¹ Ukah iro, Yesus nyabarang danau Galilea, yoiro danau Tiberias. ² Wahai ulun notah Iyo ket reo nginte tanda-tanda ajaib sa Io ulah tahadap ulun-ulun sakit. ³ Kamulek, Yesus ngabai pah bawo wungkur dan maharung gi raha baya murid-murid-Ne ⁴ Hantek iro perayaan Paskah ulun Yahudi haut rupak ⁵ Nelang nginte pah ngawariung-Ne dan nginte ulun wahai hawi hmpah-Iyo Yesus sawada hmpah Filipus,''Gi hawekah takam iuh moli rute nampan ulun-ulun iro iuh kuman?" ⁶ Yesus nyawada hal iro pakai nguji Filipus ket sabujur ne Io soknrong kotoe inun sa akan Io ulah. ⁷ Filipus nuing, "Rute sa juman 200 / ruo jatuh dinar bakoimakan sukup pakai reo, sekalipun masing-masing ekat kaiuh erangkahila odik ae, ⁸ "Naan erangkaulun murid-Ne yoiro Andreas, pulaksanai Simon Petrus,sawada hmpah Yesus, ⁹ "Giyiitu naan erang kaulun pea sa ngompun dimo rute lole dan ruo kenah, kode inun aratine iro pakai ulun wahai itu?" ¹⁰ Yesus sawada, "Huyuleh kahai ulun pakai maharung."Gidoui iro wahai rikut, jari ulun-ulun iro maharung kira-kira dimo ribu kawan upo jumlahne. ¹¹ Kamulek Yesus ngepo rute-rute iro dan ukah ngontuh syukur, Io mambagi rute-rute iro hmpah reo sa maharung; miiro pada naulah-Ne tahadap kenah-kenah iro sawahai sa reo sidi ¹² Hantek kahai ulun haut wosing, Yesus sawada hmpah murid-murid-Ne "Kumpul kawan puting-puting sa tasisa nampan bakoi oeng sa ta umpe." ¹³ Ket iro, kawan murid ngumpulne dan ngisi dua walas karanyang anri puting-puting teke dimo rute lole sa natanan reo sa luput kuman. ¹⁴ Hantek ulun-ulun iro nginte tanda ajaib sa na ulah Yesus, reo sawada,"Iyo itu pasti Nabi sa na janyi akan hawi pah dunia. ¹⁵ Ket kotoe bahwa ulun wahai iro baransana hawi dan mamaksa Iyo jari Raja bawo reo, Yesus nyingkir kia pah wungkur raerai. Yesus Malan gi Bawo Ranu ¹⁶ Hantek onro haut mulai kamalom, kawan murid dolui nuju pah danau ¹⁷ dan ukah ngabai pah jukung, reo mulai nyabarang danau nuju Kapernaum. Onro haut mulai sirom, kode Yesus mete pada hawi nangkahong reo ¹⁸ Danau mulai bagalumang ket riwut sa bangat tama nyiwui. ¹⁹ Kamulek, hantek reo haut iwehei jukung sa oro sakitar 25 atawa 30 stadia, reo nginte Yesus malan gi bawo danau dan nynrupak jukung sehingga reo takut ²⁰ Kode, Yesus sawada hmpah reo, "itu Uki,ada takut!" ²¹ Ukah iro reo hamen ngampabai Iyo pah huang jukung dan tiba-tiba jukung iro haut hampe pah duoi sa reo tuju. Ulun wahai ngeto Yesus ²² Pah onro pitaninne, ulun wahai magun sokonrong gi ipai danau nginte bahwa bakoi oeng jukung lain gi yiiro kasawali erai jukung ae sa murid-murid haut masuk pah huangne. Kode, Yesus bakoi baya masuk pah huang jukung iro sameh anri kawan murid-Ne sa haut tulak raerai. ²³ Hawileh jukung-jukung lain teke Tiberias pah rupak duoi ulun-ulun iro kuman rute, ukah Tuhan ngontuh syukur. ²⁴ Hantek ulun wahai nginte bahwa