¹ జనా పరిసయూలూ సద్దూకయులూ ఆ, ఓర్ అoత్ దేకేనె ఆస్మానేతీ ఉందేనె ఏక్ విచిత్తర్ కామ్ దకాళ్ క ఓనె కేతేఖo,ఉ హనూకో. ² సాoజ్ వణా ఆస్మా లాలోచటక్ ఛే హనూక తమ్ పాణీ పడెనీ కన. ³ పర్ బాతీ ఆస్మా రాత్ డోర్ వాదళేతిఛే జేర్ వాసె ఆజ్ ఆoదీ పాణీ ఆవచె కన కోచో కొని కాయి? తమేనె ఆస్మానేర్ కార్ణే మాలమ్ కర్ లేనె వoగావచె పణ్, ఏ దాడూర్ నిశానేనె మాలమ్ కర్ లోని. ⁴ వడాళి కరజకో ఏ బల్లా పిడీవాళ్ నిశానేనె పూచ్ రేచె పణ్ యోనార్ కార్ణేర్ నిశానేనే తప ఉజ్జీ కుణ్సీ, నిశా ఉందేనె వతావునీ క ఉందేనె ఛోడ్ దే డగర్ గో. ⁵ ఓర్ చేలా పర్ లేవ్ డీ జా బాటీలాయేర్ భూల్ గే జనా యేసు దేక్ లో. ⁶ పరిసయూల్ సద్దూకయూల్ క కేవాళేర్ ఖాటో ఆటేర్ కార్ణే హూషార్ రో క ఉందేనె కో. ⁷ జేర్ వాసె ఓ ఆపణ్ బాటీ లాయెకొని జేర్ వాసె ఈవాత్ కోక ఉందేమా ఓ మాళాఫేర్ తేరె. ⁸ యేసు ఉ మాలమ్ కర్ లేన్ కమ్ విశ్వాసమెవాళావో, ఆపణ్ డై బాటీ ఛేనిక తమేమా తమ్ కస్సెనె మాళా ఫేర్ రేచో? ⁹ తమ్ ఉజ్జీ మాలమ్ కర్ లీదీకొని కాయి? పాoచ్ బాటీ హజార్ ఆద్మీనె వేoటే జనా కత్రా ఓల్డా పాడేకో ఓయి తొయీ. ¹⁰ సాత్ బాటీ చార్ హజార్ ఆద్మీనె వేoటే జనా కత్రా ఓల్డా పాడేకో, ఉ తమేనె హర్ దే ఛేని కాయి? ¹¹ మ బాటీర్ కార్ణే తమేనె కోకొని క తమ్ కస్సెనె మాలమ్ కర్ లోని? పరిసయూల్ సద్దూకయూల్ క కజేర్ ఖాటో ఆటేర్ కార్ణేజ్ హుషారేతీ రోక కో. ¹² బాటీర్ ఖాటో ఆటేర్ కార్ణే కొనిపణ్ పరిసయూల్ సద్దూకయూల్ క కజేర్ బోదార్ కార్ణేజ్ హుషారేతీ రేణో క ఉ ఉందేతీ కో క జనా మాలమ్ కర్ లీదే. ¹³ యేసు ఫీలిప్పేర్ ఛజకో కైసరయ మల్కేనె ఆ ఆద్మీర్ బేటా కూణ్ క జ కేలేరేచె క ఓర్ చేలావునె పూచ్ తేఖo. ¹⁴ ఓ ధోడ్ సేక్ బాప్తిసo దజకో యోహాన్ కన్ ధోడ్ సేక్ ఏలియాక, ధోడ్ సేక్ ఇర్మియా క, భక్తిదారుమా ఏక్ క కేలేరేచె క కే. ¹⁵ జేర్ వాసె ఉ తమ్ మ కూణ్ క కేలేరేచో క ఉందేనె పూచో. ¹⁶ జేర్ వాసె సీమో పేత్రు తు జీవేవాళో దేవేర్ బేటా క్రీస్తు క కో. ¹⁷ జేర్ వాసె యేసు సీమో బర్ యోనా, తు నసీబ్ దార్ స్వర్గ్ లోకేమా ఛజకో మార్ బాప్ తోనె ఏర్ కార్ణే మాలమ్ కీదోజ్ పణ్ నర్ తోనె మాలమ్ కీదేకోని. ¹⁸ ఉజ్జీతు పేత్రు; ఏ భాటార్ ఉంపర్ మార్ సoఘేనె భాoదుచు పాతాళ్ లోకేర్ కవడ్ ఓర్ ముణాoగె ఠర్ సకేనీకన్ మ తోనె కేరోచు. ¹⁹ స్వర్గ్ లోకేర్ తాళo తోనె దుచు తు ధర్తీ ఉంపర్ కేనె భాoదెచీకో, ఉ స్వర్గ్ లోకేమా సదా బoద్ జావె ధర్తీ ఉంపర్ ఛోడేచీకో ఉ స్వర్గ్ లోకేమ సదా చుట్ జావె క ఓనెకో. ²⁰ ఓర్ పచ్చె ఉ క్రీస్తుక కేనీతీ నకేణో క ఓర్ చేలావునే జోర్ తీ హకమ్ దీనో. ²¹ ఉ యెరూషలేమేనె జా మోటూతీ మోట్ పూజారీతీ శాస్త్రీయూతీ ఘణ్ భావేటిఖా మర్ జా తీ దాడేనె ఉటేర్ జరూర్ క జనాతీ యేసు ఓర్ చేలావునె మాలమ్ కరేనె సరూకర్తేఖo. ²² పేత్రు, యేసూర్ హాత్ ఝల ప్రభూ, ఉ తోనె ఛేటీవేజా, ఉ తోనె కన్నయీజ్ వేనీక ఓనె దల్ కారేనె లాగో. ²³ పణ్ ఉ పేత్రూర్ సామ్ ఫర సైతా మార్ లారెజో తు మనె హటకేవాళోచీ తు ఆద్మీర్ వాతేజ్ కేలేరోచీ పణ్ దేవేర్ వాత్ నాకేలెస్ జు చీక పేత్రూనెకో. ²⁴ జనా యేసు ఓర్ చేలావునె దేక కొయి తొయీ మార్ లారె ఆవుక కుoతేతో ఓర్ ఊజ్ ఛోడ్ దే ఓర్ సిల్వానె పాల్డే మార్ లారె ఆవ్ ణో. ²⁵ ఓర్ ప్రాణేనె బoచాడ్ లు క కుoతేవాళో ఓనె గమాలెవాళో. ²⁶ మార్ వాసె ఓర్ జీవేనె గమాలెవాళో ఓనె బoచాల్డే ఏక్ ఆద్మీ జగ్ సారీ కమాలే ఓర్ ప్రాణేనె గమాలెతో ఓనె కాయి ఫాయెదో? ²⁷ ఏక్ ఆద్మీ ఓర్ ప్రాణే బదలే కాయిదేసకచె? ఆద్మీర్ బేటా ఓర్ బాపేర్ మహిమాతీ ఓర్ సోజాతీ సదా ఆయెవాళోఛే జనా జేర్ కామేర్ నై ఓనె ఫల్ ఉదచె. ²⁸ అతై హూబేజేమా ధోడ్ సేక్,అధ్మిర్ బేటా ఓర్ రాజేతీ ఆయేర్ దేకెజెలగు మరేనిక తమేనె సాసీజ్ కేరోచు క కో.