¹ Kamulek, uki kiite Pea Babiri sokondrong gi Bukit Sion, dan baya-Io naan 144 ribu ulun, sa naan ngaran Uma-Ne gi rai reo. ² Uki korongoi lengan teke surga iyalah guhuk ranu sa rama iyalah lengan nanyu mehet, kude lengan sa na rongoi ku iro iyalah lengan kawan pamain kecapi sa memainkan kecapi reo. ³ Reo manyanyikan suatu nyanyian wayu gi hadapan takhta dan gi hadapan kaopat satua dan gi hadapan muntuo-muntuo*. Koi oeng eraipun ulun tau mempelajari nyanyian iro salain ka jatuh opat pulu opat ribu ulun sa haut na tewuh teke bumi. ⁴ Reo adalah ulun-ulun sa bakoi menajiskan tonga andri wawe-wawe ket reo perjaka. Reo adalah ulun-ulun sa uba Pea Babiri pah awepun Io tulak. Reo haut na tewuh teke suan murunsia jari ua-ua sa pertama mpah Allah dan Pea Babiri. ⁵ Bakoi oeng ojo huang wawa reo; reo bakoi bahala. Pesen teke Tolu Malaikat ⁶ Uki kiite malaikat lain samiding gi suan langit, ngoit Injil* kekal neo na baritakan mpah reo sa duoi gi bumi dan mpah kahai bangsa, suku, bahasa, dan kaum ⁷ dan io bapaner andri lengan mehet, "Takutlah mpah Allah dan undrulah kamuliaen mpah-Io ket waktu penghakiman-Ne haut tiba; samahlah Io sa ngulah langit, bumi, laut, dan kahai mato ranu." ⁸ Balalu, malaikat sa lain, sa karuo, ngapung dan iwada, "Runtun, haut runtun Babel sa idu iro ket io haut ngulah kahai bangsa minum anggur nafsu seksualne sa bejat." ⁹ Kamulek, malaikat sa lain, sa katolu, ngapung karuo malaikat sametene, dan iwada andri lengan mehet, "Jika hiepun nyamah satua iro dan sampatungne, dan narime erai tanda gi rai atau longonne, ¹⁰ ulun iro sagar minum anggur murka Allah, sa na tuangkan andri kakuaten ponu mpah huang cawan murka-Ne, dan io sagar na siksa andri apui balerang gi hadapan malaikat-malaikat kudus dan gi hadapan Pea Babiri. ¹¹ Dan, atuk siksaan reo ngabai kangohangne. Reo koi oeng waktu neo istirahat, koondro atau kamalom, iyoiro reo sa nyamah satua iro dan sampatungne, atau hiepun sa narime tanda ngaranne." ¹² Itulah ketekunan ulun-ulun kudus sa malihara parentah Allah dan iman reo gi huang Yesus. ¹³ Balalu, uki korongoi lengan teke surga bapaner, "Tulislah itu: Malai tataha, naberkatilah ulun mate, sa mate gi huang Tuhan."Roh* sawada, "Bujur, pakai reo kaiyuh baistirahat teke uyuh rara reo ket gawian-gawian reo uba reo." Bumi Nawasi ¹⁴ Balalu, uki kiite awan wura dan maharung gi bawo awan iro erang kaulun iyalah Pea Murunsia*,makai mahkota amas gi ulok-Ne dan arit* sakomat gi longon-Ne. ¹⁵ Balalu, malaikat lain kaluar teke Bait Allah, dan baseru andri lengan mehet mpah Io sa maharung gi bawo awan, "Ayunkan arit-Ko dan wasileh ket waktu pakai masi gi bumi haut hawi." ¹⁶ Maka, Io sa maharung gi bawo awan mangayunkan arit-Ne mpah bawo bumi, dan bumipun na wasi. ¹⁷ Kamulek, malaikat lain kaluar teke Bait Allah sa gi surga, dan io pada naan arit sa komat. ¹⁸ Dan, malaikat sa lain kia, sa bakuasa bawo apui, kaluar teke altar*. Io baseru andri lengan mehet mpah malaikat sa ngepot arit komat iro, "Ayunkan arit ko sa komat iro dan kumpul leh gugusan ua anggur teke kakau anggur gi bumi." ¹⁹ Maka, malaikat iro mengayunkan aritne mpah bumi dan ngumpul gugusan ua anggur teke kakau anggur gi bumi dan numukne mpah huang watu kilangan murka Allah. ²⁰ Pamianan ua anggur iro na ulah gi luar kota, dan raya mareh teke alat pamianan anggur iro kira-kira saobo kekang kuda dan sapanyang saribu onom jatuh stadia.