¹ Ukah iro, naan erang kaua tanda sa idu gi langit: erang kaulun wawe ba pama mato ondro dan wulan gi pida poo ne dan mahkota teke dua walas wiwihiang gi ulokne. ² Wawe iro rahat sawuntung dan huang penderitaanne niba ngayaan, io ngariak kahanangan. ³ Kamulek, naan erang kaua tanda sa lain gi langit: erang kaukui naga idu bawarna mea sa naan pitu ulok dan sapuluh tandruk dan pitu mahkota gi ulokne. ⁴ Ukui naga iro nyujut sepertolu wiwihiang gi langit dan numuk ne mpah bumi. Naga iro sokondrong gi hadapan wawe sa ngunu ngayaan iro pakai hantek wawe iro haut ngayaan, io tau nolon Pea ne. ⁵ Wawe iro ngayaan erang kaulun Pea upo, sa sagar mamarentah bangsa-bangsa andri tungkeh jatang; kude Pea iro na rabut dan na oit pah Allah dan pah hadapan takhta-Ne. ⁶ Wawe iro nempat pah jubut hukot, pah duoi sa na sadiakan Allah pah io pakai gi raha, io na palihara sa ohang saribu ruo jatuh enem pulu ondro. ⁷ Dan, terjadilah paparangan gi surga, Mikhael dan kawan malaikatne berperang dawan naga iro. Naga iro berperang andri kawan malaikatne, ⁸ kude reo bakoi sukup kuat sehingga koi oeng kia duoi pah reo gi surga. ⁹ Naga idu iro na tumuk mpah pida, nipo montuo sa na ontuh Iblis atau Setan, sa nyantawang kahai dunia, io na tumuk mpah bumi, dan kawan malaikatne na tumuk mpah pida baya io. ¹⁰ Dan, uki korongoi lengan mehet gi surga bapaner, 'Tataha, haut hawi kasalamaten, kuasa, dan karajaan Allah takam, nelang kekuasaan Kristus*-Ne et si panuduh pulaksanai-pulaksanai takam, sa nuduh reo gi hadapan Allah kaondro dan kamalom , haut na tumuk mpah pida. ¹¹ Reo nyantalaune andri raya Pea Babiri, dan andri papaneran dan kasaksian reo; ket reo bakoi ma,ahi nyawa reo, bahkan nadap pampate. ¹² Ket iro, baarai mihewuleh, hai surga dan kahai sa duoi gi huang ne! Kude, salakaleh bumi dan laut ket Iblis haut dolui pah iko huang panyangitne sa idu ket io kotoe bahwa waktu sa na milikine singkat." ¹³ Hantek naga iro kiite bahwa io haut na tumuk mpah bumi, io nganiyaya wawe sa haut ngayaan Pea upo nien. ¹⁴ Kude, wawe iro na undru ruo elat wurung raja wali sa idu pakai io tau samiding pah jubut hukot, pah duoi ne, gi hawe io na pariku sa ohang erai masa, ruo masa, dan setengah masa oro teke hadapan hi nipo. ¹⁵ Nipo iro nyamur ranu iyalah sunge mpah arah wawe iro, pakai nyantaping wawe gi huang ne. ¹⁶ Kude, bumi ngarawah wawe iro; bumi nguka wawane dan nolon ranu sa na samur naga iro. ¹⁷ Balalu, naga jari sangit tuu mpah wawe iro dan tulak neo memerangi pea-pea sa lain teke wawe iro, iyoiro ulun-ulun sa mamalihara parentah-parentah Allah dan ikepot mpah kasaksian Yesus. ¹⁸ Naga iro sokondrong gi hiring laut.