¹ Naan erang kaulun upo sa rahat sakit ngaranne Lasarus teke Betenia, tumpuk Maria dan pulaksanai wawene, Maria. ² Maria ituleh wawe sa suah maminyaki poo Yesus anri minyak wangi dan muhut ne anri wulune, sa pulaksanai upone, Lasarushantek iro sakit. ³ Sabab iro, karuo pulaksanai itu ngirim kabar hpah-iyo sa sawada, "Tuhan, ulun sa Iko kalelu rahat sakit." ⁴ Kode, hantek Yesus nynrongoi kabar iro, Io sawada, "Panyakit iro bakoi sagar tau ngulah pampate kode sagar menyatakan kemuliaan Allah nampan Pea Allah na muliakan metahiyo." ⁵ Yesus memang ngalelu Marta, dan pulaksanai wawene, dan Lasarus. ⁶ Jari hantek Yesus nyonromgoi bahwa Lasaru sakit, Io sangaja duloi ruo onro kia gi duoi Io duloi. ⁷ Ukahiro Yesus sawada hmpah murid-murid-Ne, "Hayu takam tulak kia pah Yudea." ⁸ Kawan murid sawada hmpah-Iyo, "Guru ulun-ulun Yahudi mete uhng itu bausaha medak Iko anri watu, inunkah Iko tatap sagar pah raha kia?" ⁹ Yesus nuing, "Bakoikah naan 12 jam huang erang onro? Jaka naan ulun malan koonro, io bakoi kqatapian ket io nginte mai dunia. ¹⁰ Kode, jaka ulun malan koonro, io katapian ket mai iro bakoi oeng giiyo." ¹¹ Ukah Yesus sawada mihie, Io sawada hmpah reo, "Iyang takam, Lasarus, haut surui, kode Uki sagar tulak pakai ngabuan iyo." ¹² Murid-murid-Ne, sawada hmpah-Iyo, "Tuhan,jaka io haut surui io sagar ware." ¹³ Yesus sabujurne bapaner neo pampate Lasarus, kode murid-murid ngakira Iyo bapaner neo surui huang aratine istirahat. ¹⁴ Ket iro,Yesus kamulek sawada anri terus terang hmpah reo, "Lasarus haut mate, ¹⁵ 5 dan Uki sanang demi kepentinganko Uki bakoi oeng gi raha nampan iko tau harap. Jari hayu takam hmpahiyo." ¹⁶ Kamulek Tomas sa na ontuh Didimus, sawada hmpah murid-murid sa lain, "hayu takam pada tulak nampan takam iuh mate baya-Iyo." ¹⁷ Hantek Yesus tiba, Io kahaba Lasarus haut naan gi huang polowong sa uhang opat onro. ¹⁸ naan pun Betenia ta impeh lima walas stdia orone teke Yerusalem. ¹⁹ Wahai ulun Yahudi haut hawi nangkahong Maria dan Marta, pakai ngarariu reo bakaitan anri pulaksanaine iro. ²⁰ Hantek nynrongoi bahwa Yesus haut hawi, Marta tulak dan nyamut-Ne, kode Marta tatap duloi gi lowu. ²¹ Marta sawada hmpah Yesus, "Tuhan seandaine Iko naan gi yiitu, pulaksanaiku pasti bakoi sagar mate. ²² Kode, tataha itu uki kotoe bahwa inun pun sa Iko laku teke Allah, Allah sagar ngunrune hmpah-Iko.' ²³ Yesus sawada hmpahiyo, "Pulaksanaimo sagar bangkit." ²⁴ Marta nuing Iyo, " Uki kotoe sagar bangkit gi onro kebangkitan gi akhir zaman." ²⁵ Yesus sawada hmpahiyo. "Ukileh kebangkitan dan pamolum; hie pun sa harap hmpah-Uki io sagar wolum walau pun io haut mate, ²⁶ dansatiap sa wolum dan harap hmpah-Uki bakoi sagar mate. Inunkah iko harap pah hal itu?" ²⁷ Marta sawada hmpah-Iyo, "Yo Tuhan, uki harap bahwa Ikoleh Kristus, Pea Allah, sa hawi pah dunia. "Yesus Onsoyar ²⁸ Ukah nyawada hal iro, Marta tulak mowa Maria, pulaksanaine dan sawada secara pribadi, "Gurunaan gi yiitu dan Io mowaiko." ²⁹ Nyonrongoi hal iro Maria batareje soknrong dan nangkahong Yesus. ³⁰ Hantek iro, Yesus mete hampe pah desa iro, kode magon gi duoi Marta nangkahong-Iyo. ³¹ Ulun-ulun Yahudi sa baya Maria gi lowu iro,sa rahat ngarariu iyo, nginte Maria batareje bangkit dan tlak pah luar; reo notah iyo ket ngakira io sagar tulak pah lowong pakai onsoyar gi raha. ³² Hantek Maria hampe pah duoi Yesus duloi, io nginte