¹ Fa ny fanjakan'ny lanitra dia tahaka ny tompon-tany izay nandeha vao maraina be hanakarama mpiasa ho an'ny tanim-boalobony. ² Rehefa avy nifanaraka tamin'ireo mpiasa izy fa ho denaria iray isan'andro ny karaman'izy ireo, dia nalefany tany amin'ny tanim-boalobony izy ireo. ³ Nivoaka indray izy tamin'ny ora fahatelo ary nahita mpiasa hafa nijorojoro tao an-tsena. ⁴ Hoy izy tamin'izy ireo hoe: 'Ianareo koa, mandehana any amin'ny tanim-boaloboka, ary izay an-keviny marina dia homeko anareo.' Ka nandeha niasa izy ireo. ⁵ Mbola nivoaka indray izy teo ho eo amin'ny ora fahenina ary koa tamin'ny ora fahasivy, ary nanao toy izany ihany. ⁶ Tamin'ny ora fahiraika ambin'ny folo dia nivoaka indray mandeha koa izy ary nahita mpiasa hafa nijorojoro. Hoy izy tamin'izy ireo hoe: 'Nahoana ianareo no mijoro eto mandritry ny tontolo andro?' ⁷ Hoy izy ireo taminy hoe: 'Tsy misy olona manakarama izahay.' Hoy izy tamin'izy ireo hoe: 'Ianareo ihany koa mandehana any amin'ny tanim-boaloboka.' ⁸ Rehefa tonga ny hariva, dia niteny tamin'ny mpitandrin-draharahany ny tompom'ilay tanim-boaloboka hoe: 'Antsoy ireo mpiasa ary haloavy ny karaman'izy ireo, manomboka avy any amin'ny farany mankany amin'ny voalohany.' ⁹ Rehefa tonga ireo mpiasa izay nalaina tamin'ny ora fahiraika ambiny folo, dia nahazo denaria iray tsirairay avy izy ireo. ¹⁰ Rehefa tonga ireo mpiasa voalohany, dia nihevitra fa ahazo mihoatra izy ireo, kanefa izy reo ihany koa dia nahazo dinaria iray tsirairay avy. ¹¹ Rehefa nahavoaray ny karamany izy ireo, dia nitaraina momba ilay tompon-tany izy ireo. ¹² Hoy izy ireo hoe: 'Ireo mpiasa farany ireo dia niasa adin'iray fotsiny, nefa dia nampitovianao taminay izy ireo, izahay izay nisaka ny vesatry ny tontolo andro sy niharitra hain'andro.' ¹³ Fa namaly ilay tompon-tany ka niteny tamin'ny iray tamin'izy ireo hoe: 'Ry sakaiza, tsy manao izay tsy mety aminao aho. Tsy denaria iray va no nifanarahanao tamiko? ¹⁴ Raiso izay anao ary zory ny lalanao. Izaho dia nifidy ny hanome ho an'ireo mpiasa nokaramaina farany tahaka ny anao ihany. ¹⁵ Tsy manan-jo hanao araka izay tiako amin'izay ahy ve aho? Sa mialona ve ianareo satria malala-tanana aho?' ¹⁶ Ka ny farany dia ho voalohany, ary ny voalohany ho farany.'' [Fanamarihana: Ny dikan-teny taloha tsara indrindra dia manala ny hoe: "Maro no nantsoina fa vitsy ny voafidy."] ¹⁷ Raha hiainga ho any Jerosalema Jesosy, dia naka ireo roa ambin'ny folo teo anilany Izy, ary teny an-dalana Izy niteny tamin'izy ireo hoe: ¹⁸ ''Indro, hiakatra ho any Jerosalema isika, ary ny Zanak'Olona dia hatolotra eo amin'ny lohan'ny mpisorona sy ireo mpanora-dalàna. Izy ireo dia hanameloka Azy ho faty ¹⁹ ary hanolotra Azy amin'ireo Jentilisa mba hiomehezana, ho kapohina, ary hanombohana Azy amin'ny hazofijaliana. Fa amin'ny andro fahatelo dia hatsangana indray Izy.'' ²⁰ Avy eo ny renin'ireo zanaka lahin'i Zebedio nanatona an'i Jesosy niaraka tamin'ireo zanany lahy. Niankohoka teo anatrehany izy ary nangataka zavatra avy Aminy. ²¹ Hoy Jesosy taminy hoe: ''Inona no irinao?'' Hoy izy taminy hoe: ''Mandidia mba hipetrahan'ireto zanako roa lahy ireto, ny iray eo an-tananao ankavana ary ny iray eo an-tananao ankavia, ao amin'ny fanjakanao.'' ²² Fa Jesosy namaly ary niteny hoe: ''Tsy fantatrareo ny zavatra angatahinareo. Afaka ny hisotro ny kapoaka izay ho sotroiko va ianareo?'' Namaly izy ireo hoe: ''Afaka izahay.'' ²³ Hoy Izy tamin'izy ireo hoe: ''Hisotro ny kapoakako tokoa ianareo. Fa ny hipetraka eo an-tanako ankavanako sy ankaviako dia tsy anjarako no manome, fa an'ireo izay efa nomanin'ny Raiko.'' ²⁴ Rehefa nandre izany ireo mpianatra folo lahy hafa, dia tezitra mafy tamin'ireo mpirahalahy roa. ²⁵ Fa Jesosy niantso azy ireo hankeo aminy ary niteny hoe: ''Fantatrareo fa ireo mpanapak'ireo Jentilisa dia hangeja azy ireo, ary ireo lehilahy manan-danjan'izy ireo dia hampiatra ny fahefany eo amin'izy ireo. ²⁶ Fa tsy tokony ho toy izany ny aminareo. Mifanohitra amin'izany, na iza na iza maniry ny ho lasa lehibe aminareo dia tsy maintsy ho mpanomponareo, ²⁷ ary na iza na iza maniry ny ho voalohany eo aminareo dia tsy maintsy ho mpanomponareo, ²⁸ tahaka ny Zanak'Olona tsy tonga ho tompoina, fa hanompo, ary hanome ny ainy mba ho vidim-panavotana ho an'ny maro.'' ²⁹ Raha nivoaka avy any Jeriko izy ireo, dia vahoaka maro no nanaraka Azy. ³⁰ Nisy lehilahy jamba roa nipetraka teo amoron-dalana. Rehefa nandre fa nandalo Jesosy, dia nihiaka mafy izy ireo hoe: ''Tompo, zanak'i Davida, mamindrà fo aminay''. ³¹ Nibedy azy ireo ny vahoaka, niteny azy ireo mba hangina, kanefa vao mainka izy ireo niantsoantso mafy hoe: ''Tompo, zanak'i Davida, mamindrà fo aminay.'' ³² Avy eo Jesosy nijanona ary niantso azy ireo sady niteny hoe: ''Inona no irinareo ho ataoko aminareo?'' ³³ Hoy izy ireo taminy hoe: ''Tompo, mba hahiratra ny masonay'' ³⁴ Avy eo Jesosy, nangoraka, ka nikitika ny mason'izy ireo. Avy hatrany dia nahiratra izy ireo ary nanaraka Azy.