¹ Пхуром – выкэдынэ хуланякэ и лакирэнгэ чяворэнгэ, савэн мэ камав пир чячибэн. И на екх мэ, нэ сарэ кон джинэл чячибэн, ² пал чачибэн саво исын дэ амэндэ, и саво авэла амэнса вечно. ³ Мэк авэл амэнса лачипэн, милость и миро Дэвлэстыр Дадэстыр и Иисусостыр Христостыр, саво Чяво Дадэскиро, до чачибэн и камлыпэн. ⁴ Мэ дрыван лошало, сыр уджиндём со тырэндыр чяворэндыр сын долэ кон пхирэл до чячибэн, сыр припхэндя амэнгэ Дад. ⁵ А кана мангав тут, хуланы – нанэ нэви заповедь чинав тукэ, нэ доя сави амэндэ сыс гара амарэ дадэндыр, – соб амэ тэ камас екх екхэс. ⁶ И ада сын камлыпэн: соб амэ тэ пхирас пир заповэдь Лэскири. Дая заповэдь сын, сави тумэ шундэ гара амарэ дадэндыр, соб тумэ тэ пхирэн дэ латэ. ⁷ Пал дава со бут хоханэ угинэ до свэто, и на гинэн Иисусос Христосос, саво явья сыр мануш. Дасаво сын хохано и антихристо. ⁸ Дыкхэн пал пэстэ, соб тумэ тэ на пхагирэн буты доя, сави амэ кэрасас, а награда пхэрды лыям. ⁹ Сарэ, кон джял ангил и на дживэл до сыклярибэн Христоскиро, кэ ёв нане Дэвлэс. Кон дживэл дэ дава сыклярибэн, кэ дова Дад и Чяво исын. ¹⁰ Сыр кон явэл кэ тумэ и на янэл дава сыклярибэн, на прылэнте лэс до кхэр, и на подэнте лэскэ васт, ¹¹ а кон подэл лэскэ васт дова подрикирэл лэскирэ захалэ рынды. ¹² Бут сын со тэ чинав тумэнгэ вастэса до лыл, нэ накамам, пал дово со патяв со явава кэ тумэ и поракираса тумэнса муй ко муй, соб лош тумари пхэрды тэ авэл. ¹³ Поклоно пиридэн тукэ чяворэ тырэ выкэдымэ пхэнякирэ.