1 తు ఆచో బోదానే ఛాజజేకోజ్ వాతెవూనె బోద్కర్. కుకన్ కతో, 2 బూడ్ ఆద్మీ మితమేతీ రేణోకన్, నియతేవాళన్,ఆచ్ అక్కల్ చజకోన్, విశ్వాస్,ప్రేమేమా ఓప్క్యామా డోకో చెనిజు రేవాళేర్ నై రేణో 3 హనూజ్ బూడ్ డోక్రీవో చాడికేవాళ్కే, ఘణోపీయెవాళ్కె నరజు, ఉందూర్ చాలేమా డరేతీ భక్తితీ చాలెజు రేణో. 4 దేవేర్మాత్ భూమ్డ్నీవజు,మోటీయార్ బీరేవో ఉందేర్ఘరూవాళేతీ నవన్ రేన్,ఉందూర్ ఘరేవాళూనన్ చచ్యాబరే వూనె ప్రేమ్ కరేవాళన్, 5 ఆచ్ అక్కలేతీరేన్, పవిత్తర్వేన్ ఘరేమాజ్ కామ్ కరేవాళ్ వేన్, ఆచ్రేణోకన్ అక్కలేవాళన్, ఆచో ఉపదేశ్ కేవళ్ రేణోకన్ బోద్కర్. 6 హనూజ్ ఆచ్ అక్కలేతీ రేణోకన్మోటీయార్ ఆద్మీవూనే సీక్ దే . 7 దుసర్ పాక్తీమా చజకో జన్ అపణేనే దేకన్ ఖరాఫ్ వాతే కుణ్సీ నకజు, మూండీ హెట్టేనవాళేజు, స్వగ్లీ ఆచ్ కామూమా తార్ తూజ్ నమూనార్ నై దికాసక్ణో. 8 తార్ ఉపదేశ్ డోకా చేనిజూన్, కసాప్ చెనిజూ,కుణీ ఆడమ్ కేనే వీల్ చెనిజే ఆచ్ వాతేవూతీ సీక్దేజు రేణో 9 బాయా కజకో, సే వాతేవూమా అపణ్ రక్వాళో చజకో దేవేర్ ఉపదేశేనే నామ్ కాడేజు,ఉందేర్ మాలకేర్ ఆడమ్ నబోలెజు, కాయి 10 చోరీనకరెజు, పూరో భరోసో దకాళ్తో,స్వగ్లీకామేమా ఉందేనే ఖుషీ కరావ్తో, ఉందూతీ నవన్ రేణోకన్ ఉందూనే సీక్దే. 11 కస్నెకతో, స్వగ్లీ మన్క్యావూనె రక్షణ్కజకో దేవేర్ కృపా దిసాన్, 12 అపణ్ భక్తి చెనిజే గొణెనె, ఏజగేర్ ఘణో ఆసానే చోడ్దేన్, క్వొసళేతీ రజే నిరీక్షణేసారూ, 13 మోటోదేవన్ ,అపణో రక్వాళో చజకో యేసుక్రీస్తూర్ మహిమా దికావ్ణోకన్ ఓర్జగూదేక్తే, ఏ జగేమా అక్కలేతీ, నియతేతీ, భక్తితీ బంచ్తే రేణోకన్ అపణేనే సీక్దేరీచె. 14 ఊ స్వగ్లీ ఖరాఫ్ గొణేతీ అపణేనే చోదాన్, ఆచ్ కామూమా ఆసాచజే జనూనే ఓర్వాసే పవిత్తర్ కర్లేన్,ఓర్ మాలేర్నై కర్లూకన్,ఓర్ ఊజ్ అపణేసారూ హావాలత్ వేగో. 15 ఏర్కార్ణే బోదా కర్తో, సీక్దేతో పూరో అధికారమేతీ ఖరాఫ్ బోదానే దల్కార్తో రే.కుణీతీతోనె కసోభాక్యరో ఛికన్ న కేరావస్ జు దేక్లే.