¹ She Juda, Jakobo tyvy, Hesukristo jokuerea ambypara kova kuatia opaiteva Ñanderu hẽno vekuare, hai haihuva haereka ñynatu'õ Hesukristo pevarã. ² Jyparekokue, pya haikavi'õ, haereka jyhaihukue tymẽ'ẽãvepe. ³ Shyryvyre ahaihuva, añehãã rãngatẽ ai ambyparape verã ñanymondo jepeva rehe heko kavivare mẽ'ẽhãshu vekua. ⁴ Shypya ambijetate ai, shara ĩmẽ'ẽ kova ñẽẽ opama kuaava pynymbytepe hãrã pynymbytavy. Haire hei Hesukristo ha'ẽã Ñanderu haereka Ñandeja, hãrã potambaa heiva jajaposhuva. ⁵ Pikuamatẽvã, aipotaĩ apyrỹmymãnduajy: Ñanderu Tumpa mondojepe Israelitavare Egipto hẽntaivi, haivi jyrojamba opa jyvarehahe. ⁶ Hãrã kyrãmba jehu jyve opaite arapy'õre Tumpa jokuevare, Ñanderu Tumpa mẽẽshu vekuare mbijicheva haereka hejava. Hai ñapinti ñonoshu kadenape haereka pyntuvape mboty ĩãrẽ, vãhẽ peve ara ñimbivachea verãpe. ⁷ Kyrãĩ iko jyvehe Sodoma haereka Gomorrape'iare, opaite tẽnta juri'iare hãrã iko jyre mbai porãmbape, haereka jajapotamba japo reta. Hãrã Ñanderu Tumpa jaheherã, tata ovemba'õpe mombakashu iko asy verã haipe. Kyrã koa mbai hejaha opaite ñanymanduahe verã. ⁸ Kyrãpo iko jyvehekui opaite heko kyava, shara hai potavaĩ hete potava myngyapy, mbijicheva Ñanderu Tumpa ñymbaikatu haereka arapy'õ Tumpa jokuevare ĩnjeta põrãmbahevare. ⁹ Miguel, Tumpa jokueva juhuvisha teiva kyrã japo jyve Âña ñyrãrõ hãndirã vẽkua, hekyshi verã Moise hetekue, tẽvã jaheãhe, koñeĩ heishu: "Ñanderu Tumpa jahepo ndyrehekui". ¹⁰ Tẽvã, kova kuaretare kuaambashua retaave ĩnjeta porãhe. Haire mymba rãĩmi iko jyre, opa mbai kuaa reta tẽvã kuãã retarã ha'eire jyvare ijehe. ¹¹ Pavetepo kuaretare! Kain rãĩmi jyre. Balaam rãĩmi kyrypoti pota retarã mbyry javy reta, haereka Coré rãĩmi ñẽẽ hẽnduãrã opa mano. ¹² Kova hai ñanymỹmymãrãva kuaretare jyraha jyrokyva jyhaihuha'õpe, karu vasu haereka ñymbyu reta mbaimba kuaasevape. Ha'eire omanda ijeherã ñyngareko ijehe. Ova ãvãpyntu jy'yymbava, yvytu kokoty vyryveveva; ova yvyra jy'arapemba iava, hapo ryheve nõhẽãrã opa jipi. ¹³ Hãmã ova reta yy ñarõvape, mbytyryjuva mãĩnunga ky'akuere yy hymbeype, jasy tata hape javyva rãĩmi, mondohapo pỹntu opamba'õpe. ¹⁴ 14 Kova retare Enoc ñimiñẽẽ jyve, Adan vive 7 hea heirã vẽkua: "Pymãĩhe, ouma Ñanderu Tumpa heta jokuevare hãndi, ¹⁵ ou jahe hevẽrã opaite porãmbava japo'iare, haereka jahehe verã opaite heko porãmba haivi mymorãmbashu vekua. ¹⁶ Kova kuaretare opava mbyposhyka haereka ĩnjeta rei, koñẽĩ haire potavaĩ ikoshu, ñymbyvete ĩnjeta reta pota mãĩnunga mẽ'ẽãshu retarã. ¹⁷ Tẽvã pee, shyryvyre pynymãnduahe Ñanderu Hesukristo Apostolre hei vekua. ¹⁸ Hai reta rãnga hei: "Vokava ara japy serimarã, ĩmepo'ẽ kuaretare ñymbyhoryva mbai haikavivare hivi hykove potava rãĩmĩpo japo. ¹⁹ Kova rãnga hai kuaretare opa mbyvaisho ijeheva, shara haire potavaĩ japojyre harã mba’etyre Espiritu Ñanderu Tumpaivi ouva. ²⁰ Tẽvã pee shyryvyre ahaihuva, piñymypyrãta katu pirojakuepe haereka pirureĩ Espiritu Santo rupii. ²¹ Piko Ñanderu Tumpa jyhaihupy, pyhãrõ Ñanderu Hesukristo oujy peve, jyparekokue ryheve mẽẽpe verã tykove opamba. ²² Jyroja nungambare, pymykỹrẽyshu jyrojave verã. ²³ piñyhã pynõhe verã ỹngavare tataivi, ĩrũ retape pypareko jyve kyje ryheve, mondeva myngyava heko porãmba vekuapy, ha'eavepo pivarushi. ²⁴ Ñanderu Tumpa ñyngarekopohe potãã mbai porãmba japo retarã, haereka ĩmẽrejy mbaikatu pee jyve pẽĩ hynonde verã kyamba ryheve. ²⁵ Hãrã ñambyveteshu Ñanderu Tumpa ñanymondojepe'ia, Hesukristo rupii opa kuaa vateve ẽvã, ñymbaikatuva haereka hĩmbipekuekue. Japyraheshu Ñanderu Tumpa opaite kova rehe, ã'ẽ haereka opa ara pevarã. Amén