¹ She Pablo, apostol, haimba kuaretare ñonova ti kuaretare mondova, Hesukristo teiva rãnga mba shymbou, haereka Ñanderu Tumpa, Hesupe mopuã jy vekua. ² She haereka opaite ñandy ryvyre pyny marãndu pee tupao reta Galaciape pẽĩvã. ³ Ñanderu Tumpa haereka Ñandeja Hesukristo tiñohẽ pyndy rehe ñymbai kavi haereka pya kavikue. ⁴ Hesukristo rãnga mano mbai porãmba jajapo vekua rehe, ñany nõhẽ verã ko yvy ĩãrẽ õre heko porãmba vekuaivi, Ñanderu Tumpa potava rãimi. ⁵ Opa ara toñemombai vasu Ñanderu Tumpa. Amen. ⁶ Shymyngyje rãnga are'ãitemba pimymbyryshi Ñanderu Tumpa, pynyrẽno Hesukristo rupii heshakape verã pya kavikue, haereka pyhasa verã ỹngava ñee kavia kyty. ⁷ Ãñẽte, mba'ety rãnga yngava ñee kaviva, ĩmẽi rãnga ẽẽ porãmba ñono'õ pankape, haereka Hesukristo mbeu vekua pota ỹngai japova. ⁸ Hãrã ĩmẽ'ẽ mbeupeva ñeẽ kavi ỹngai ohovarã, vokava tykove tijaheahese, mba'eãposhekui sheerã ti pẽnte Ñanderu Tumpa jokuerearã. ⁹ Haimape vekua rãimi ã'ẽ hykuai haijype: Ĩmẽ'ẽ pynymbytepe ñee kavi ỹngai ohova pyhenduma vẽkuaivi mbeupevarã, vokava tykove tijaheahe. ¹⁰ Kỹrã hairã, pota kuaretare aĩ kavi hãndi rãmẽĩra ti Ñanderu Tumpa hãndirã? Potarã ambypya kavi aĩ kuaretare? Kỹrãrã, haiveamapo shekui Hesukristo jokuerea. ¹¹ Kova aipota pikuaa shy ryvyre: Ko ñee kavi ãmbeu aiva, ha eã kuaretare japo vekua. ¹² Ha eã meẽ shea haereka aikuaava kuareta retaivi, Hesukristo teiva rãnga kuaaka she. ¹³ Ĩmẽrã pee pyhẽndu marãra she aiko aryka'e Judiore oho heva aha herã, marãra Ñanderu Tumpa ryhevare amoña ai pyrãtape haereka moñahã re ambai verã. ¹⁴ Judiore rãimi airã, heta shapisha she rãimi ivare aheja taykue, shara ajapo haereka ahaihuve ñanyty nondevare iko vekua rãimi. ¹⁵ Ñanderu Tumpa rãnga ndei aa rã vaĩ mba, shy pyhỹrõ haereka tivishaite pyryhaihurã shy rẽno. ¹⁶ Hai pota kuaaka she Tay Hesukristo, ambeu verã ĩñẽẽ pyrỹ mondojepeva, Judio mbavare mbyteipi, vokava jehurã mbaveã aha apyrãndushu kuaretare. ¹⁷ Haereka ahãa Jerusalenpe ahesha tynonde apostol shy hevivare. Kỹrã tẽvẽrã, ahavavi Arabia kyty, haivi aijy Damascope. ¹⁸ Mbahapy ãñovape aha Jerusalenpe, aikuaa verã Pedro hãrã haipe aĩme hãndi 15 ara. ¹⁹ Aheshãa ĩrũ apostolre, tẽvã ahesha hai Santiago Ñanderu Hesukristo tyvy. ²⁰ Ñanderu Tumpa hỹnonde hai pee, kova ambypara peeva kuatiape hai ãẽteva. ²¹ Haivi aha Siria haereka Silisiape. ²² Ñandy ryvyre Hesukristo tupaope õre, Judeape ẽvãre shy kuãa hai. ²³ Hendu pevẽĩtẽ reta he iarã: “Ko ñany mõña i vekua, ã'ẽ iko mbeu ñee kaviva, aryka'e pota õhundire vekua." ²⁴ 24 Hãrã she rupii omombai vasu reta Ñanderu Tumpa.