¹ Kitab ituk ngisah kentuhun Yesus Kristus, anak Daud, anak Abraham. ² Abraham apang dahi Ishak, Ishak apang dahi Yakub, Yakub apang dahi Yehuda dengan bala menyadik ia, ³ Yehuda apang dahi Peres dengan Zerah ngelalu Tamar, Peres apang dahi Hezron, Hezron apang dahi Ram. ⁴ Ram apang dahi Aminadab, Aminadab apang dahi Nahason, Nahason apang dahi Salmon, ⁵ Salmon apang dahi Boas ngelalu Rahab, Boas apang Obed ngelalu Rut, Obed apang dahi Isai, ⁶ Isai apang Daud sang Haja. Daud apang dahi Salomo ngelalu bini Uria. ⁷ Salomo apang dahi Rehabeam, Rehabeam apang dahi Abiya, Abiya apang dahi Asa, ⁸ Asa apang dahi Yosafat, Yosafat apang dahi Yoram, seta Yoram apang dahi Uzia. ⁹ Uzia apang dahi Yotam, Yotam apang dahi Ahas, Ahas apang dahi Hizkia, ¹⁰ Hizkia apang dahi Manasye, Manasye apang dahi Amon, Amon apang dahi Yosia, ¹¹ Yosia apang dahi Yehkonya dengan bala menyadik ia empak dibuang ke Babel. ¹² Abis dibuang ke Babel, Yekhonya apang dahi Seltiel, Seltiel apang dahi Zerubabel, ¹³ Zerubabel apang dahi Abiut, Abiut apang dahi Eliakim, Eliakim apang dahi Azor, ¹⁴ Azor apang dahi Zadok, Zadok apang dahi Akhim, Akhim apang dahi Eliud, ¹⁵ Eliud apang dahi Eleazar, Eleazar apang dahi Matan, Matan apang dahi Yakub, ¹⁶ seta Yakub apang dahi Yusuf laki Maria yang udah behanak kai Yesus yang ditingkau Kristus. ¹⁷ Semua kentuhun dahi Abraham sampai Daud, bisik empat belas kentuhun, dahi Daud sampai sidak dibuang ke Babel bisik empat belas kentuhun, alu dahi dibuang ke Babel sampai Kristus bisik empat belas kentuhun. ¹⁸ Yesus keluah ke dunia ituk dengan caha baka ituk: Indai Ia, Maria udah betunang pakai nikah dengan Yusuf, tapi senapan sidak idup besama, ia diketau udah ngandung kehena Ruh Kudus. ¹⁹ Laki ia Yusuf, ia uhang yang beiman, ia nda mauk mehik malu Maria dadap uhang banyak. Jadi ia ngemutus secaha diam-diam nda jadi betunang ahung Maria. ²⁰ Tengah Yusuf bepikih baka iyak, Malaikat Tuhan ngenampak dihik ahung ia alam mimpi bandai baka ituk," Yusuf, anak Daud, anang takut ngambik Maria jadi bini nuan, kehena anak yang bisik alam pehut ia dibehik ulih Ruh Kudus. ²¹ Ia jekak bulih anak laki, nuan mehik nama Ia Yesus, kehena Ia jekak nyelamat umat Ia dahi padak dusa sidak. ²² Semua ituk tau tejadi pakai ngenap apa yang udah dipirman Allah ngelalu nabi yang bandai," ²³ Sesungguh iya pehawan iyak akan ngandung alu behanak anak laki,sidak akan ningkau nama Ia Imanuel"- yang heti iya," Allah beseheta kita." ²⁴ Yusuf alu angkat dahi peniduh ia alu ngeheja baka yang udah dipehintah malaikat Tuhan ahung ia seta ngambik Maria jadi bini ²⁵ ia.Tapi ia nda setiduh besama dengan Maria sampai ia behanak anak laki.Alu Yusuf mehik nama Ia Yesus.