¹ Hantek Yesus rahat malan , Io nginte ulun pehe teke kayaanne. ² Murid-murid Yesus nunti hmpah-Iyo, "Guru, hiekah sabadosa, ulun itu atawa ulun muntuone sehingga io nakayaan pehe?" ³ Yesus nuing, "Bakoi iyo atawa ulun muntuone badosa, melainkan gawian-gawian Allah na nytakan gi huang iyo. ⁴ Takam harus ngawi gawian-gawian Iyo sa nguts Uki sauhang onro magun koonro; malom sagar hawi hantek bakoi oeng erang kaulun pun iuh bagawi. ⁵ sa uhang Uki gi dunia, Ukileh mai dunia," ⁶ Ukah nyawada mihie, Yesus nura pah tana dan ngaduk iwe-Ne anri tana balalu ngosokne gi mato ulun iro, ⁷ dan sawada hmpahiyo, "Tulak, uileh tongako gi kolam Siloam." Siloam aratine "nautus'.Balalu, ulun iro tulak mui tongane, dan iyo mulek anri nginte. ⁸ Kawan tetangga dan reo sametene nginte iyo sebsgai ulun pehe sawada,"Bakoikah ulun itu sa biasane maharung dan mengemis?" ⁹ Sebagian ulun sawada "Yo, iyoleh pengemis iro," sa lain sawada, "Bakoi,iyo ekat sarupa anri pengemis iro."Kode, ulun sa inrene pehe iro sawada, "Ukileh pengemis iro." ¹⁰ Balalu, ulun-ulun iro nunti hmpahiyo, "Nakolo matoko tau na kitop?" ¹¹ Ulun iro nuing, "Ulun sa bangaran Yesus ngaduk tana dan ngosokne gi matoku. Kamulek, Io sawada hmpahuki, 'Tulak pah Siloam dan uileh tonga ko', jari uki tulak dan mui tonga,dan uki iuh nginte." ¹² Reo sawada hmpahiyo, "Gi hawekah Ulun iro? Io nuing, " Uki bakoi kotoe." ¹³ Kamulek, reo sa ngoit ulun sa inrene pehe iro hmpah ulun-ulun Farisi. ¹⁴ Naanpun onro hantek Yesus ngaduk tana dan ngugah mato ulun iro adalah onro sabat. ¹⁵ Maka, ulun-ulun Farisi hinra kia nunti hmpah ulun iro nakolo io kaiuh nginte Io sawada hmpah reo, " Io ngosok adukan tana pah matoku, dan uki mui tonga dan uki kaiuh nginte." ¹⁶ Ket iro, papire ulun Farisi iro sawada, "Ulun iro bakoi baasal teke Allah ket Io bakoi mamatuhi onro Sabat."sa lain sawada, "Kode, nakolo mungkin ulun sa badosa kaiuh ngulah tanda ajaib itu?" Maka, timulleh pidaraian gi helang reo. ¹⁷ Jari, mulek nunti pah ulun pehe iro "Inun pahabako neo Iyo ket Iyo haut ngugah matoko?" Ulun iro nuing, "Io adalah erang kaulun Nabi." ¹⁸ Ulun-ulun Yahudi iro tatap bakoi harap hmpahiyo, bahwa ulun iro inrene pehe kode tataha kaiuh ngite, hampe reo mowa ulun muntuo teke ulun sa tataha kaiuh nginte iro, ¹⁹ dan nunti hmpah reo,"Inunkah itu peako, nakolo io tataha iuh nginte?" ²⁰ Ulun muntuone nuing reo dan sawada, "Kain kotoe bahwa iyo pea kain dan bahwa io pehe teke kayaan, ²¹ kode nakolo tataha io iuh ngite, kain bakoi kotoe; atawa hie sa haut ngugah matone, kain bakoi kotoe. tunti ai pahiyo, io haut dewasa; io sagar bapaner pakai tonga ne raerai." ²² Ulun muntuone nyawada mihie ket reo takut hmpah ulun-ulun Yahudi. Sabab ulun-ulun Yahudi iro haut sapakat, bahwa satiap uilun ngakui Yesus sebsgai Kristus, sagar nakucilkan teke Sinagoge. ²³ Iroleh sababne ulun muntuone sawada, "Io haut dewasa, tunti ai hmpahiyo." ²⁴ Jari, pakai karuo kaline ulun-ulun Yahudi muwa ulun inrene pehe iro, "Unru kemuliaan Allah, kain kotoe bahwa ulun itu badosa." ²⁵ Io nuing, "Inun ulun iro ulun badosa atawa bakoi, uki bakoi kotoe; sametene uki pehe kode tataha uki nginte." ²⁶ Reo sawada hmpahiyo, "Inun sa na ulah hmpahiko? nakolo Io ngugah matone?" ²⁷ Io nuingreo, " Uki haut nyawadane hmpahiko, kode iko bakoi hokun nyonrongoine;et inun iko sidi nyonrongoine kia?Inunkah iko sidi jarimuri-Ne pada? ²⁸ Maka, reo menghina iyodan sawada, "Ikoleh murid Ulun iro, kode kain adalah murid-murid Musa. ²⁹ Kain kotoe bahwa Allah haut bapaner hmpah Musa,kode neo ulun iro, kain bakoi kotoe teke hawe Io baasal!" ³⁰ Ulun iro nuing dan sawada hmpah reo, "Tuu aneh bahwa iko bakoi kotoe teke hawe Iyo baasal,padahal Iyo haut ngugah matoko. ³¹ Takam kotoe bahwa Allah bakoi nyonrongoi ulun ba dosa, kode hie sa takut akan Allah dan ngulah kabahomen-Ne Allah nyonrongoi iyo. ³² Teke pono hampe tataha, mete suah na rengei bahwa erang kaulun ngugah mato teke kayaan. ³³ Jaka Ulun iro bakoi baasai teke Allah, Iyo bakoi kaiuh ngulah inun-inun." ³⁴ Ulun-ulun Yahudi iro nuing dan sawada hmpahiyo, "iko kayaan ponu anri dosa,dan iko hokun manggurui kain? Maka, reo ngunur ulun iro. ³⁵ Yesus nyonrongoi bahwa ulun-ulun Yahudi haut ngunur ulun pehe iro; hantek Yesus kahong anri iyo, Yesus sawada, "Inunkah iko harap hmpah Pea Murunsia?" ³⁶ Ulun iro nuing, Hiekah Iyo iro, Tuhan,nampan uki harap hmpah-Iyo?" ³⁷ Yesus sawada hmpahiyo, "Iko haut nginte Iyo. Iyo adalah sa rahat bapaner anriiko." ³⁸ Ulun iro nuing Tuhan, uki harap! kamulek iyo suntup gihadapan-Ne. ³⁹ Yesus sawada, "Pakai penghakiman Uki hawi pah dunia itu nampan reo sa bakoi nginte, iuh nginte dan reo sa nginte, jari pehe." ⁴⁰ Papire ulun Farisi sa naan di rupak-Iyo nyonrongoi hal iro, dan sawada hmpah-Iyo, "Inunkah kain pada pehe?" ⁴¹ Yesus sawada hmpah reo, "Jaka iko pehe iko bakoi ngumpun dosa; kode ket iko sawada, 'Kain ngite', dosako tatap naan."