¹ Empak Yesus dengan padakmuhid Ia udah nampin Yerusalem, datang meh di Betfage di bukit Zaitun, Yesus alu ngihin dua muhid Ia, ² jekuk Ia ahung sidak," Angkat meh ke kampun sigik lagik, nuan akan nemu sikok keledai yang dikat diak himbai anak ia yang laki. Lepas meh ke dua ikok iyak, alu baik ahung Aku.Entik ³ bisik yang nanyak hal iyak, padah ahung ia, Tuhan mehelu sidak, uhang iyak pun alu nyuhuh kian ngemaik keledai iyak angkat besama nuan." ⁴ Hal ituk tejadi sepaya di genap meh nebuat yang dipadah ulih nabi. Yang bandai," ⁵ Padah meh ahung anak betinak Zion, Pantau meh, Haja nuan udah datang kuang nuan, hendah ati seta nait keledai- sikok keledai mudak." ⁶ Sidakdua muhid iyak pun alu angkat ngeheja baka yang udah dipadah ahung sidak. ⁷ Sidak ngemaik keledai seta anak keledai laki alu ngelegak utan yang dipakai sidak datas keledai iyak, Yesus alu dudk datas iya. ⁸ Sebagian besah kehumun uhang banyak iyak ngancau utan di pakai sidak tengah jalan, sidak yang lain ngegak dan kayu senik alu ngelegak iya di jalan. ⁹ Kehumun uhang banyak iyak ada yang bejalan dadap Yesus seta yang di belakang Yesus sambil betumbau," Hosana bagi Anak Daud! di behekat meh Ia yang datang alam nama Tuhan. Hosana di ahung yang palin tinggik!" ¹⁰ Empak Yesus datang di Yerusalem, semua uhang di kuta iyak betanyak-tanyak," Sepa Ia?" ¹¹ Kehumun uhang iyak nyaut," Ia meh Yesus, nabi dahi Nazaret di Galilea." ¹² Yesus alu tamak kalam bait Allah. Ia ngusih semua uhang yang bejual beli alam bait Allah, alu ngemalit padak mija sidak penukah duit seta padak bangku sidak yang nyual biuk daha. ¹³ Jekuk Ia ahung sidak," Bisik tetulis, Humah Aku akan di sebut humah doa, tapi nuan udah ngawai iya jadi sahang penyamun." ¹⁴ Abis iyak uhang butak dengan uhang lumpuh datang ahung Yesus alam bait Allah, Ia pun nyembuh sidak. ¹⁵ Tapi empak padak imam kepala dengan padak ahli Taurat mantau mujisat-mujisat yang di gawai Yesus, seta sidak ningapadak biak senik betumbau alam bait Allah," Hosana bagi Anak Daud," alu timbul meh pemencik alam ati sidak. ¹⁶ Sidak bandai ahung Yesus," Apa Nuan ninga apa yang di sebut sidak?" Saut Yesus ahung sidak," Auk, tapi nda kalak meh nuan maca, Keluah dahi mulut biak-biak senik dengan padak biak yang lagik nyusu Nuan udah nyiap puji-puji yang palin bait. ¹⁷ Yesus alu angkat dahi sidak keluah dahi kuta iyak nuju Betania alu bemalam diak. ¹⁸ Seta pagi empak Yesus pulang ke kuta, Ia lapah. ¹⁹ Ia mantau kayu aha di sisi jalan. Yesus bejalan nuju kayu iyak, tapi seta Yesus mantau kayu iyak nisik bebuah yang hanya daun dengan cabang iya magang, Yesus alu bandai," Nuan nda akan bebuah lagik," sekini iyak ugak kayu aha iyak alu hangkai layuk. ²⁰ Seta padak muhid mantau hal baka iyak, sidak jadi ihan alu bandai," Kati baka kayu aha iyak tau layuk?" ²¹ Yesus nyaut sidak," Aku bandai ahung nuan sesungguh iya, entik nuan bisik iman seta nda bimbang, nuan ukan hanya ngeheja baka yang udah tejadi ahung kayu iyak, tapi nuan bahkan tau bandai ahung bukit iyak, Tehangkat meh alu tebuang meh ke laut, hal iyak pun tejadi. ²² Apa magang yang nuan mintak alam doa dengan penuh pecayak, nuan akan nehimak iya." ²³ Empak Yesus tamak kalam bait Allah, imam-imam kepala dengan padak tua-tua bansa iyak datang ahung Ia waktu Ia ngajah alu bandai," Makai kuasa apa meh Nuan ngeheja hal ituk?" ²⁴ Saut Yesus ahung sidak," Aku jekak betanyak ugak sutik petanyak ahung nuan. Entik nuan madah iya ahung Aku, Aku pun akan madah nuan makai kuasa mena Aku ngeheja hal ituk. ²⁵ Baptis yang di keheja Yohanes- dahi mena datang iya, dahi surga