¹ Saulus terus muat ancaman yak ngumes murid-murid Tuhan, ngadap Imam Besar. ² Lalu mai suret teng iyek nyah sinagoge-sinagoge ka Damsyik. Sumpama iyek tadi berjumpa na neng percaya ka jarant ngen, bait narai ato nana, iyek tadi mebet'n belaye'k nyah timbelenggu ka Yerusalem. ³ Waktu iyek mayan makin jeket ngan Damsyik, ndadak adek sinar teng ringit mancar ngan berputar-putar. ⁴ Iyek sungkap ka tanah lalu ndingah suara neng muah ka iyek, wana, "Saulus, Saulus, ngani ko ngenaya Ken?" ⁵ Saulus nyaut, "Asi ko ngen Tuan? Lalu iyek tadi nyaut, "Ken hak Yesus, neng kunak dako kenaya. ⁶ Cuma ken angket lalu meyeh ka kota, lalu adek na muah ka ko, ani neng harus dako muat'n. ⁷ Belana neng mayan ngan Saulus tagetn iyek bisa bermeo ndingah suara ngen tapi ayek tinget asi-asi na ngen. ⁸ Saulus tagetn teng tanah, betek iyek ncalak tapi ayek ninget ani-ani. Belana mapah ngan baring lalu mebet'n ka Damsyik. ⁹ Dah taru ari, Saulus ojo ninget, ojo uman ngan minum. ¹⁰ Waktu ngen, adek murid ka Damsyik beginan Ananias. Jubata berpuah ka iyek lewat peninget neng khusus. "Ananias !". Ananias nyaut," Hak ken Jubata". ¹¹ Lalu Jubata muah ka iyek," Tagetn lalu mayanlah ko ka jarant neng bujur, ka dio Yudas, ko ngajo na Tarsus neng beginan Saulus. Coba tinget, na ngen agik berdoa. ¹² Adek ka peninget iyek bahwa na neng beginan Ananias iteng lalu napok baring ka tumung iyek supaya panai ninget agik. ¹³ Tapi Ananias nyaut, "Jubata, ken dudah dingah teng belana neng udah, tentang kudah kejahatan iyek ka umat neng kudus ka Yerusalem. ¹⁴ Ka hak iyek adek kuasa teng imam-imam kepala nyah mbelenggu berabis na neng nyaruk ginan Kem". ¹⁵ Lalu Jubata muah ka belaye'k, " Bo lah kerna belana hak dudah ken mulik nyah mebet'n ginan ken ka adap Raja-raja ngan bangsa Israel. ¹⁶ Ken yak nyulak ka iyek kudah ni iyek arus sengsara nyah ginan-Ken". ¹⁷ Ananias berangket lalu meyeh ka diyo ngen, napok baring ka tumung Saulus, iyek lalu muah, " Sadara Saulus, Tuhan Yesus neng nyulak dadep ka ko waktu mayan ka hak, iyek ngutus ken biar ko taman ninget agik ngan penok kunak Roh Kudus. ¹⁸ Lalu waktu ngen, laba jiji sisik-sisik ikan kinah teng be'tek lalu iyek taman ninget agik. Iyek angket lalu kunak baptis. ¹⁹ Dudah uman, Saulus kunak na nguat. Iyek ngan murid-murid diam ka Damsyik sampe kida-kida ari. ²⁰ Lalu iyek nyebar berita Yesus ka sinagoge-sinagoge lalu muah, "Yesus ngen Anak Allah". ²¹ Berabis na neng dingah kepanggah lalu muah, " Iyek hak neng adek ka Yerusalem ngumes na neng metek ginan ngen dah iteng ka hak ngan maksud mebet'n belaye'k ngan bekebet ka adap imam-imam kepala. ²² Tapi Saulus jiji makin kuat, ngan muat mentek belana Yahudi neng diam ka Damsyik, mikat'n bukti bahwa Yesus ngen Kristus. ²³ Dah genap ari, belana Yahudi sekongkol berudah yak ngumes Saulus. ²⁴ Sekongkol belaye'k ngen aboh naman Saulus. Belaye'k ngawas lawang gerbang nyawak ngarep yak ngumes Saulus ngen. ²⁵ Cuma, murid-murid Saulus mebet'n iyek waktu ngarep lalu mebet'n iyek disah lewat turat ngan cara ngulur iyek ka panak meyeh ka diyeb keranjang. ²⁶ Waktu Saulus iteng ka Yerusalem, iyek bergabung ngan para murid. Cuma belaye'k bot ka iyek kerna iyek percaya bahwa iyek ngen seorang murid. ²⁷ Tapi Barnabas nigeng bareng Saulus lalu mebet'n iyek ka para rasul, bekisah ka belaye'k kuna iyek ninget Jubata waktu ka jarant, Jubata muah ka iyek kuna iyek ngan berani dah muah ka diyeb ginan Yesus ka Damsyik. ²⁸ Saulus ngan belaye'k neng udah keluwei meyeh ka Yerusalem sambil muah ngan berani metek ginan Jubata. ²⁹ Belaye'k berjereh ngan na Helenis, lalu berusaha yak ngumes. ³⁰ Dingan-dingan seiman neng naman hal hak, belaye'k mebet'n iyek di sah ka Kaisarea lalu ngutus iyek ka Tarsus. ³¹ Kerna jemaat ka Yudea, Galilea ngan Samaria ngaik damai lalu berudip, ngan udip bot ka Jubata ka diyeb penghiburan Roh Kudus, lalu bertamah udah. ³² Waktu Petrus mutar ka daerah ngen, iyek ngulek belana neng kudus berdiam ka Lida. ³³ Ka ngen, iyek njumpa na neng beginan Eneas, dah tegel guring lapan sawak ka kapu bes kerna lumpuh. ³⁴ Petrus metek ka iyek, " Eneas, Kristus Yesus ngkado ko sampe bait. Angketlah ko lalu tinjana kapu bes ko. Rancak Eneas angket. ³⁵ Berabis na neng diam ka Lida ngan Saron ninget lalu belaye'k malik ka Jubata. ³⁶ Waktu ngen ka Yope, adek murid nana neng beginan Tabita, neng berarti Dorkas. Iyek pedet berbuat bait ngan pedet bersedekah. ³⁷ Pada waktu ngen, adek na sakit lalu kubes. Pas belana dudah ntanik, belaye'k ngguring iyek ka ruang atu. ³⁸ Kerna Lida jeket ngan Yope, ndingah bahwa Petrus adek ka ngen, para murid ngutus na beduek, mai ka Petrus, " Usah dako nunda bo teng badah kanak". ³⁹ Petrus angket lalu mayan ngan belaye'k. Iteng ka ngen belaye'k mebet'n Petrus ka ruang atu. Berabis janda tagetn ka samping Petrus sambel mungsek lalu tintijuk tunik -tunik ngan kain-kain lain neng biasa Dorkas muat waktu iyek masih berjeket ngan belaye'k. ⁴⁰ Cuma Petrus madak berabis na keluwei, lalu berlutut ngan berdoa. Iyek ngalek bangkai Tabita lalu metek, " Tabita, angketlah ko !". Betek nana ngen ncalak, pas ninget Petrus iyek pun lalu ijuk. ⁴¹ Petrus ngulur baring ka iyek mbantu tagetn. Sambil nyaru belana neng kudus ngan para janda, iyek ntijuk bahwa Tabita masih udip. ⁴² Peristiwa ngen nyebar ka berabis Yope, lalu belana percaya ka Jubata. ⁴³ Petrus diam agak tegel ka Yope ngan narai neng beginan Simon, kerja iyek ngen nyamak kulit.