Yesus dan kawan murid-Ne bakoi oeng kia gi yiro, reo ngabai pah jukung-jukung iro dan tulak pah Kapernaum pakai ngeto Yesus. Yesus adalah Roh wolum ²⁵ Tawuk ulun wahai iro kahong Yesus gi ipai danau, reo nunti hmpah Iyo, "Rabi, hentek hawe Iko tiba gi yiitu ²⁶ Yesus nuing reo dan sawada, "Sabujurne, Uki sawada hmpah iko, iko ngeto Uki bakoi iko haut nginte tanda ajaib,melainkan iko haut kuman rute hampe wosing. ²⁷ Ada bagawi pakai ngeto pongokan sa tau binasa, melainkan pakai pongokan sa iuh batahan hampe wolum sa kekal, sa Pea Murunsia akan unru hmpahiko ket hmpah pea Murunsia iro, Uma, yoiro Allah haut ngunru pengesahan-Ne ²⁸ Balalu, ulun wahai iro nunti hmpah Yesus, "Inun sa harus kain ulah nampan kain ngwi gawian sa na kabahomen Allah?" ²⁹ Yesus nuing dan sawada hmpah reo, "Ituleh gawian sa nakasien Allah: percayaleh hmpah Iyo sa haut na utus Allah." ³⁰ Reo nuntine hmpah-Iyo, " Amun miiro tanda ajaib inunkah sa akan Iko ulah nampan kain nginte dan percaya hmpah-Iko?Gawian inun sa Iko ulah? ³¹ Nenek moyang kain kuman manna gi jubut hukot, kakala satatulis,'Iyo ngunru reo rute teke surga pakai na okan.''' ³² Yesus sawada hmpah reo, "Sabujurne, Uki sawada hmpah iko bakoi Musa sa ngunru iko rute teke surga melainkan Uma-Kuleh sa ngunru iko rute sa sejati teke surga. ³³ Sabab, Rute teke Allah adalah Io sa dolui teke surga dan ngunru wolum hmpah dunia." ³⁴ Reo sawada hmpah-Iyo," Tuhan, unruleh kain rute iro senantiasa." ³⁵ Wada Yesus hmpah reo, "Ukileh rute wolum; ulun sa hawi hmpah-Uki bakoi akan kalau kia, dan ulun sa percaya hmpah-Uki bakoi akan malah kia. ³⁶ Kode, Uki haut nyawada hmpahikobahwa sekalipun iko haut nginte Uki,iko tatap bakoi percaya. ³⁷ Kahai sa naunru Uma hmpah-Uki akan hawi hmpah-Uki, dan sa hawi hmpah-Uki bakoi akan Uki unur. ³⁸ Sabab, Uki dolui teke surga bakoi pakai ngulah kabahomen-Ku raerai, melainkan kabahomen Iyo sa ngutus Uki. ³⁹ Dan, ituleh kabahomen Iyo sa ngutus Uki: nampan kahai sa haut naunru-Ne hmpah-Ki iro bakoi oeng sa jawoh, kode Uki bangkitkan gi akhir zaman. ⁴⁰ Sabab, ituleh kabahomen Uma-Ki, bahwa satiap ulun sa nginte Pea dan percaya hmpah-Iyo kaiuh wolum kekal,dan Uki akan membangkitkan iyo gi akhir zaman." ⁴¹ Ket iro, papire ulun Yahudi mulai ngarunyuut neo Iyo ket io sawada,"Ukileh rute sa dolui teke surga iro." ⁴² Reo sawada,"Bakoikah Iyo itu Yesus, pea Yusuf, sa uma dan umane takam kenal? Nakolo mungkin Io iuh sawada, ' Uki haut dolui teke surga?'" ⁴³ Yesus nuig reo dan sawada, "Ada ngrunyuut gi padang ikam raerai ⁴⁴ Koi erang kaulun pun iuh hawi hmpah-Ki kasawali Uma sa ngutus Uki narikne, dan Uki akan membangkitkanne, gi akhir zaman. ⁴⁵ naan ta tulis huang kita kawan nabi: 'Dan, reo kahai naajar ulah Allah.'Satiap ulun sa haut nyonrongoi dan pahajar teke Uma akan hawi hmpah-Ki ⁴⁶ Haj