atau dahi mensia?" Sidak ngebahas hal ituk di entaha sidak kedihik, sidak alu bandai," Entik kita padah dahi surga, ia pasti bandai kuang kita," Jadi ngapa nuan nda pecayak ahung ia?" ²⁶ Tapi entik kita padah dahi mensia, kita takut dengan uhang banyak, kehena sidak mantau Yohanes pembaptis sebagai nabi." ²⁷ Sidak alu nyaut Yesus alu bandai," Kami nisik ketau." Yesus alu nyaut sidak ugak," Entik baka iyak, Aku pun nda akan madah ahung nuan makai kuasa mena Aku bebuat hal ituk." ²⁸ Tapi apa pendapat nuan? Bisik suhang yang ada dua anak. Ia datang kuang anak laki ia yang petama alu bandai, anak aku angkat meh, bekeheja meh di kebun angguh ahi ituk. ²⁹ Anak laki iyak nyaut," Aku nda mauk angkat, tapi nda lamak pikih ia behubah, ia pun alu angkat. ³⁰ Uhang iyak alu angkat kuang anak laki ia yang kedua alu bandai baka iyak ugak. Anak laki ituk nyaut,' Apang,aku jekak angkat, tapi ia nda angkat. ³¹ Yang mena meh kedua anak iyak yang ngeheja pengemauk apang ia? Sidak nyaut," Anak laki yang petama." Yesus bandai ahung sidak," Sesungguh ia Aku madah ahung nuan, padak penagih pajak dengan padak pelacuh akan tamak kalam Kehajaan Surga lebih duluk dahi nuan. ³² Kehena Yohanes datang ahung nuan ngelalu jalan kebenahan, tapi nuan nda pecayak, sementaha padak penagih pajak dengan padak pelacuh pecayak ahung ia. Alu nuan, walaupun nuan udah ngeliat apa yang tejadi, nuan bahkan nda betubat dengan nda pecayak ahung ia. ³³ Dinga meh pehumpama yang lain. Ada uhang bisik tanah. Ia mukak k3bun angguh,alu masang pagah sekelilin iya, ngali ahung pakai mehas angguh alam iya, ngawai menaha pakai nyaga, alu nyiwa iya ahung padak pekebun angguh. Ia alu angkat ke negehi lain. ³⁴ Seta udah dampin musin ngulih buah iya, ia ngihin bebehapa pelayan ahung uhang yang nguhus angguh ia pakai nehimak hasil dahi angguh ia. ³⁵ Tapi sidak yang ngeheja kebun angguh iyak nahit alu melasah pelayan iyak, munuh pelayan lain, alu nikam pelayan lain makai batu. ³⁶ Sekali lagik yang empu kebun angguh iyak ngihin pelayan-pelayan ia, lebih banyak dahi yang duluk, tapi sidak yang ngeheja kebun angguh iyak ngawai hal baka iyak ugak. ³⁷ Abis iyak yang empu kebun angguh iyak ngihin anak anak laki ia kedihik ahung sidak, jekuk ia, sidak pasti ngehumat anak laki aku, ³⁸ Tapi seta sidak yang ngeheja kebun angguh iyak mantau anak laki yang empu kebun angguh, sidak pun alu bandai di entaha sidak," Ituk meh ahli wahis ia, Abuh kita bunuh ia, alu kita yang empu heta yang jadi wahis ia. ³⁹ Sidak pun alu ngemaik ia, nebak ia keluah dahi kebun angguh alu munuh ia. ⁴⁰ Pituk empak yang empu kebun angguh iyak datang, apa yang ia keheja ahung sidak yang ngeheja kebun angguh iyak?" ⁴¹ Saut sidak ahung Yesus," Ia akan munuh uhang-uhang yang jat iyak makai caha yang lebih kejam, alu nyiwa kebun angguh iyak ahung padak pekebun lain yang mauk mehik hasil kebun angguh iyak ahung ia." ⁴² Jekuk Yesus ahung sidak," Nda kalak meh nuan maca alam Kitab suci, Batu yang udah di buang tukang bangunan udah jadi batu penjuhu. Hal ituk dahi Tuhan seta jadi hal yang ajaib di mata kita? ⁴³ Kehena iyak Aku bandai ahung nuan, Kehajaan Allah akan di ambik dahi nuan alu akan di behik ahung bansa lain yang ngehasil buah. ⁴⁴ Bahang sepa yang jatuk katas batu ituk ia akan ancuh. Tapi uhang yang di tinggang batu ituk, ia akan hemuk." ⁴⁵ Seta padak imam kepala dengan uhang Farisi ninga pehumpama iyak, sidak ngeheti bahwa Yesus bandai pakai sidak. ⁴⁶ Sidak beusaha jekak nangkap Ia, sidak takut dengan kehumun uhang banyak iyak, kehena uhang banyak iyak ngehumat Yesus sebagai nabi.