¹ Naan renakaulun Farisi bangaran Nikodemus. Io adalah erangkaulun pemimpin bangsa Yahudi ² Hantek kamalom, io hawi hmpah Yesus dan sawada, " Rabi, kain kotoe bahwa Iko adalah Guru sa hawi teke Allah ket bakoi oeng erangkaulun pun sa iuh ngulah tanda-tanda ajaipsa Iko ulah, kasawali Allah naan bayaiyo.'' ³ Tuing Yesus hmpahiyo, ''Sabujur-bujurne Uki sawada hmpah iko, jaka erangkaulun bakoi na kayaan kamulek, oi bakoi iuh nginte Kerajaan Allah.'' ⁴ Nikodemus nunti, ''Nakolo mungkin erangkaulun iuhna kayaan kamulek amun io haut mutuo? Iuhkah io masuk kia pah huang rahim inene dan nakayaan kamulek?'' ⁵ Tuing Yesus hmpahiyo, Uki sabujurne, Uki sawada hmpahiko, jaka erangkaulun na kayaan teke ranu dan Roh, io bakoi iuh masuk pah huang Kerajaan Allah ⁶ Inun sa na kayaan teke daging adalah daging dan inun sa na kayaan teke Roh adalah roh. ⁷ Ada leh heran ket Uki sawada hmpah iko' iko harus na kayaan kamulek.' ⁸ Riwut nyiwui pah hawe pun io hokun dan iko nyonrongoi lenganne, kode iko bakoi kotoe teke hawe asalne dan pah hawe io akan tulak. Miiro pada anri satia ulun sa na kayaan teke Roh.'' ⁹ Nikodemus nunti, ''Nakolo mungkin kahai hal iro terjadi?'' ¹⁰ Yesus nuing Bakoi kah iko guruulun Israel, kode iko bakoi kataru kahai hal itu? ¹¹ sabujur-bujurne, uki nyawada hmpahiko bahwa kain bapaner neo inun sa kain kontoe dan ngunru kasaksian neo inun sa kain ite, kode iko bakoi narime kasaksian kain. ¹² bara paiko neo hal-hal duniawi ae iko bakoi percaya, nakolo mungkin io akan percaya amun Uki bara paiko neo hal-hal surgawi? ¹³ Bakoi erangkaulun pun suah ngabai pah surga, kasawali Iyo sa haut dolui teke surga, iyoiro Pea Murunsia. ¹⁴ Sameh kakala Musa ngampabai nipo tambaga gi jubut hukot, mihie pada Pea Murunsia harus na tongkobo ¹⁵ nampan satiap ulun sa percaya hmpah-Iyo kajuat wolum sa kekal. ¹⁶ Ket Allah bangat ngalelu dunia itu Io ngunru Pea-Ne sa tungkan nampan satiap ulun sa percaya hmpah-Iyo bakoi binasa, melainkan kajuat wolum sa kekal. ¹⁷ Ket Allah ngutus Pea-Ne pah huang dunia bakoi pakai mahakimi dunia, melainkan nampan dunia na salamat metah Pea-Ne ¹⁸ Ulun sa percaya hmpah-Iyo bakoi akan nahukum, kode ulun sa bakoi percaya haut naan gi pida hukuman ket io bakoi percaya pah ngaran Pea Tungkan Allah. ¹⁹ Ituleh hukuman iro: maihaut hawi pah huang dunia, kode murunsia lewi sidi pisirom teke mai ket inun sa reo ulah adalah jahat. ²⁰ Ket satiap ulun sa ngulah jaha muar mai dan bakoi hawi pada hmpah mai iro nampan ulahan-ulahanne bakoi na ungkit-ungkit. ²¹ Kode, ulun sangulah kebenaran hawi hmpah mai iro nampan nanyatakan ulahan-ulahanneiro naulahne gi huang Allah.'' Yohanes Basaksi neo Yesus ²² Ukah iro, Yesus dan kawan murid-Ne tulak pah tana Yudea. Gi raha, Io nangkawis waktu baya reo dan mambptis. ²³ Yohanes pada membabtis gi Aimon rupak Salim ket naan wahai ranu giraha. Ulun-ulun bahawian dan nabaptis ²⁴ Tawuk iro Yohanes mete na tamasuk pah huang penjara. ²⁵ Dan, timulleh perdebatan helang papire murid Yohanes dan erangkaulun Yahudi mengenai penyucian. ²⁶ Reo nangkahong Yohanes dan sawada, ''Guru, Ulun sa baya iko gi ipai Yordan, sa neo Iyo iko haut basaksi, iteleh, Iyo pada mambaptis dan kahai ulun hawi hmpah-Iyo.'' ²⁷ Yohanes nuing, ''Murunsia bakoi iuh narime inun pun kasawali hal iro na unru hmpah io teke surga. ²⁸ Iko raerai iuh ngunru kasaksian bahwa uki suah sawada Uki bakoi Mesias,' kode uki na utus pakai nampono-Iyo. ²⁹ Ulun sa ngompun mempelai wawe adalah mempelai upo kode sahabat mempelai upo, sa sokonrong dan nyonrongoine, bangat baarai nyonrongoi lengan mempelai upo. Jari, kaaraien ku itu haut nasanyri ponu ³⁰ Iyo harus magin idu dan uki harus magin odik.'' ³¹ ''Io sa hawi teke obo adalah gi obo kahaine, Io sa baasal teke tana adalah teke tana dan bapaner neo hal-hal sa naan gi tana. Io sa hawi teke surga adalah gi bawo segala sesuatu. ³² Io ngunru kasaksian neo inu sa naite dan na rongoi-Ne kode ulun-ulun bakoi narime kasaksian-Ne ³³ Ulun sa narime kasaksian-Ne ngakui anri kapinuu bahwa Allah iro bujur. ³⁴ Sabab, ulun sa na utus Allah akan nahampe papaneran Allah ket Allah ngunru Roh sa bakoi tabatas. ³⁵ Uma ngalelu Pea dan haut manyarah segala sesuatu pah huang longon-Ne ³⁶ Ulun sa percaya hmpah Pea ngompun wolum sa kekal, kode ulun sa bakoi menaati Pea bakoi akan nginte pamolum melainkan murka Allah tatap naan giiyo.''