¹ విశ్వాసేమా కమ్ జోరేవాళేనే డై కర్ లో . పణ్ ఓర్ సొంచెర్ ² కార్ణే ఓత్తి తకరార్ కరోమత్ . ఏకిర్ విశ్వాసేర్ కార్ణే కాయితీ ఖాయోజాకన్ కచె . పణ్ విశ్వాసేర్ కార్ణే కమ్ జోరేవాళో తర్ కారీ ³ మాత్రం ఖావె . కున్సీతీ ఖాసకెవాళో సే ఖాయెనీజేనే హల్కోన పాడ్ ణొ . తర్ కారీ మాత్రం ఖాయెవాళో సే ఖాయెవాళేనే నేవ్ నీ ⁴ కార్నో , కసన్ కతో దేవ్ ఓనె డై కర్ మేలోచె ఉజ్జేకేర్ సేవకేనే నేవ్ కరేనే తు కుణ్ ? ఏక్ బడేరో కె , పడ్ జాయెరో ఓర్ మాలకేరో కామజ్. ⁵ ఉ బడేచె . కసన్ కతో ఉ బడేజు ప్రభు కరెచె . ఏక్ దాడో ఉజ్జేక్ దాడేతీ ఆచో కన్ ఏక్ కేలెచె . ఉజ్జేక్ సేదాడ్ బరోబర్ కన్ కెలెచె . హర్యేక్ ⁶ ఓర్ ఊజ్ ఓర్ దల్లేనే ఘట్ కర్ లేణొ . కున్సీ ఏక్ దాడో ఆచో చెకన్ కేలేవాళో ప్రభూర్ వాసె హనూకెలె . కున్సీతీ ఖాయెవాళో ప్రభూనె ⁷ బడాయెనే ఖాన్ , ఉ బోజనేర్ కార్ణే దేవేన్ వింతీ కరచె . కోయిబీ ఓర్ ⁸ వాసజ్ బంచెనీ . కోయిభి ఓర్ వాసెజ్ మరేనీ . అపణ్ బంచాతో దేవ్ వాసె బంఛా . అపణ్ మర్ జావాతో దేవ్ వాసె మర్ జావా . అపణ్ ⁹ బంఛన్ రాతీ , మర్ జావాతీ అపణ్ ప్రభూవాళ్ ఛా . కసెనెకతో బంచ్ రేజ్ నన్ మర్గేజేనే ప్రభూవేన్ రేనే క్రీస్తు మరన్ బంచో . ¹⁰ హనూవతో తర్ కారీ మాత్రం ఖావెస్ జకో తు తార్ భాయినే కసెనె నేవ్ కరెచి . కాయిబీ ఖావస్ జేకో తు కసెనే తార్ భాయినే హల్కో కరేచి ? దేవేర్ నేవ్ లేనే అపణ్ సే దేవేర్ మునంగె హుబ్రాచా . ¹¹ కసెనెకతో గ్రంధేమా , మార్ జీవేర్ సోగన్ , హర్యేకేర్ గోడి మార్ మునాంగె నవె . హర్యేక్ మ దేవ్ కన్ ఓప్ లచె కన్ ప్రభు కేరోచె . కన్ ¹² లక్ మేలెచె . జేర్ వాసె అపణేమా హర్యేక్ ఓర్ కార్ణే దేవేనే లేకో ¹³ వతాయేర్ చె . జేర్ వాసె అపణ్ ఏకినె ఏక్ నేవ్ కరేర్ ధామ్ దా . ఓర్ బదల్ తమ్ కర్ణోజకో కాయికతో , తార్ భాయి ఆకడ్ జావెజు కరేర్ కె, ¹⁴ పాపేమా పడేజు కరేర్ కె , కున్సీ తు న కర్నో . యేసు క్రీస్తుతీ మ ఏక్ వేన్ చు . జేర్ కార్ణే కున్సీ ఖోరాకీ ఓర్ ఊజ్ ఖరాప్ చిజ్ కోనికన్ మనె మాలం . పణ్ ఏక్ ఆద్మి ఏక్ విశ్రా ఖరాప్ ఛిజ్ కన్ నమ్మేతో ఓనె ¹⁵ ఉ ఖరాప్ ఛిజ్ వేజా . తు ఖావెస్ జేర్ కార్ణే తార్ భాయినే హయి కరావెస్తో . జనా తు ప్రేమేతీ చాల్ రో కోని . క్రీస్తు కేర్ వాసే మరోకో ¹⁶ ఉందేమా ఏక్ తార్ ఖోరాకేర్ కార్ణే నాస్ కరోమత్ . కసెనెకతో దేవేర్ ¹⁷ రాజ్ ఖాయేర్ పియేర్ కొని . పణ్ పవిత్తర్ ఆత్మా దజకో నియత్ , ¹⁸ శాoతీ సంతోసం చె . ఏర్ నై క్రిస్తూనే సేవకరెవాళో దేవేనే ఖుషి ¹⁹ కరావచె , సే ఆద్మి మేచ్ లజు రచె . జేర్ వాసె అపణ్ శాoతీ దజకోన్ ²⁰ ఏకీన్ ఏక్ మద్దత్ కరేర్ కామ్ , కరేనే కోశిస్ కరాఛ . భోజనేర్ కార్ణే దేవ్ కిదోజేనే నాస్ కరోమత్ . సే తరీకార్ భోజన్ ఖాయెజా పణ్ ²¹ ఉజ్జేకేనే పాపేమా పటకేర్ భోజన్ ఖాయేర్ తపు . తార్ భాయి పాపేమా పడజు కరెజకో ఖోరాకి ఖాయేరన్ , అంగూరేర్ రస్ ²² పియేరో అసో కున్సీ న కరేర్ ఆఛో . ఏర్ కార్ణే తార్ సొంచెనే తారన్ దేవేర్ పచ్చె రకాడ్ దే . ఉ సమోర్ కన్ కేలేన్ కిదోజకో కామేర్ కార్ణే ²³ మన్నెమా పాప్ పాయెనీజకో నసిబ్ దార్ . పణ్ ఉ ఖావెజేర్ కార్ణే ఏకీనే నెక్ రత్తో , ఓనె ఖావెజనా దేవ్ ఓనె నేవ్ కరేచె . కసెనెకతో ఓర్ కామ్ విశ్వాసేతీ భళన్ చెని . విశ్వాసేతీ భళన్ నరజకో కామ్ పాప్ .