¹ She Juan, akuakua mava, ambyparashu kova kuatia Gayo ohaihuvape, she ãñete aryraihu. ² Shy ryvyre ahaihuva, opa mai nũngape ãhãrõ õhẽ kavi oho nde verã, haereka mambaimbape ri verã, ndy kovepe oho kavi ndeva rãimi. ³ She rãnga shy roryite õhendu ñandy ryvyre vãhẽrava juruivi, marãra ryvata kavi mbai ãñetevaipirã. ⁴ Shee pevarã mba'ety vya tivisha veva kovaivi, ãhẽndu shy ryvyre haereka shi hĩndyre pyntuaipi teri ivekuare, oho kavi reta mbaikavi ãñẽteva hapepe. ⁵ Shy ryvy, kỹrẽype rãnga rijapo opiate mbai rijapova, ñandy ryvy reta pevãrã, mbyryivi ouva reta jyve. ⁶ Opaite nỹrẽntape vãhẽ vekuare, mbeuma jyve ñande ñaimbatyva vivee typaope, mãrãra ndee ryhaihushu reta haereka mãĩnũngape rymboryva ohojyma retarã. ⁷ Hãmã haire iko mbeu verã Ñanderu Hesukristo hee, haereka hekyã reta Ñanderu Tumpare jyrojambare mbai mẽẽshurã. ⁸ Hãrã ñande ñamboryposhu hai reta, jaiko verã ñapỹrymbory jaiva haereka ñamby vevymĩ tẽvẽrã japovare, mbeu teri ñynõĩ voka mbai ãñẽteva haperã. ⁹ She ambyparama kova kuatia ñẽẽ voka tupaope, hãmã Diotiefe katy pota ñoi ñymỹ tynonde opaite kuaretaivirã, ỹrỹmỹ vãhẽa. ¹⁰ Hãrã she aha hai ẽvãperã, ãmỹ mãnduapo hekui mbai porãmba japo vekua rehe, haereka hai ãñẽtẽ mbava ñẽẽ hei i yry reherã. Hãmã voka ĩãrẽ hai hẽntape mỹ vãhẽã jy opaite ñandy ryvyre mbyry ouvare, mbeu'ia Ñanderu Hesukristo hee haereka potãã mbava mỹvãhẽ jyveshu reta hẽntapetei, mõhẽ jyve kova Ñanderu Tumpa jyroja heare. ¹¹ Shy ryvyre, avy mbai porãmbava pijapo, pijapopo jyve mbai haikaviva. Hãmã ko mbai haikaviva japo ia Ñanderu Tumpa ryhevarã haereka mbai porãmba japo ia Katy, heshãã pokui Ñanderu Tumpa. ¹² Hãmã opava Demetrio injeta kavihe haereka hai hekope kavi mbeu ñẽẽ ãñẽteva ryheva hape, haereka opa rupii injeta kavi jyvehe hãmã ndee rikua kavi ore mbe uha ia mbai ãñẽteva ryheva. ¹³ Hãmã heta mbai ĩmẽ'ẽ ambypara verã tẽvã ambyparaã teripo kuatiare, ¹⁴ ãhõrõ teri ãĩ nareãmĩte aryresha verã, haivi ñaĩnjeta ijupii verã. ¹⁵ Hãmã ndy pya kavi. Ñandy ryvyre kope õvã nymỹ mãranduka. Haereka mỹ mãranduka jyve ñandyryvyre heeite rupii.