irobakoi baarati naan ulun sa haut suah nginte Uma, kasawali Iyo sa hawi teke Allah; Iyoleh sa haut nginte Uma. ⁴⁷ Uki sawada hmpahiko, 'Sabujurne, satiap ulun sa percaya ngompun wolum kekal,' ⁴⁸ Ukileh rote wolum. ⁴⁹ Nenek moyangko haut kuman manna gi jubut hukot, kode reo mate. ⁵⁰ Ituleh rite dolui teke surga, nampan ulun ngokanne dan bakoi mate. ⁵¹ Ukileh rote wolum iro sa haut dolui teke surga. Jakaulunkuman rute itu io akan wolum sa uhangne; dan rute sa akan Kiunru demi pamolum dunia iro adalah tubuh-Ki." ⁵² Ulun-ulun Yahudi mulai badebat erai sameh lain, reo sawada, "Nakolo tau Ulun itu ngunru tubuh-Ne pakai na okan?" ⁵³ Yesus sawada hmpah reo,"Uki sawada hmpah iko, sabujurne jaka iko bakoi kuman tubuh Pea Murunsia dan minum raya-Ne, iko bakoi ngompun wolum gi huang tonga ko. ⁵⁴ Satiap ulun sa kuman daging-Ku dan minum raya-Ku ngumpun wolum kekal, dan Uki akan mebangkitkan iyo giakhir zaman. ⁵⁵ Sabab. daging-Ku adalah pongokan sa sejati dan raya-Ku adalah minuman sa sejati. ⁵⁶ Hie sa kuman daging-Ku dan minum raya-Ku duloi gi huang Uki dan Uki gi huang iyo. ⁵⁷ Kakala Uma sa wolum ngutus Uki, dan Uki wolum ulah ket Uma, mihie pada io sa ngokan Uki, iyo akan wolum ket Uki. ⁵⁸ Ituleh rute sa dolui teke surga, bakoi rute kakala sa haut na okan nenek mayangko dan reo mate, ulun sa kuman rute itu akan wolum sa uhang-uhang ne." ⁵⁹ Yesus nywada kahaine itu gi Kapernaum hantek iro ngajar gi Sinagoge wahai panotah nanan Yesus ⁶⁰ Hantek wahai teke murid-murid nynrongoi hal itu, reo sawada, "Ajaran itu kajut karas. Hie sa sanggup narimene?" ⁶¹ Ket kotoe bahwa kawan ponotah-Ne ngarunyuut neo hal iro, Yesus sawada hmpah reo, "Inunkah papaneran-Ku itu ngulah tasinggung? ⁶² Amun miiro nakolo jaka iko nginte Pea murunsia ngabai kamulek pah duoi asal-Ne? ⁶³ roh Allah sa ngunru wolum, sadang daging bakoi baguna sama sekali. papaneran-papaneran sa Kuwada hmpah iko adalah roh dan waolum. ⁶⁴ Kode naan papire gi helang iko sa bakoi percaya." Sabab teke awal Yeaua kotoe hie sa bakoi percaya dan hie sa akan menghianati Iyo. ⁶⁵ Yesus sawada "iroleh sababne Uki nyawada hmpahikobahwa koi erang kaulun pun iuh hawi hmpah-ku, kasawali hal iro na karuniakan hmpahiyo ulah Uma." ⁶⁶ Teke hantek iro, wahai ponotah-Ne mengundur kan diei dan taduh notah Iyo. ⁶⁷ Ket iro Yesus sawada hmpah kadua walas murid-Ne, " Inunkah iko sidi tulak?" ⁶⁸ Simon Petrus nuing Iyo, "Tuhan, hmpah hiekah kain akan tulak? Iko sa ngompun papaneran pamolum kekal. ⁶⁹ Kain haut percaya dan mengenal Iko,bahwa Ikoleh sa Kudus teke Allah." ⁷⁰ Yesus nuing reo,"Bakoikah Uki raerai sa meli ikam, dua walas ka ulun itu? Biar mihie, salahsatu teke ikam adalah setan." ⁷¹ Sa Io maksud adalah Yudas, dan Simon Iskariot,sabab Yudas adalah salah satu teke ka dua walas murid iro, kode io akan menghianati Yesus.