¹ Ei erai butung senai, bila na'an ulun erai kedapatan ngene kenyala, iko rohani harus nepuli ulun erai ngunau iro lawan merue halus. Beati-atilah ko supaya ko iya niang terehiut. ² Sama bekekawatlah suang menanggung bebap supaya iko taat adat Kristus. ³ Jika na'an ulun erai beanggap unuk iye penting, padahal awe ngunanu iro, iye menipu iye gegale. ⁴ Ayulah tiap ulun menguji gawian iye gegale. Uli iro, iye tau bangga neau keadaan iiye gegale awe gunen membanding lawan ulun lain. ⁵ Gunen, uras ulun harus nanggung gawian de gegale. ⁶ Ense erai ruku pelajaran teke Firman Allah harus iye ngebagi urus hal erai buen iro lawan ulun erai ngelajar iye. ⁷ Iya ketipu. Allah awe tau ngeriek gunen ulu kakan mutik on erai iye tabur. ⁸ Ulun erai menabur teke napsu pengakan akan pasti mutik keboto pengakan ye'e. Akan tetapi, ulun erai menabur teke Merue pasti mutek bolum erai selamanya teke Merue. ⁹ Iya taka jadi mole bebuet buen. Bila musim ye'e sawi, taka pasti memutik asal taka awe meyarah. ¹⁰ Gunen iro, bila taka ruku kesempatan, ayulah taka berbuat buen tong urus ulun, husus tong keluarga suang beiman. ¹¹ Teau lah ngeteme kegaya hurup-hurup erai ap tulis tong iko lawan kamei ap gegale. ¹² Ali erai kakan ango kebuen teke hal-hal erai lahiriah ali memaksa ko de besunat. Ali ngegawi hal iro supaya awe de aniaya demi salib Kristus. ¹³ Ali erai de sunat pun awe menaati adat Taurat, tetapi ali kakan iko de sunat supaya ali ahan nago unuk erai sunat iko. ¹⁴ Mehara ap awe piji nango unuk kecuali suang salib Tuhan taka, Yesus Kristus. Ngalo salib-Iye, dunia haot de salibkan tong ap, lukun ap tong dunia. ¹⁵ De sunat lawan awe de sunat on lah anti iye. Erai penting iye jari ene (ciptaan) bio. ¹⁶ Bagi uras ulun erai numun aturan ehe, de lah (biarlah) aman sejahtera lukun rahmat dolui gunen ali lukun gunen Israel koen Allah. ¹⁷ Ahir iye, iya na'an ulun erai peheka ap gunen ap ngoit tanda-tanda Yesus suang unuk ap. ¹⁸ Erai butung senai, kira iye anugerah Tuhan Yesus Kristus na'an lawan merue iko. Amin.