¹ Imbela nde, o ndayi, makoto kani sidinga yi ngbo de ripose mama. ² Sidinga na gala de o masiri go filipino, baka te imbela anga, gbigbiri kani na ye be go jongo ka Eme, tongoka na to Ngali Eme, go bu ogo nde. ³ Tongo Ngali Eme te ato fe yi ade na wu mama, na lomo de. ⁴ Ta, Eme kologa meleye o ito te wo go ngali Eme bakana o jo kpara na to ngali ye, ano, alo ngo, de tongoka na to jo guma fe o kpara de, ta toka jongo ka Eme, engbo tsia o guma. ⁵ Ela bili de, alo enani feyi li wu, imbela anga yi, angbo enani de makina na za kumuka de. ⁶ Ni gele enani mabebe engbo no de o kpara de, de angbo de yi diri de o gara nde. ⁷ Ta, angbo de gu guma esuga yi bakana te eyi ngbongbo tete de odinga ye. ⁸ Ano kunda yi nodjo be na to fe yi ngali Eme de, ta diri makowo ka a, baka te ino koto yi o ndayi ni. ⁹ Ikina go yi, o ndayi, kitima kani de magala kani: biti de la go kitima, tongoka na kili ongo ka kpara de, ano to fe yi jo ngali Eme. ¹⁰ Ino tsia de Eme mini ba ano za sidingayi jo male ngbilingo de na ndanda de. ¹¹ Imbela ba ningbo feyi bakana aba fe o dinga ye. ¹² Nayo te yi, na tsia yi jojo, na o guma fe yi ba i dhoko fe kadje no Eme le, no engbo bhuka yi go gongama kaye de ma go mabebe kaye. ¹³ Anga deno, nito grasiya fe Eme ela nde tongoka na maka ngali ye, te amele ba idje no, iza anga yi, bakana ngali o kpara, ta, engbo beba fano, bakana li Eme, engbo mele go yi ilele. ¹⁴ Tano, eyi o ndayi, ikoto ta o ilele ongo ka Eme no engbo go Yezu Kirisitu go Yudea, tongo eyi mini, igala te o ndayi yi be bakana engi gala dini esaka o yuda. ¹⁵ Ade o yuda no omele ba Ngama Yezu gala de o profeta diri, omeni o sisiti ngo diri, no eleke fe Eme de, de no eyala o kpara nde. ¹⁶ Nayoko ni ba alo ongo fe o ile Eme de ba okowo, ba otse na mele be ligbiri fe o gara. Ta siti guma ezoro be wo. ¹⁷ Feni, o ndayi, sidinga na ya esuga yi tene, be de kote ta de guma mama, aya dje tokana ngbili gomo na tsia yi. ¹⁸ Ano kunda na neke no tsia yi, nafa be ma Polo, do bili diri do bhochu, gbongwa ngbo eyoko meleye. ¹⁹ Eda ngbo, jo guma kani, de ndala mabebe kani? Ade yi mama, egila Ngama kani Yezu, go dhinga na mano kaye? ²⁰ Woyi, ide mabebe ka a de jo guma ni.