¹ "Pah malaikat jamaat gi Efesus tulis leh: Ituleh papaneran Io sa ngepot pitu wiwihiang gi longon-Ne dan sa malan gi helang pitu poo dian amas iro. ² Uki kotoe kahai gawian ko dan uyuh rara ko dan katekunan ko, kolowangun iko bakoi tahan nadap sa jahat, dan iko manguji ulun-ulun sa ngontuh tonga ne rasul,* kude sabujur ne reo bakoi lah rasul, dan nang kahong reo palsu. ³ Iko naan katekunan dan batahan demi ngaran-Ku dan bakoi kataru uyuh. ⁴ Kude, Uki nagur iko et iko haut nanan ahi ko sa semula. ⁵ Ket iro, itunglah teke hawe iko lawu dan batobat nelang ulahleh inun sa haut iko gawi semula. Amun bakoi, Uki sagar hawi pah iko dan ngepo poo dianko teke duloine, kacuali iko batobat. ⁶ Kude, itu sa naan gi iko: iko muar gawian-gawian kawan pengikut Nikolaus, sa pada na kuar-Ku. ⁷ Io sa naan talingo ingkehleh korongoi inun sa na wada daya Roh* pah jamaat-jamaat. Pah io sa manang, Uki sagar ngundru kuman teke kakau pamolum sa naan gi Taman Allah."Surat pah Jamaat gi Smirna ⁸ "Dan, pah malaikat jamaat gi Smirna tulisleh: Ituleh papaneran teke Sa Awal dan Sa Akhir, sa haut mate dan wolum mulek: ⁹ Uki kotoe kasusahen dan panyusahko, kude sesungguhne iko tatau! Uki kotoe fitnah sa na tuju pah iko ulah reo sa ngontuh tongane ulun Yahudi, kude sa bujurne bakoi, melainkan sinagoge Iblis. ¹⁰ Ada takut nadap inun sa sagar iko derita. Iteleh, setan sagar numuk papire teke iko mpah huang panjara pakai iko na uji, dan iko sagar mengalami penganiayaan sa ohang sapuluh ondro. Satialeh hampe mate, dan uki sagar ngundru pah iko mahkota pamolum. ¹¹ Io sa naan talingo ingkehleh korongoi inun sa na wada Roh pah jamaat-jamaat. Ulun sa manang bakoi sagar menderita et pampate sa karuo kali."Surat Mpah Jamaat gi Pergamus ¹² Dan, ph malaikat jamaat gi Pergamus tulis lah : ituleh papaneran Io sa naan pedang kumat bamato ruo: ¹³ Uki kotoe gi hawe iko duloi, gi duoi tahta Iblis; kude iko ikepot gi ngaran-Ku dan bakoi nyangkal iman-Ku bahkan pada zaman Antipas, saksi-Ku sa setia sa nawunu gi suan iko, duoi Iblis duloi. ¹⁴ Kude, uki nagur iko et naan papire gi suan iko sa baya ajaran Bileam, sa ngajar Balak pakai ngingkeh sandungan gi muka pea-pea Israel*, pakai kuman pongokan sa na persembahkan pah berhala* dan ngulah dosa-dosa seksual. ¹⁵ Mihie pada, naan papire gi suan iko sa ikepot pah ajaran Nikolaus. ¹⁶ Ket iro, batobatleh! Amun bakoi, Uki sagar hawi pah iko dan memerangi reo andri pedang teke wawa-Ku. ¹⁷ Io sa naan talingo ingkehleh korongoi inun sa na wada Roh pah jamaat-jamaat. Pah io sa manang, Uki sagar ngundru manna* sa tadina; dan Uki sagar ngundru pah io erang kaua watu wura, dan erang kaua ngaran wayu tatulis gi watu iro, sa koi oeng eraipun ulun sa kotoe ne kecuali ulun sa narime ne." Surat mpah Jamaat gi Tiatira ¹⁸ "Dan, pah malaikat jamaat gi Tiatira tulislah: Ituleh papaneran Pea Allah, sa mato-Ne iyalah lelap apui dan sa poo-Ne malelap iyalah tembaga huang papuian: ¹⁹ Uki kotoe gawian-gawian ko, kasih dan iman ko, pelayanan ko, dan kasabaren ko, dan bahwa gawian-gawian ko sa terakhir melampaui sa pertama. ²⁰ Kude, Uki nagur iko ket iko ngaret wawe Izebel iro, sa mangaku sebagai erang kaulun nabiah, ngajar dan nyantawang pelayan-pelayan-Ku pakai bazina dan kuman pangokan sa haut na persembahkan pah berhala. ²¹ Uki haut ngundru ne waktu neo batobat, kude io bakoi hakon batobat teke zina ne ²² Iteleh, Uki sagar numuk io pah obo duoi surui penderitan dan reo sa bazina* andri io sagar tumuk-Ku pah huang kasusahen sa idu, kacuali reo batobat teke gawian-gawian wawe iro. ²³ Dan, Uki sagar munu Pea-Pea ne andri pampate; dan kahai jamaat sagar kotoe bahwa Uki lah sa nguji pikiran dan ate ulun, dan Uki sagar ngundru pah iko masing-masing manurut gawian ko. ²⁴ Kude, pah iko sa lain gi Tiatira, sa bakoi baya ajaran itu, sa mete kotoe rahasia-rahasia Iblis, Uki sawada, Uki bakoi sagar ngingkeh beban lain pah bawo ko. ²⁵ Kude, ikepotleh tarus pah inun sa haut iko miliki hampe Uki hawi. ²⁶ Dan, pah ulun sa manang dan ngulah gawian-gawian-Ku hampe akhir, Uki sagar ngundru kuasa bawo bangsa-bangsa, ²⁷ dan reo sagar mamarentah bangsa-bangsa iro andri tungkeh jatang, na ampi lenuh bakeping-keping iyalah tembikar tukang periuk, ket Uki pada haut narime kusa teke Uma-Ku. ²⁸ Dan, Uki sagar ngundru pah io wiwihiang timur. ²⁹ Io sa naan talingo ingkehleh korongoi inun sa haut na wada Roh pah jamaat-jamaat."