¹ Balalu, uki korongoi naan lengan sa mehet teke huang Bait Allah sa iwada mpah kapitu malaikat, "Tulakleh dan wawakleh kapitu cawan murka Allah iro mpah bumi." ² Malaikat pertama tulak dan mawak cawan ne mpah bumi, maka timullah sabulintak sa menjijikkan dan mahanang mpah ulun-ulun sa makai tanda satua iro dan nyamah sampatungne. ³ Malaikat karuo mawak cawanne mpah laut, maka laut baubah jari raya, iyalah raya ulun mate; dan kahai sa wolum gi huangne pun jari mate. ⁴ Malaikat ka tolu mawak cawanne mpah sunge-sunge dan mato- mato ranu, dan kahaine jari raya. ⁵ Balalu, uki korongoi malaikat sa bakuasa bawo ranu sawada, "Iko adil, ya sa Suci, sa naan dan sahaut naan ket Iko menghakimi kahai itu. ⁶ Sabab, reo haut mawak raya umat-Ko sa kudus dan raya nabi-nabi-Ko*,kude Iko ngundru reo raya neo na minum. Reo pantas narimene." ⁷ Dan, uki korongoi altar* sawada, "Ya Tuhan, Allah Sa Maha Kuasa, bujur dan adillah penghakiman-Ko.' ⁸ Malaikat kaopat mawak cawanne mpah bawo mato ondro, maka mato ondro na undru kuasa neo ngampi etong murunsia andri apui. ⁹ Murunsia naampi etong et layong saluar biasa, kude reo menghujat ngaran Allah sa kaompun kuasa bawo kahai bencana itu. Reo bakoi hakon batobat dan nawat Allah. ¹⁰ Malaikat kadimo mawak cawanne mpah bawo takhta satua iro, maka karajaanne jari sirom; dan reo ngikit lola reo ket kahanangan, ¹¹ dan menghujat Allah sa gi surga ket hanang dan sabulintak reo; kude reo bakoi batobat teke gawian-gawian reo. ¹² Malaikat kaonom mawak cawanne mpah sunge idu, iyoiro Efrat, maka ranune jari karing neo nyiap lalan mpah raja-raja teke Timur. ¹³ Balalu, uki kiite teke wawa naga, teke wawa satua iro, dan teke wawa nabi palsu kaluar tolu roh najis sa naite iyalah ja,ung, ¹⁴ ket reo adalah roh-roh jahat, sa ngulah tanda-tanda ajaib, sa tulak mpah raja-raja gi bumi neo ngumpul reo neo nadap paparangan gi ondro idu, iyoiro ondro Allah, Sa Maha Kuasa. ¹⁵ (''Ite! Uki hawi iyalah maling. Na berkatileh ulun sa tatap kaelan dan malihara pamane sehingga io bakoi sagar malan andri tabentur dan ulun-ulun bakoi kiite kamaluanne.") ¹⁶ Kamulek roh-roh jahat iro ngumpul reo gi duloi, gi huang bahasa Ibrani na ontuh Harmagedon. ¹⁷ Malaikat kapitu mawak cawanne mpah udara, balalu narongoi naan lengan sa mehet teke huang Bait Allah, teke takhta iro, iwada, "Haut luput." ¹⁸ Dan, naan kelat nyamar, lengan nanyu, dan gempa bumi sa tamam, iyalah mete suah terjadi teke murunsia naan gi bumi, tuu dahsyat gempa iro. ¹⁹ Kota idu iro patuhi jari tolu bagian, dan kota-kota bangsa-bangsa runtun; dan Babel sa idu iro bakoi naampiloloi Allah neo na undru mpah io cawan anggur murka-Ne sa meluap. ²⁰ Satiap pulau jawoh dan gunung-gunung bakoi na tangkahong. ²¹ Uran es sa idu kira-kira sa wiet 1 talenta, lawu teke langit ngatekan murunsia; kude murunsia menghujat Allah ket bencana uran es iro. Sabab, bencana iro miiro mengerikan.