubbi. Bayire wubbi, kubbura, zi kani, ku kitaka, mi yana kano ye mibbi. Bana mashopye, ³⁰ Ibana imbuzi, ba twaya Urezya, bana mahanyi, batili ku musa, bati jwama mayira ukwisi wubbi, bahati ku tyeka bashe muzi bawo. ³¹ Baku amano, itumero iche, mitima yemiche, indi baku zi xuma. ³² Bati yuvu sisa zi tyeya zu Rezya, batisi zopa izuto bati swanera rufu. Kono kakwisi zopa ngaho, bati tishira abamwe kwisi zopa.