¹ Udah Yesus mehik pehintah ahung kedua belas muhid Ia, Ia angkat dahi iyak pakai ngajah seta bekutbah alam kuta-kuta sidak. ² Empak Yohanes yang agik alam penjaha ninga apa yang udah di keheja Kristus, ia ngihin padak muhid ia ³ suhuh nanyak ahung Ia," Apa Nuan yang jekak datang iyak, atau kami ahus ngegak uhang lain lagik?" ⁴ Yesus nyaut alu madah ahung sidak,"Angkat meh alu padah apa yang nuan keliat seta dinga. ⁵ Uhang butak tau ngeliat, uhang lumpuh tau bejalan lagik, uhang kudung bait baka semula lagik, uhang tulik ninga lagik, uhang mati di angkat sepaya idup lagik, uhang miskin dipadah kabah bait. ⁶ Seta bebahagia meh sidak yang nda nentang Aku." ⁷ Udah sidak iyak angkat dahi iyak, Yesus mulai bandai ahung uhang banyak iyak tentang Yohanes, Apa yang jekak nuan pantau di padang guhun - lalang yang di tepau hibut? ⁸ Tapi apa yang jekak nuan pantau- suhang mensia bebaju bait? Apa meh iyak, sidak yang bebaju bait diam alam istana haja. ⁹ Tapi apa yang jekak nuan pantau-- suhang nabi? Auk, Aku bandai ahung nuan, bahkan lebih dahi suhang nabi. ¹⁰ Tentang ia bisik tetulis,' Pantau meh, Aku ngihin yang ngemaik pesan Aku duluk dahi penatang Nuan, yang jekak nyiap jalan pakai Nuan dadap Nuan.' ¹¹ Aku bandai ahung nuan, di entaha sidak yang dikeluah betinak, nisik yang lebih besah dahi Yohanes Pembaptis. Tapi yang palin senik alam kehajaan surga lebih besah dahi ia. ¹² Mulai dahi Yohanes Pembaptis sampai dengan saat ituk, uhang-uhang yang tunduk ahung kehajaan Surga bulih pemedih, seta sidak yang ngawai kekehasan ngambik ia secaha paksa. ¹³ Kehena semua nabi dengan ukum Taurat udah menebuat sampai ke Yohanes. ¹⁴ Alu entik nuan jekak nehimak iya, ituk meh Elia, uhang yang jekak datang iyak. ¹⁵ Sepa yang bisik kelindang, isak meh ia ninga. ¹⁶ Alu kati Aku ahus ngebandin angkatan ituk? Sidak baka biak senik yang betungak di pasah, sidak yang duduk, ningkau bala kaban ia ¹⁷ alu bandai," Kami bemain sulin pakai nuan, nuan alu nda menahi. Kami agik behayi, tapi nuan nda nda ensidak". ¹⁸ Kehena Yohanes datang nisik makan huti dengan minum angguh, sidak alu bandai,' ia kehasuk sitan'. ¹⁹ Anak Mensia datang tapi makan dengan minum alu nuan bandai," Pantau, Ia iyak mauk makan seta suhang peminum, kaban padak penagih pajak seta padak uhang bedosa!' Tapi kebijaksanaan di benah kehena ia bebuat bait. ²⁰ Yesus mulai nyengka padak kuta yang ahung Ia udah banyak ngawai pebuatan-pebuatan besah, kehena sidak nda betubat. ²¹ Celaka meh nuan, Khorazim! Celaka meh nuan, Bethsaida! Entik pebuatan-pebuatan besah yang udah digawai ahung nuan udah di keheja ugak di Tirus dengan Sidon, alam penyesal sidak akan betubat dahi subak. ²² Tapi Tuhan akan ngukum nuan lebih behat dahi pada Tirus dengan Sidon empak ahi penghakiman. ²³ Nuan Kapernaum, apa nuan pikih nuan jekek ditinggik sampai ke Surga? Nda akan, nuan akan di hendah ke Hades. Kehena entik mujisat udah digawai atas Sodom digawai ugak ahung nuan maka iyak tetap tejadi sampai ahi ituk. ²⁴ Tapi Aku bandai ahung nuan, iyak akan lebih mudah bagi Sodom empak ahi penghakiman di bandin dengan nuan." ²⁵ Waktu iyak Yesus bandai," Aku ngemuji Nuan Bapak, Tuhan langit dengan bumi, kehena Nuan labuk semua ituk dahi sidak yang bijaksana seta banyak ilmu, alu madah ahung sidak yang napan kalak belajah baka padak biak senik. ²⁶ O, Bapak, Nuan udah bekeheja baka iyak kehena iyak nyenang ke Nuan. ²⁷ Semua utan udah dipecayak ahung Aku dahi Bapak Aku; seta nisik suhang pun yang ngelalak Anak kecuali Bapak, seta nisik suhangpun yang ngelalak Bapak selain Anak, seta ahung sepa-sepa Anak mauk madah iya. ²⁸ Datang meh ahung Aku, semua kian yang bekeheja kehas seta banyak beban, Aku jekak mehik nuan belepa. ²⁹ San meh kuk yang Aku behik seta belajah meh dahi Aku, kehena Aku bait ati dengan nda ninggik dihik, nuan akan nemu belepa alam jiwa nuan. ³⁰ Kehena kuk yang Aku pasang mudah seta beban Aku pun lemput.