¹ Paulus, erangka ulun rasul Yesus Kristus sesuai kabahomen Allah, dan Timotius pulaksanai takam, ² hmpah ulun-ulun harap baya pulaksanai-pulaksanai erai iman gi huang Kristus sa duloi gi Kolose. Kirane anugerah nyinrah iko, dan damai sejahtera teke Allah Uma takam. ³ Kain ba syukur hmpah Allah tala Uma teke Tuhan takam Yesus Kristus, baya kain saratang tekun ba doa pakai ko. ⁴ Kain haut nyonrongoi ne'o imanko huang Kristus Yesus dan ne'o ahi lelu sa iko miliki tahadap kahai sa oro teke Allah. ⁵ Iko memiliki ahi lelu itu ket kahrapen teguh sa na sadia pah iko gi surga. Iko nyonrongoi ne'o kaharapen teguh itu sa metene huang firman kabujuren, yoiro Injil, ⁶ sa haut hawi hmpah iko. Injil ituba ua palus tumu gi kahai dunia. Itu terjadi huang tonga ko pada mulai gi onro iko nyonrongoine ne'o anugerah Allah gi huang kabujuren. ⁷ itu adalah Injil sa haut pelajari teke Epafras, iang palayanan takam sa nakalelu, sa adalah erangka ulun hamba sa setia teke Kristus sebagai wakil kain. ⁸ Epafras haut ngulah kain memahami ahi lelu ko gi huang Roh. ⁹ Ket ahi lelu nyonrongoine kain bakoi suah mihinroi ba doa pakai ikam. Kain tarus ilaku nampan kain na tamponu anri pangantoean pah kabahomen-Ne huang kahai hikmat baya pemahaman sa uah. ¹⁰ Kain tarus ba doa nampanikam kaiuh malan sa layak kia pah Tuhan anri sara mengenan kan. Kain tarus badoa nampan ikam baua huang setiap perbuatan maasus bulu nampan iko tumu huang pangantoean pah Allah tala. ¹¹ Kain badoa nampan iko na ampikuat huang kahai kemampuan manurut kuasa kemuliaanNe huang ketekunan dan kasabaren. ¹² Kain badoa nampan iko anri kaaraien basyukur hmpah Uma,sa haut ngulah iko mampu pakai ngepo bagian sebagai ahli waris teke ulun-ulun harapgi huang mai. ¹³ Io haut nyalamat takam teke kuasa pisirom dan mindah takam pah huang Kerajaan PutraNe na kalelu. ¹⁴ Huang putraNe takam kaiuh panowuhan, sebagai pengampunan dosa. ¹⁵ Sebagai putra, Io adalah gamaran teke Allah sa bakoi ite. Io adalah sa pertama teke segala hal ciptaan. ¹⁶ Ket ulahNe kahai hal na cipta,maasus sa gi surga dan gi tana, sa ta ite baya sa bakoi ta ite. Baik Kerajaan atawa pemerintahan atawa kekuasaan, kahai hal na cipta ulahNe baya pakaiNe. ¹⁷ Io haut naan sa mete kahaine, danhuangNe kahai hal na kuasaiNe. ¹⁸ Io adalah ulok teke tonga, yoiro jemaat. Io adalah sa permulaan dan sa pertama teke padang ulun mate, hampe Io ngepo posisi pertama gi padang segalane. ¹⁹ Ket Allah berkenan nampan kahai kaponuanNe wolum gi huangNe, ²⁰ dan ngampidamai segalane pakai tongaNe metah putraNe. Allah ngulah perdamaian anri kahaine metah rayaNe gi kayu balasangar. Allah mendamaikan sesuatu anri tongaNe, maasus segala hal sa naan gi tana maupun gi surga. ²¹ Dan iko pada, gi tawuk iro, adalah ulun-ulun asing bagi Allah, dan merupakan musuhNe huang pikiran baya huang perbuatan-perbuatan jahatko. ²² Kode tataha Io haut ngampidamai ikam anri tongaNe metah pampate. Io ngulah itu nampan tongako barasis,koi bercela dan berkenan gi hadapanNe, ²³ amun iko tarus duloi huang iman, tatap teguh dan kuat, bakoi goyah teke pengharapan sa kuat pah injil sa haut iko rongoi sa na bara hmpah setiap ulun sa na cipta gi pida langit. itu adalah injil sa, uki, Paulus, jari erangka ulun hamba. ²⁴ Tataha uki baarai huang penderitaan demi iko. Dan uki na tamponu huang dagingku inun sa kurang huang pangataruen pah Kristus demi tongaNe, yoiro jemaat. ²⁵ Teke jemaat ituleh uki erangka ulun hamba, sa Allah unru bagiku hmpah iko, pakai namponu Firman Allah. ²⁶ Itu adalah kabujuren rahasia sa ta dina sa uhang baabad-abad dan selama turun temurun. Kode tataha haut na singkap pah reo sa harap hmpahIyo. ²⁷ Bagi reoleh Allah sidi bara katatauen teke kemuliaankabujuren rahasia itu gi padang ulun-ulun bakoi Yahudi. Yoiro ket Kristus naan gi huang ikam, kahai keyakinan pah kemuliaan sa sagar hawi. ²⁸ Ituleh Io sa kain beritakan. Kain ngampiitung setiap ulun,dan kain ngajar setiap ulunanri kahai hikmat,hampe kain ngoit setiap ulun secara utuh gi huang Kristus. ²⁹ Pakai ituleh uki bagawi karas palus bajuang sesuai anri kakuatenNe sa bagawi gi huang kuanri segala kuasa.