¹ И явнэ царё и Амано по свэнко кэ царица Есфирь. ² И сыр пьенас вино царё пучелас пэ авирто дэвэс кэ Есфирь: «Пхэн мангэ со ту камэс? и со камэс тэ мангэс мандыр? мэ дава соро со ту мангэса? Кэ паш царство авэла тыро» ³ И пхэндя царица Есфирь:«Сыр мэ попэём лачипэн дэ тырэ якха, чялыём тукэ и ту лошало тэ дыкхэс ман, и сыр ту камэс царё, мангав тут на отлэ джиипэн миро и заракх миро родо гэна со мэ мангав! ⁴ Пал дова со бикиндэ амэн, ман и саро миро родо, камэн тэ хаскирэн и тэ умарэн. Мэк авасас бы амэ бикиндэ сыр бутярнэ, мэ ававас бы штыл, пал дова со дая бида на молэлас бы дова, соб мэ тэ мангав тут царё». ⁵ И пхэндя царё Артоксерксо, Есфирякэ царицакэ: «Кон дава мануш, и кай ёв, саво на подарандыя дава тэ кэрэл?» ⁶ И пхэндя Есфирь: «Амаро баро враго екх – ада захало Амано!» И Амано здарандыя ангил царёстэ и царицатэ. ⁷ И холясыя царё барэ холяса и вштыя скаминдэстыр и гия до садо саво сыс до дворо, а Амано ачьяпэ тэ мангэл Есфиря тэ на хаскирэл лэскиро джиипэн, пал дова со дыкхья холы царёскири и галыя со царё лэс умарла. ⁸ И рисия царё садостыр до кхэр по свенко, А Амано подгия кэ Есфирь и пэя по чянга паш латэ. И пхэндя царё: «Ту камэс тэ посаспэ царицатыр паш мандэ?» Сыр пхэндя далэ лава царё, мануша царёскирэ учакирдэ Аманоскэ шэро и улыджинэ лэс. ⁹ И пхэндя Харбоно, евнухо царёскиро: «Гэна баро дэмбо, кэрдя Амано ваш Мардохеёскэ, саво зракхья джиипэн царёскиро – ёв тэрдо паш Аманоскиро кхэр, дэмбо дава –дрыван вучё» ¹⁰ И убладэ Аманос пэ дава дэмбо, саво ёв кэрдя ваш Мардохеёскэ, и холы царёстыр отгия.