¹ Па́вло Дэвлэ́ско слуга́ и Христо́ско апо́столо, апо́столо савэ́с приджиндэ́ мануша́ савэ́н выкэдыя́ Дэвэ́л ² и кай тэгалёва́с чачибэ́н сыр тэджива́с пир Лэ́ско Лав саво́ лыджя́л кэ ве́чно джюипэ́н, пал саво́ ракирэ́лас гара́ Дэвэ́л, ³ а Ёв на хохавэ́л и коли́ явья́ вре́мя, то откэрдя́ Пэ́скиро Лав саво́ мэ лыджя́в манушэ́нгэ, саво́ пхэндя́ ма́нгэ амаро́ Спаси́телё Дэвэ́л, ⁴ Тито́скэ, чачунэ́ чавэ́скэ дэ патябэ́н бах и ми́ро Дэвлэ́стэр Дадэ́стэр и Иисусо́стэр Христо́стэ амарэ́ Спасителёстэ. ⁵ Ваш дава́ ачадём тут дэ Кри́то, кай ту тэдокэрэ́с буты́ и тэчивэ́с до фо́ры пхурэдырэ́н пшалэ́н, сыр мэ ту́кэ прыпхэндём. ⁶ Сыр исы́н одова́ саво́ би доша́киро екхэ́ ромня́ко ром, чаворэ́ лэ́стэ кандунэ́, нанэ́ шундо́ пал лэ́ндэ дылыно́ лав. ⁷ Пал дова́ со пхурэды́р ману́ш трэ́би тэявэ́л би доша́киро, сыр дэ Дэвлэ́скиро кхэр хула́й, ёв на сыкавэ́л холы́, нанэ́ матима́рё, на кошэ́лпэ манушэ́нса и народэ́л сыр тэхохавэ́ манушэ́н, ⁸ нэ ёв йилэ́са прылэ́л манушэ́н, любинэ́л тэкэрэ́л миштыпэ́н, патывало́, годяви́р, чачуно́, ⁹ пхирэ́л анги́л Дэвлэ́стэр, рикирэ́л пэс до васта́, пририкирэ́лпэ чачуно́ лав саво́ ракирэ́л Дэвэ́л, соб тэявэ́л зор тэ сыклякирэ́л адя́кэ сыр трэ́би манушэ́н, и тэ вракирэ́л одолэ́н савэ́ на прылэ́н Лав. ¹⁰ Дя́кэ сыр бут исы́н манушэ́н савэ́ на камэ́н тэ шунэ́н, ракирэ́н бут, хоханэ́, буты́р сарэ́ндыр ада́ иуде́и обчиндэ́, ¹¹ савэ́нгэ трэ́би тэзакэрэ́ муй, бо ёнэ́ улыджя́н се́мьи Дэвлэ́стэр, сыклякирэ́н одова́ со на трэ́би. Ёнэ́ закэрэ́н пэ дава́ и на ладжя́н. ¹² Варико́н лэ́ндэр савэ́с ёнэ́ гинэ́н пророко́са пхэндя́ со Критя́ни исы́н хоханэ́, захалэ́ сыр джюкэла́, накамэ́н тэкэрэ́ буты́, ¹³ и ада́ исы́н чачибэ́н, пал адава́ ра́кир лэ́нгэ на́дар, соб ёнэ́ тэ патя́н.