¹ Ry rahalahiko, aza mihazona ny finoana an'i Tompontsika Jesosy Kristy, Ilay Tompon'ny voninahitra, amin'ny fiagarana amin'ny olona sasany. ² Ataovy hoe misy olona miditra ao amin'ny fivorianareo manao peratra volamena sy akanjo tsara, ary misy lehilahy mahantra ihany koa miditra manao akanjo maloto. ³ Raha mijery ilay olona miakanjo tsara ianao ary miteny hoe: ''Azafady mitoera eto amin'ny toerana tsara," fa hiteny amin'ilay lehilahy mahantra kosa hoe: ''Mitsangàna ianao ery,'' na hoe: ''Mipetraha eto an-tongotro,'' ⁴ moa tsy mifampitsara aminareo ianareo? Moa tsy lasa mpitsara amin'ny eritreri-dratsy ianareo? ⁵ Mihainoa, ry rahalahy malalako, tsy efa nofidian' Andriamanitra ve ny mahantran'izao tontolo izao mba hanankarena amin'ny finoana sy mba ho mpandova ny fanajakana izay nampanantenainy ireo izay tia Azy? ⁶ Fa ianareo dia nanala baraka ny mahantra! Moa tsy ny mpanan-karena ve no mampahory anareo? Moa tsy ireo va no mitarika anareo ho eo amin'ny fitsarana? ⁷ Moa tsy izy ireo va no nanaratsy ny anarana tsara izay anareo? ⁸ Na izany aza, raha manatanteraka ny lalàn'ny mpanjaka ianareo, araky ny Soratra Masina hoe: ''Tiava ny namanao tahaka ny tenanao,'' dia manao ny tsara ianareo. ⁹ Fa raha manome sitraka ny olona sasany kosa ianareo, dia manota, ka voaheloka toy ny mpandika lalàna. ¹⁰ Fa na iza na iza mankatoa ny lalàna rehetra, kanefa lavo amin'ny lalana iray monja, dia ho meloka amin'ny lalàna rehetra. ¹¹ Fa ilay niteny hoe: ''Aza mijangajanga,'' dia niteny ihany koa hoe: ''Aza mamono olona.'' Raha tsy mijangajanga ianareo, kanefa mamono olona, dia lasa mpandika lalàna. ¹² Noho izany mitenena sy manaova tahaka ireo izay ho tsaraina amin'ny lalàn'ny fahafahana. ¹³ Fa ny fitsarana dia tonga tsy misy famindram-po amin'ireo izay tsy naneho famindram-po. Ary ny famindram-po dia mandresy ny fitsarana. ¹⁴ Inona no soa, ry rahalahiko, raha milaza ny olona iray fa manam-pinoana izy, kanefa tsy misy asa? Afaka hamonjy azy ve izany finoana izany? ¹⁵ Ataovy hoe misy rahalahy na anabavy ratsy fitafy sy tsy ampy sakafo isan'andro. ¹⁶ Ataovy hoe misy iray aminareo miteny amin'izy ireo hoe: "Mandehana am-piadanana, manaova mafana ary mivokisa.'' Raha tsy manome azy ireo ny zavatra ilainy ho an'ny vatana ianareo, inona no mahatsara izany? ¹⁷ Dia toy izany koa ny finoana, raha tsy misy asa izany, dia maty. ¹⁸ Nefa mety misy olona miteny hoe: "Manam- pinoana ianao, ary izaho manan'asa.'' Asehoy ahy ny finoanao tsy misy asa, dia hasehoko anao koa ny finoako amin'ny alalan'ny asako. ¹⁹ Ianao dia mino fa iray ihany ny Andriamanitra; tsara izany ataonao izany. Fa na ireo demonia aza mino izany, ka dia mangovitra izy ireo. ²⁰ Tianareo ho fantatra ve, ry lehilahy adala, fa ny finonana tsy misy asa dia tsy misy ilaina azy? [Fanamarihana: Ny dikan-teny taloha sasany dia mamaky hoe: "Tianareo ho fantatra va, ry lehilahy adala, hoe nahoana ny finoana tsy misy asa no maty?''] ²¹ Tsy tamin'ny asa koa ve no nanamarinana an'i Abrahama raintsika rehefa nanolotra an'Isaka zanany lahy teo amin'ny alitara izy? ²² Hitanao fa ny finoana dia niasa niaraka tamin'ny asany, ary amin'ny asa dia nivoatra tanteraka ny finoany. ²³ Dia tanteraka ny Soratra Masina izay milaza hoe: "Abrahama nino an'Andriamanitra, ka nisaina taminy ho fahamarinana izany,'' ary izy nantsoina hoe sakaizan'Andriamanitra. ²⁴ Hitanareo izao fa amin'ny asa no hanamarinana ny olona, fa tsy amin'ny finoana ihany. ²⁵ Toy izany koa, Rahaba mpivaro-tena tsy nohamarinina tamin'ny asa koa ve izy, rehefa nandray ireo iraka sy nandefa azy ireo tamin'ny lalan-kafa? ²⁶ Fa maty ny tena raha misaraka amin'ny fanahy, dia toy izany ihany koa, ny finoana tsy misy asa dia maty.