¹ Прогинэ дэвэса и царё Артаксерксо гадыя Аманос, чявэс Амадафоскирэс, вугеянинос, и чидя лэс упрэдыр сарэндыр шэралэндыр, савэ сыс паш лэстэ. ² И сарэ слуги царёскирэ, пэрэнас по чянга ангил Аманостэ, пал дова, со дякэ припхэндя царё. А Мардохеё на пэрэлас по чянга ангил лэстэ. ³ И ракирэнас Мардохеёскэ слуги царёскирэ: «Соскэ ту на кэрэс дова со прыпхэндя царё?» ⁴ И ракирэнас лэскэ адава бут дэвэса, а ёв на шунэлас лэн, и ёнэ роспхэндэ дава Аманоскэ, соб тэ дыкхэн со авэла Мардохеёса дякэ сыр ёв пхэндя со ёв иудеё. ⁵ Сыр удыкхья Амано, со Мардохеё на пэрэл по чянга ангил лэстэ, и холясыя Амано барэ холяса. ⁶ И назакамья Амано тэ умарэл екхэс Мардохеёс, пал дова со лэскэ роспхэндэ пал родо Мардохеёско. И закамья Амано тэ умарэл сарэн манушэн родостыр Мардохеёскирэстыр савэ сын иудеи, савэ сыс до царство Артаксерксоскиро. ⁷ Дэ перво чён. саво кхарелпэ Нисано, до дэшудуйто бэрш сыр сыс царёса Артаксерксо, чурдэнас жребиё, ангил Аманостэ дэвэс дэвэсэстыр и чён чёнэстыр, (тэ уджинэ дэ саво дэвэс тэ умарэн иудеен) и выпэя пэ дэшудуйто чён саво кхарэлпэ Адаро. ⁸ И пхэндя Амано царёскэ Артаксерксоскэ: «Сын екх народо саво дживэл до форы пир саро тыро царство, саво пририкирэлпэ кэ пэскирэ законы, а пир тырэ законы на дживэл, и мэк царё на ачкирла адава дякэ. ⁹ Сыр закамэла царё, то мэк зачинэлпэ до лыл соб тэ умарэн лэн, и мэ отдава дэш барья рупонэ ловэ до васта кон кэрэла дая буты, тэ авэл бутыр барвалыпэн кэ царё». ¹⁰ И злыя царё ангрусны пэскирэстыр вастэстыр и отдыя Аманоскэ, чявэскэ Амадафоскирэскэ, вугеяниноскэ, саво сын враго иудеенго. ¹¹ И пхэндя царё Аманоскэ: «Дава тукэ рупунэ ловэ, соб тэ кэрэс адалэнса манушэнса со ту гинэс хвэдыр». ¹² И скхардэ долэн кон зачинэл царска лава до лыл до перво чён, дэшутрито дэвэс, сыс саро зачиндо дякэ сыр пхэндя Амано, сарэнгэ шэралэнгэ дэ сарэ форы царёскирэ, и пир сарэ народы пэ лэнгири чип,– тэ авэл зачиндо лавэстыр царёскирэстыр Артаксерксоскирэстыр и пикады пичять ангрусняса царёскирьяса. ¹³ И розбичядэ мануша лыла пир сарэ форы царёскирэ, соб тэ умарэн, тэ хаскирэн сарэн иудеен, тыкнэн и пхурэн, чяворэн и джювлен дэ дэшутрито дэвэс дэ дэшудуйто чён, саво кхарэлпэ Адаро, и лэнгиро барвалыпэн тэ розчёрэн. ¹⁴ Адалэ лыла авэна пиридынэ дэ сарэ форы, тэ джинэн сарэ, со авэла дэ дава дэвэс. ¹⁵ И бичявдэ сыс мануша тэ розлыджян далэ лыла сыр прыпхэндя лэнгэ царё, савэ сыс зачиндэ дэ баро форо Сузы. Царё и Амано бэшнэ те хан тэ пьен, а мануша дэ форо сыс дрыван пиридарадэ.