¹ Waktu ngen jumlah murid makin bertamah,adek keluhan teng belana Henelis ka belana Ibrani asli, kerna janda-janda belaye'k kunak ngabai ka pelayanan uman tiap ari. ² Lalu keduekbeles Rasul nyaru berabis nak murid lalu muah, "Ayek benei kanak ngabai firman Tuhan nyah nglayan meja. ³ Kerna ngen, dingan-dingan, dako mulik na berijok teng rombong neng terbukti bait, penok ngan Roh Kudus neng hikmat, kerna kanak yak ngangket nyah tugas hak. ⁴ Kanak yak bertekun ka doa ngan ka diyeb pelayanan firman. ⁵ Pernyataan ngen muat ate berabis belana awan. Belaye'k mulik Stefanus, na neng penok iman ngan Roh Kudus, Filipus, Prokhorus, Nikanor, Timon, Parmenas ngan Nikolaus, na proselit teng Anthiokia. ⁶ Belaye'k kunak mebet'n ka adap Para Rasul, dudah bedoa Para Rasul napok baring belaye'k ka atu belana berijok ngen. ⁷ Firman Allah namah nyebar ngan jumlah murid ka Yerusalem makin bertamah. Malah, nyekelompok ayuk imam jaji taat ka iman ngen. ⁸ Stefanus penok anugrah ngan kuasa, dah ngerja laba neng luar biasa ngan tanda-tanda aneh ka belaye'k neng berudah. ⁹ Cuma belana teng Sinagoge neng kuna metek na Libertini, bait belana teng Kirene ngan belana teng Aleksandria, ngan belaye'k teng Kilika ngan Asia, angket lalu berjereh ngan Stefanus. ¹⁰ Tapi belaye'k ayek mampu nyangkal kebijaksanaan ngan Roh neng berduek ngan Jubata, Stefanus metek. ¹¹ Ngan diam -diam belaye'k ngasut inyek dua orang madak muah," Kanak dudah ndingah na hak metek ngan ngkijet Musa ngan Allah. ¹² Lalu belaye'k nyorong ka na udah, na dama ngan ahli-ahli Taurat, lalu ngagak Stefanus, nakap, lalu mebet'n ka adap Sanhedrin. ¹³ Belaye'k mebet'n ka adap saksi-saksi palsu lalu metek, "Na hak iyek penah berenti ngucap kata-kata neng ngelawan badah kudus hak ngan Hukum Taurat. ¹⁴ Laba kanak dudah ndingah iyek ngen metek bahwa Yesus teng Nazaret yak ngancur badah hak ngan ngubah peratur adat neng dah kunak Musa waris ka kanak. ¹⁵ Lalu, pas ninget bas Stefanus, berabis belana neng ijuk ka diyeb Sanhedrin ninget bas Stefanus diji bas malaikat.