¹ Nane ame kapi namanguruka? Nane ame kapishi mu Apostoli? Ndi ame kapi namona Kristusi muyowoli wetu? Anwe nane kapishi viyimwa vya shiruwana shande mwa Hompa wetu? ² Nkene shi kuvamwe ame kapishi mu apostoli, kukwenu anwe ungambi waghu Apostoli wande oghu ampa Hompa? ³ Likupopero lyande kwavo vashano kumpangura ndyo lino: ⁴ Atwe nakuvhurashi tulye na kunwa ndi? ⁵ Nane atwe nakuvhurashi tuyende nava kamali vetu ugenda yira momu varuwanga va Apostoli nava unyetu vamwe mwa muyowoli wetu na Peturusi? ⁶ Ndi name na Barnabasi tupu vakuvhura kuruwana morwa liparu lyetu? ⁷ Are wa kuruwana viruwana vya ukavita, makura akufute mwene? Are wa kutapeka shipata sha vinyu apire kulyamo viyimwa vyamo? Ndi are wa kukunga vimuna apire kukandamo mashini? ⁸ Ame kuna kughamba vino pankondo dashinauntu tupu ndi? Nane kapishi na veta mo yina kutanta? ⁹ Momu muveta ya Mosesi kwatjangamo ashi, '' Hove nkene kuna kushwaya mbuto washa yimanga kukanwa''. Ngoli shili Karunga kwatambire Hove vya ushili ndi? ¹⁰ Nane ngoli ovino kapishi kwavi ghambilire mukonda yetu! Vino kwavitjangera kukwetu, mposhi mupuruli ahuguvare movyo ana kushwaya mposhi ngawanenemo muyangu wendi. ¹¹ Nkene atwe kwa kuna vininke vyapa mpe[o mumwenu, vyavinenepo kukwetu makuwana muyangu wakutunda kukwenu ndi? ¹² Nkeneshi mpovali vawanango vino kukwenu, nane ndi kapishi atwe vakuvhura tuwane vyavinene ndi? Ano ngoli atwe kapi twaruwanita dino nkondo? Atwe mbyo twadidimika mwana vintje tupire kuyita makulimbo ku mbudi yayiwa ya Kristusi. ¹³ Ameshi mwavi yiva ashi ovo varuwanango viruwana vya kupongoka mu ntembeli kuwana ndya davo muntembeli? Kapi mwayiva ashi vakare vakuruwana ku shidjambero kuwanako ovyo vyavahameno vyakushidjambero? ¹⁴ Mo ngoli nka waro, Karunga kwa tapa murawo ashi vakuyivita mbudi ya yiwa vaparukire momo mukuyuvita mbudi ya yiwa? ¹⁵ Nampili momu vapulitira mukuruwana weno, shimpe kapi naruwana vya weno. Ntani ovyo nakutjangera vino kapishi ndi walye nuwanenemo vintu. Hashako tupu nkene kuvhura nganufe-mposhi kwato ogho ngashwauro shiruwana shande shashinene. ¹⁶ Nkene kuna kuyuvita mbudi yayiwa, kapishi mponukutumbira mukondashi kwavimpa nuviruwane. Ndjo yayinene nkene nupira kuyuvita mbudi ya yiwa. ¹⁷ Ame kwaruwanga vino nashihoro, nganukawana mfuto? Nkene kuviruwanena kumutininiko, shimpe nahepa kuviruwana morwa kwavimpa nuviruwane. ¹⁸ Mfuto yande nane mfuto munke? Ashi nahepa kuyuvita, mbudi yayiwa pahana kukara ntjontjo ntani nupire kutambura vitapa ovyo nahepa kuwana mukuyuvita mbudi yayiwa. ¹⁹ Nampili momu nakara ashi namanguraka kunavantje, ame kwa kara numupika wa kuruwanena navantje, mposhi nganuyite vantu vavangi kwa Kristusi. ²⁰ Kuva Juda ame kukara yira numu Juda mposhi nukongwe va Juda. Kwavo vakaro kuntji ya veta, name kukara wakuntji ya veta mposhi nganu kongwe vantu vavangi va kuntji ya veta. Ame kwaruwana vino nampili momu nakara ashi ame kapishi umwe nakaro kuntji ya veta. ²¹ Kwavo vakaro pandje ya veta, nahepa kukara yira umwe nakaro pandje yaveta, nampili ngoli kapi nakara pandje ya veta ya Karunga, ngoli kuntji ya veta ya Kristusi. Kwaruwana vino mposhi nukongwe vavangi vapandje ya veta. ²² Kwavo vakupira nkondo, name kukara umwe wa kupira nkondo, mposhi nukongwe vavangi vakupira nkondo. Kukwavo navantje, nahepa kukuyenda nakukara mu ukaro wavo navntje nikongwerepo nampili vamwe. ²³ Navintje vino ame kuviruwanena morwa mbudi yayiwa, mposhi nganuwanenemo name matungiko ghamo. ²⁴ Ameshi mwaviyiva ashi mumarumbatano vaduki vangi vahamenangomo, ano ngoli umwe tupu ndje wakuwana mfuto yakufunda? Nanwe nka waro dukenu ngamukawane mfuto yenu. ²⁵ Kehe uno muduki kukuyom belita mwanavintje. Vavo kuruwana vino mposhi ngava kawane nkata yakupira kukarererapo, ano ngoli kuruwanena yakukarererapo. ²⁶ Mposhi ame kapi nakuduka nahana shitambo ndi kapi nakutoghona ngomi yande mumpepo mawoko-woko. ²⁷ Ame kuyombilita rutu rwande rukare runatikilirimo, opo nganu mana kuyuvita vantu, ame n umwande kapishi nganukahupeko.