Toko faha 3

1 Izaho dia olona izay nahita fahoriana teo ambanin'ny tsorakazon'ny fahatezeran'i Yaveh. 2 Notarihany sy nampandehanany tamin'ny maizina aho fa tsy tamin'ny mazava. 3 Azo antoka fa namadika ny tanany hanohitra ahy foana Izy, nandritry ny tontolo andro. 4 Nataony malazo ny nofoko sy ny hoditro; notapahany ireo taolako. 5 Nanangana fahirano hanohitra ahy Izy, ary nohodidininy zava-mangidy sy zava-tsarotra aho. 6 Nametraka ahy tao amin'ireo toerana maizina, toy ireo izay efa maty efa ela Izy. 7 Nanangana manda nanodidina ahy Izy ka tsy afaka nitsoaka Aho. Nataony mavesatra ireo rojoko 8 ary na dia miantso mafy sy miantso vonjy aza aho, dia ampangininy ny fivavako. 9 Nobahanany tamin'ny manda vita tamin'ny vato voapaika ny lalako; nataony ho meloka ny lalako. 10 Tahaka ny bera miandry hanafika ahy tampoka Izy, liona ao amin'ny fiafenany; 11 naviliny ny lalako, nataony nitoka-monina aho. 12 Nanenjana ny tsipìkany Izy ary nametraka ahy toy ny kendrin'ny zana-tsipìkany. 13 Nandefona ny voako tamin'ireo zana-tsipìkany tao amin'ny fitoeran'izany Izy. 14 Lasa tahirim-pihomehezana ho an'ny oloko rehetra aho, zavatry ny fanesoan'izy ireo tontolo andro. 15 Nofenoiny fahangidiana aho ary notereny hisotro zava-mahafaty. 16 Notorotoroiny tamin'ny sila-bato ny nifiko; natosiny tao anaty vovoka aho. 17 Nesorina tamin'ny fiadanana ny fanahiko; adinoko ny atao hoe hafaliana. 18 Ka dia hoy aho hoe: "Levona ny faharetako ary toy izany koa ny fanantenako amin'i Yaveh." 19 Tsarovy ny fahoriako sy ny firenireniko, ilay zava-mahafaty sy zava-mangidy. 20 Tsaroko foana izany ary mitanondrika ao anatiko aho. 21 Fa tsaroako izany ka dia manana fanantenana aho. 22 Ny fitiavana tsy miovan'i Yaveh dia tsy misy fitsaharana ary tsy misy fiafarany ny fangoraham-pony, 23 vaovao isa-maraina ireo; lehibe ny fahatokianao. 24 "Yaveh no lovako," hoy aho, noho izany dia hanantena Azy aho. 25 Yaveh dia tsara ho an'ireo izay miandry Azy, ho an'ireo izay mitady Azy. 26 Tsara ny miandry amim-pahanginana ny famonjen'i Yaveh. 27 Tsara ho an'ny olona ny hitondrany ny zioga tamin'ny fahatanoràny. 28 Aoka izy hipetraka irery amim-pahanginana, rehefa apetraka eo aminy izany. 29 Aoka izy hametraka ny vavany eny amin'ny vovoka—angamba hisy ny fanantenana. 30 Aoka izy hanome ny takolany an'izay mamely azy, ary aoka ho feno fahafaham-baraka izy. 31 Fa tsy handà antsika mandrakizay ny Tompo, 32 fa na dia mahatonga alahelo aza Izy, dia hanana fangoraham-po araka ny habetsaky ny fitiavany tsy mivadika. 33 Satria tsy mampahory ny ao am-pony na mampijaly ireo zanak'olombelona Izy. 34 Ny manitsakitsaka ireo voafonja rehetra eto an-tany, 35 ny mandà ny rariny ho an'ny olona eo anatrehan'ilay Avo Indrindra, 36 ny mandà ny rariny ho an'ny olona iray— dia tsy eken'ny Tompo ny zavatra tahaka izany! 37 Iza no niteny ka nitranga izany, raha tsy hoe nanaiky izany Yaveh? 38 Moa tsy avy amin'ny vavan'ilay Avo Indrindra ve no hiavian'ireo loza sy ny tsara? 39 Ahoana no hitarainan'ny olona velona rehetra? Ahoana no hahafahan'ny olona mitaraina momban'ny sazin'ireo fahotany? 40 Andeha isika handinika ireo lalantsika ary hitsapa azy ireo, ary andeha isika hiverina any amin'i Yaveh. 41 Andeha isika hanandratra ny fontsika sy ny tanantsika amin'Andriamanitra any an-danitra hoe: 42 "Nandika sy nikomy izahay, ary tsy namela heloka Ianao. 43 Nandrakotra ny tenanao tamin'ny hatezerana Ianao ary nanenjika anay, namono Ianao ary tsy namindra fo. 44 Nandrakotra ny tenanao tamin'ny rahona Ianao mba tsy hisy vavaka afaka ho tafiditra. 45 Nataonao toy ny lo maloto sy nolavina teo amin'ireo firenena izahay. 46 Manozona anay ireo fahavalonay rehetra, 47 tonga taminay ny tahotra sy ny fandrika, ny faharavana sy fahapotehana. 48 Mikoriana rian-dranomaso ireo masoko satria rava ny oloko. 49 Handrotsa-dranomaso tsy misy fitsaharana, tsy misy fihatoana ireo masoko, 50 mandra-pijeriny ambany ka hahita avy eny an-danitra Yaveh. 51 Miteraka alahelo ho ahy ny masoko noho ireo zanakavavin'ny tanànako rehetra. 52 Nohazain'ireo fahavaloko toy ny vorona aho; nohazain'izy ireo tamin'ny tsy misy antony aho. 53 Natsipin'izy ireo tao anaty lavaka aho ary notorahan'izy ireo vato, 54 ary norarahana rano ny lohako. Hoy aho hoe: "ho faty aho!" 55 Niantso ny anaranao, avy ao amin'ny halalin'ny lavaka aho, ry Yaveh. 56 Renao ny feoko rehefa niteny aho hoe: "Aza manampina ny sofinao amin'ny antso vonjiko." 57 Nanakaiky Ianao tamin'ny andro niantsoko Anao; hoy Ianao hoe: "Aza matahotra." 58 Tompo o, niaro ny adiko Ianao, nanavotra ny aiko Ianao! 59 Ry Yaveh, hitanao ny ratsy nataon'izy ireo tamiko; tsarao ny adiko. 60 Hitanao ny faniratsiran'izy ireo, ny teti-dratsy rehetra nataon'izy ireo tamiko— 61 renao ny latsan'izy ireo, ry Yaveh, sy ny tetik'izy ireo rehetra tamiko. 62 Ny molotr'ireo izay mitsangana manohitra ahy, sy ny fiampangan'izy ireo, dia tonga mandritry ny tontolo andro. 63 Jereo ny fomba fipetrak'izy ireo sy fitsanganany avy eo; maneso ahy amin'ny hirany izy ireo. 64 Valio arak'izay nataony izy ireo, ry Yaveh. 65 Ho ataonao tsy menatra ny fon'izy ireo! Ho eo amin'izy ireo anie ny fanamelohanao! 66 Manenjika azy ireo amin-katezerana Ianao ary mamotika azy ireo avy ao ambanin'ny lanitra, ry Yaveh!