¹ Ada mensia benama Ananias. Bini ia benama Safira. Sidak dua nyual sebidang tanah. ² Ananias ngelabuk setengah dahi hega tanah iyak, (bini ia pun ketau) alu nyehah sisa ia, ngelegak ia ahung kaki hasul-hasul. ³ Petruspun bandai," Ananias,ngapa ati nuan dikuasa iblis, sampai-sampai nuan ngakal Ruh Kudus, ngelabuk setengah dahi asil nuan nyual tanah? ⁴ Entik tanah iyak napan dijual, tanah iyak kan agik empu nuan? Kalau udah di jual, iyak pun agik alam kuasa nuan? Kati baka nuan tau bepikih baka iyak alam ati nuan? Nuan nda ngakal mensia, tapi ngakal Allah," ⁵ Seta ninga umung baka iyak, Ananias tetumbang alu mati. Semua sidak yang ada diak abis penakut ninga ia. ⁶ Alu datang meh padak biak mudak mungkus ia, debaik keluah alu ngubuh ia. ⁷ Kiha-kiha tiga jam abis iyak,bini Ananias datang. Ia nisik ketau apa yang udah tejadi. ⁸ Petrus nanyak ahung ia," Padah ahung aku, Apa nuan nyual tanah hanya sehega ituk? Betinak iyak pun nyaut," Auk pemanyak iyak." ⁹ Petrus pun bandai ahung ia," Kati kian dua bepekat jekak nguji Ruh Tuhan? Pantau, kaki sidak yang ngubuh laki nuan bahuk di pintu, sidak pun jekak ngangkat nuan keluah." ¹⁰ Betinak iyak pun lansung tumbang alu mati. Padak biak mudak tamak,mantau betinak iyak udah mati, ngemaik ia keluah, alu ngubuh ia dampin kubuh laki ia. ¹¹ Semua jemaat yang ada diak, takut luah biasa, temasuk semua uhang yang ninga hal iyak. ¹² Banyak tanda dan mujizat udah tejadi ahung uhang diak, ngelalu tangan hasul-hasul. Padak hasul bekumpul di sehambi Salomo. ¹³ Tapi nisik suhangpun yang behani begabung dengan sidak. Semua uhang hemat dengan sidak. ¹⁴ Uhang yang pecayak ahung Tuhan makin betambah, laki atau betinak. ¹⁵ Ada yang ngemaik uhang sakit kejalan, ngelegak sidak di tempat tiduh. Sepaya entik Petrus lalu diak, kemayang ia tau kenak sidak. ¹⁶ Ada ugak yang datang kiak uhang dahi kuta-kuta dampin Yerusalem yang ngemaik uhang sakit dan ada ugak yang kehasuk ruh-ruh jat. Sidak semua sembuh. ¹⁷ Tapi imam besah datang. Yang ngimbai sidak ( sekte Saduki ). Sidak ngehasa dengki, ¹⁸ alu nangkap padak hasul, dan ngemasuk sidak ke penjaha umum. ¹⁹ Malam ahi iyak, suhang malaikat Tuhan mukak pintu penjaha, ngemaik sidak keluah, ia pun bandai," ²⁰ Angkat meh! Bedihi di Bait Allah. Padah ahung semua uhang tentang firman Hidup ituk. ²¹ Udah sidak ninga iyak, sidak tamak ke Bait Allah agik pagi ahi,alu ngajah. Tapi Imam besah datang besama uhang yang ngimbai ia,alu ningkau Dewan Agama, seta tua-tua Israel. Sidak ngutus uhang ke penjaha pakai ngambik hasul-hasul. ²² Tapi petugas yang datang kiak nisik nemu sidak alam penjaha. Sidak pulang alu ngelapuh. ²³ Kami mantau penjaha iyak tekunci hapat, padak pengawal agik bejaga dipintu, empak kami mukak pintu, kami nisik nemu suhangpun diak." ²⁴ Seta kepala Bait Allah, dan imam-imam kepala ninga hal iyak, sidak jadi bingung dengan apa yang udah tejadi ahung hasul-hasul. ²⁵ Alu ada uhang datang madah sidak," Uhang-uhang yang kian penjaha,tengah bedihi di Bait Allah. Sidak agik ngajah uhang banyak." ²⁶ Maka kepala Bait Allah besama padak petugas ngambik hasul-hasul,tapi nda makai caha kehas, kehena sidak takut uhang banyak nikam sidak pakai batu. ²⁷ Udah ngemaik hasul-hasul, sidakpun ngadap padak hasul kadap angguta dewan. Imam besah nanyak padak hasul," ²⁸ Kami ngelahang kehas kian ngajah alam Nama Iyak, tapi kian udah menuh Yerusalem dengan pengajah kian, dan nanggung dahah Uhang iyak katas kami." ²⁹ Tapi Petrus dan Yohanes nyaut," Kita ahus lebih taat pada Allah dahipada mensia. ³⁰ Allah inik muyang kami udah ngangkat Yesus yang udah kian bunuh dengan ngantung Ia di kayu salib. ³¹ Allah udah ngeninggik Ia di sepiak kanan Ia, dan nyadi Ia Pemimpin dan Juhu Selamat, pakai mehik petubatan ahung Israel, dan ngampun dusa-dusa. ³² Kami ituk meh saksi dahi semua iyak. Baka iyak ugak meh Ruh Kudus, yang Allah behik ahung sepa magang yang taat ahung Ia. ³³ Seta padak angguta dewan ninga iyak, sidak benah-benah bihang,dan jekak munuh padak hasul. ³⁴ Tapi ada uhang Farisi benama Gamaliel, pengajah Taurat yang dihemat semua uhang, bedihi, dan mehintah hasul-hasul debaik keluah untuk sementaha ³⁵ Ia pun bandai," Uhang-uhang Israel, pantau bait-bait, apa yang jekak kian keheja auhng uhang-uhang ituk. ³⁶ Kehena napan lamak,Teudas angkat ngakuk dihik ia hibat, dan bisik sekitah epat hatus uhang ngimbai ia. Ia tebunuh. Dan semua yang ngimbai ia tecehai behai dan nisik bulih apa-apa. ³⁷ Udah iyak Yudas dahi Galilea muncul pada ahi sensus penduduk. Ia ugak ngemaik banyak uhang. Tapi ia pun binasa, dan semua yang ngimbai ia tecehai behai ³⁸ Pituk aku madah ahung kian, Anang nampin uhang-uhang ituk, isak sidak kedihik. Kehena, bila hencana atau keheja ituk dahi mensia, maka iyak akan tebuang. ³⁹ Tapi bila dahi Allah, kian nda akan mampu ngalah sidak. Bahkan kian akan sadah bahwa kian sedang ngelawan Allah. Maka sidak pun yakin. ⁴⁰ Alu sidak pun ningkau hasul-hasul suhuh tamak, dan melasah sidak, mehintah sepaya sidak nda ngumung alam nama Yesus. Hasul-hasul pun suhuh angkat dahi iyak. ⁴¹ Setelah sidak angkat dahi padak anguta dewan agama, sidak ngehasa hambik, kehena sidak danggap layak bulih penghinaan kehena nama Yesus. ⁴² Sesudah kejadian iyak, tiap ahi alam Bait Allah, dan dahi humah kehumah, sidak tehus ngajah madah behita Yesus sebagai Kristus