¹ Ukah iro, uki kiite erang kaua manamang tauka gi surga, dan lengan nien, sa rongoi ku iyalah lengan trompet bapaner andri uki, sawada, "abaileh mpah itu, dan Uki sagar ngampi ite pah iko inun sa harus terjadi ukah itu." ² Tawuk iro pada, uki na kuasai Roh* dan iteleh, erang kaua tahta gi surga dan Erang kaulun maharung gi bawo tahta iro. ³ Dan, Io sa maharung gi bawo tahta iro, taite iyalah watu permata yaspis dan sardis; dan naan salumparau gi sakaliling tahta iro, sa ta dinung iyalah zamrud. ⁴ Gi kalilingan tahta iro naan ruam pulu opat tahta dan gi bawo tahta-tahta iro uki kiite ruam pulu opat mantuo-mantuo * maharung, makai jubah wura dan mahkota-mahkota amas naan gi ulok reo. ⁵ Dan, teke tahta iro kaluar samaran kelat dan guhuk lengan nanyu. Dan, naan pitu dian sa maraai gi hadapan tahta iro, sa adalah pitu Roh Allah. ⁶ Dan, gi hadapan tahta iro pada naan sesuatu iyalah lautan kaca, iyalah kristal. Gi suan dan gi sakaliling tahta iro naan opat satua sa ponu andri mato gi bagian muka dan walingne. ⁷ Satua sa pertama iyalah erang kaukui singa, dan satua sa karuo iyalah erang kaukui babiri upo, dan satua sa katolu ba rowawa iyalah rowawa murunsia, dan satua ka opat iyalah erang kaukui langamet sa rahat samiding. ⁸ Ka opat satua iro masing-masing naan onom elat sa ponu andri mato, baik gi luar maupun gi huang ne; koondro kamalom, kaopat satua iro bakoi suah mihindroi bapaner, "Kudus,kudus, kudusleh Tuhan, Allah Sa Maha Kuasa, sa haut naan, sa naan , dan sa sagar hawi." ⁹ Dan, satiap kali satua-satua iro ngundru kemuliaan, hormat, dan ontuhan syukur pah Io sa maharung gi bawo tahta, sa wolumpah kangohang ne, ¹⁰ ka ruam pulu opat muntuo-muntuo iro sujud gi hadapan Io sa maharung gi bawo tahta iro, dan nyamah Io sa wolum hampe pah kangohang ne iro, dan medak mahkota reo gi hadapan tahta iro nelang sawada, ¹¹ "Ya Tuhan dan Allah kain, Iko layak narime kemuliaan, hormat, dan kuasa Ket iko haut menciptakan kahai sesuatu dan ket kabahumen-Ko kahai itu naan dan naciptakan."