1 Niresaka tamin'i Mosesy i Yaveh, nanao hoe: 2 "Miresaha amin'ny vahoakan' Israely ary lazao izy ireo hoe: 'Izaho no Yaveh Andriamanitrareo. 3 Aza manao ny zavatra izay ataon'ny vahoaka any Egypta, izay nonenanareo teo aloha. Aza manao izay zavatra ataon'ny vahoaka ao Kanana, ilay tany izay hitondrako anareo. Aza manaraka ny fomban'izy ireo. 4 Ny lalàko no aoka hataonareo, ary ireo didiko no aoka ho tandremanareo, mba handehananareo eo amin'izy ireo, satria Izaho no Yaveh Andriamanitrareo. 5 Noho izany dia tandremo ireo didy aman-dalàko. Raha misy olona mankatò ireny, dia ho velona noho izy ireny izy. Izaho no Yaveh. 6 Aoka tsy hisy olona hiara-mandry amin'izay olona mifandray akaiky aminy. Izaho no Yaveh. 7 Aza manala baraka ny rainareo amin'ny fatoriana miaraka amin'ny reninareo. Reninareo izy! Aza manala baraka azy. 8 Aza miara-mandry amin'ireo vadin-drainareo; aoka ianareo tsy hanala baraka ny rainareo tahaka izany. 9 Aza miara-mandry amin'izay anabavinareo, na zanaka vavin'ny rainareo izy na zanaka vavin'ny reninareo, na dia natsangana tao amin'ny tranonareo na lavitra anareo aza izy. Aza miara-mandry amin'ny anabavinareo. 10 Aza miara-mandry amin'ny zanaka vavin'ny zanakareo lahy na amin'ny zanaka lahin'ny zanakareo vavy. Fa ho henatra ho anareo ihany izany. 11 Aza miara-mandry amin'ny zanaka vavin'ny vadin-drainareo, izay nateraky ny rainareo. Anabavinareo izy, ary aoka ianareo tsy hiara-mandry aminy. 12 Aza miara-mandry amin'ny anabavin-drainareo. Havana akaikin'ny rainareo izy. 13 Aza miara-mandry amin'ny rahavavin-dreninareo. Havana akaikin'ny reninareo izy. 14 Aza manala baraka ny rahalahin-drainareo amin'ny fiaraha-mandry amin'ny vadiny. Aza manakaiky azy amin'izany tanjona izany; nenitoanareo izy. 15 Aza miara-mandry amin'ny vinanto vavinareo. Vadin-janakareo izy; aza miara-mandry aminy. 16 Aza miara-mandry amin'ny vadin-drahalahinareo; aza manala baraka azy amin'izany fomba izany. 17 Aza miara-mandry amin'ny vehivavy iray sy ny zanany, na amin'ny zanaka vavin'ny zanany lahy na amin'ny zanaka vavin'ny zanany vavy. Havana akaiky azy izy ireo, ary faharatsiana ny fiaraha-mandry amin'izy ireo. 18 Aoka ianareo tsy hanambady ny rahavavim-badinareo ho vady faharoa ary hiara-mandry aminy raha mbola velona ny vadinareo voalohany. 19 Aza miara-mandry amin'ny vehivavy mandritry ny fadimbolany. Maloto izy mandritr'izany fotoana izany. 20 Aza miara-mandry amin'ny vadin'ny mpiray vody rindrina aminareo ka handoto ny tenanareo miaraka aminy amin'izany fomba izany. 21 Aoka ianareo tsy hanome ireo zanakareo ho atao eo amin'ny afo, fa manao sorona azy ireo ho an'i Moloka ianareo amin'izany, satria tsy mahazo maniratsira ny anaran'Andriamanitrareo ianareo. Izaho no Yaveh. 22 Aza miara-mandry amin'ny lehilahy hafa toy ny miaraka amin'ny vehivavy. Ratsy izany. 23 Aza miara-mandry amin'ny biby sy mandoto ny tenanareo miaraka amin'izany. Aoka tsy hisy vehivavy hihevitra fiaraha-mandry amin'ny biby. Fahavetavetana izany. 24 Aza mandoto ny tenanareo amin'ireo fomba ireo, fa tamin'ireo fomba rehetra ireo no nampahaloto ireo firenena, ireo firenena izay ho roahiko eo anatrehanareo. 25 Voaloto ny tany, ka nosaziako ny fahotan'izy ireo, ary nandoa ireo mponiny ny tany. 26 Noho izany, ianareo, dia aoka hitandrina ny didiko sy ny fitsipiko, ary aoka ianareo tsy hanao ireo zava-mahatsiravina ireo, na ny tera-tany Israelita izany na ny vahiny izay monina eo aminareo. 27 Fa izany no faharatsiana efa nataon'ny mponin'ny tany, ireo izay nonina teto talohanareo, ary voaloto ny tany ankehitriny. 28 Noho izany dia mitandrema mba tsy haloan'ny tany ihany koa ianareo aorian'ny nandotoanareo azy, tahaka ny nandoavany ny vahoaka izay teo alohanareo. 29 Na iza na iza manao ireo zava-mahatsiravina ireo, ireo olona izay manao zavatra toy izany dia ho esorina tsy ho eo amin'ny vahoakan'izy ireo. 30 Noho izany dia tandremo ny didiko mba tsy hanao ireo fomba mahatsiravina izay natao teto talohanareo ireo, ka tsy handotoanareo ny tenanareo amin'ireo. Izaho no Yaveh Andriamanitrareo.'"