Yesus ilansar gi poo-Ne palus sawada hmpah-Iyo, "Tuhan, seandaine Iko naan gi yiitu tawuk iro, pulaksanaiku bakoi sagar mate." ³³ Hantek Yesus nginte Maria onsoyar, dan ulun-ulun Yahudi sa bayaiyo pada baya onsoyar, nynrongoi Yesus huang Roh dan tamam tagangu. ³⁴ Yesus nuntine Gi hawe Lasarus iko lowong? Reo nuing Iyo, "Tuhan, hayu baya iteleh." ³⁵ Yesus pun onsoyar. ³⁶ Maka, ulun-ulun Yahudi sawada, "Iteleh! Miiro Io tamam ngalelu Lasarus! ³⁷ Kode papire kaulun gi helang reo sawada, "Bakoi taukah Io sa haut ngugah mato ulun pehe itu pada ngulah Lasarus bakoi mate?" Lasarus na bangkitkan teke pampate ³⁸ Yesus, sa hinra kia mengerang huang tonga-Ne, tulak pah polowong. Polowong iro adalah erang kaua gua dan erang kaua watu na impeh nutupne. ³⁹ Yesus sawada, "Geser watu iro! Marta pulaksanai ulun nanan iro,sawada hmpah-Iyo, "Tuhan, tataha pasti naan ewo layun ket iyo haut nanan sauhang opat onro." ( 4 hari.) ⁴⁰ Yesus nuing iyo, "Bakoikah uki haut nyawada hmpahiko bahwa jaka iko harap, iko sagar nginte kemuliaan Allah?" ⁴¹ Jari, reo ngengkat watu iro. kamulek, Yesus mihangut dan sawada, "Uma Uki basyukur hmpah-Iko ket Iko haut nyonrongoi Uki. ⁴² Uki kotoe bahwa Iko saratang nyonrongoi Uki, kode ket ulun-ulun sa sokonrong ngaliling-Uki, Uki nyawada hal iro nampan reo harap bahwa Ikoleh sa haut ngutus Uki." ⁴³ Ukah nyawada iro, Yesus nyawada anri lengan royoh, Lasarus, kaluarleh! ⁴⁴ Ulun sa haut mate iro kaluar, longon dan poo ne magon tasuruk kafan, dan waene magon tatutup kai kafan. Yesus sawada hmpah reo, "Lqapaqs kain-kain iro tekeiyo dan ikeh io tulak!" Rancana pakai munu Yesus ⁴⁵ Ulun-ulun Yahudi sa hawi dilang Maria, dan nginte inun sa Yesus ulah, palus harap hmpah-Iyo ⁴⁶ Kode papire teke reo dilang ulun-ulun Farisi dan bara reo inun sa haut na ulah Yesus. ⁴⁷ Maka, imam-imam kapala dan ulun -ulun Farisi nyawada pertemuan Sanhedrin dan sawada, Inun sa sagar takam ulah! Sabab, Ulun itu ngulah wahai tanda ajaib. ⁴⁸ Jaka takam ngaret Iyo tarus ialah itu,kahai ulun sagar harap hmpah-Iyo dan ulun-ulun Roma sagar hawi nanrampas duoi itu dan bangsa takam." ⁴⁹ Kode, erang kaulun teke reo baya Kayafas, sa jari imam idu gi taun iro, sawada hmpah reo, "Ikam bakoi kotoe inun-inun, ⁵⁰ atawa mempertimbangkan bahwa lewi maasus erangkaulun mate pakai kahai bangsa teke kahai bangsa binasa." ⁵¹ Io bakoi nyawada ne teke tongane raerai, kode sebagai imam Idu taun itu, io bernubuat bahwa Yesus sagar mate pakai bangsa iro. ⁵² Dan bakoi ekat pakai bangsa Yahudi ai, melainkan pada pakai ngumpul jari erai pea-pea Allah sa taidu. ⁵³ Maka teke onro iro,reo sapakat pakai munu Yesus. ⁵⁴ Ket iro, Yesus bakoi kia malan secara tarang-tarangan gi helang ulun Yahudi, kode Io tulak teke raha pah wilayah rupak jubut hukot pah erang kaua kota ba ngaran Efraim; dan Io duloi bi raha baya murid-murid-Ne. ⁵⁵ Hantek iro, Paskah ulun Yahudi haut rupak, dan wahai ulun teke wilayah iro tulak pah Yerusalem samete Paskah pakai menyucikan tonga reo. ⁵⁶ Balalu, reo ngeto Yesus dan bapaner erai hmpah sa lain sementara reo sokonrong gi huang bait Allah, reo saling ipanunti, "Nakolo manurutko? Inunkah Io sama sekali bakoi sagar hawi pah perayaan itu!" ⁵⁷ Naan pun imam-imam kapala dan ulun-ulun Farisi haut ngaluar parentah bahwa jaka erangkaulun kotoe gi hawe Io duloi, ulun iro harus malaporne nampan reo kaiuh nyama-Ne.