¹ Noho izany aoka mba ho mpaka tahaka an' Andriamanitra, tahaka ny zanaka malala. ² Ary mandehana amin'ny fitiavana, araka ny nitiavan'i Kristy antsika ihany koa sy nanomezany ny tenany ho antsika, fanatitra manim-pofona sy sorona ho an'Andriamanitra. ³ Fa tsy tokony hisy na dia resaka fijangajangana na karazana fahalotoana na tsy fahononan-tena aza eo aminareo, fa tsy mendrika ny olo-masin'Andriamanitra ireo. ⁴ Aoka tsy hisy mamoafady, resaka adaladala, ary hanihany tafahoatra _ fa tsy mendrika ny rehetra amin'ireo. Fa kosa tokony hisy fankasitrahana. ⁵ Fa afaka mahazo antoka ny amin'izao ianareo, fa tsy hisy mpijangajanga, maloto, na ny mpierina _ izany hoe, mpanompo sampy _ manana lova ao amin'ny fanjakan'i Kristy sy Andriamanitra. ⁶ Aoka tsy hisy hamitaka anareo amin'ny teny foana, satria noho ireo zavatra ireo dia tonga amin'ny zanaky ny tsy fankatoavana ny hatezeran'Andriamanitra. ⁷ Noho izany, aza mikambana amin'izy ireo. ⁸ Fa maizina ianareo fahiny, fa izao ianareo dia fahazavana ao amin'ny Tompo. Mandehana tahaka ny zanaky ny mazava, ⁹ (fa ny vokatry ny fahazavana dia ao amin'ny fahatsarana rehetra, fahitsiana, sy fahamarinana). ¹⁰ ary tadiavo izay mahafinaritra ny Tompo. ¹¹ Aza mikambana amin'ireo asa tsy mamokatry ny haizina, fa ampiharihario kosa ireo. ¹² Fa mahamenatra na dia ny manonona ireo zavatra ataon'izy ireo any amin'ny miafina aza. ¹³ Fa rehefa hazavain'ny fahazavana ny zavatra iray, dia lasa miharihary. ¹⁴ Fa ny zavatra rehetra izay miharihary dia fahazavana. Noho izany dia voalaza hoe: ''Mifohaza, ianao matory, ary mitsangàna amin'ny toeran'ny maty, dia hamiratra aminao Kristy.'' ¹⁵ Mitandrema amin'ny fomba fiainanao _ tsy tahaka ny tsy hendry fa tahaka ny hendry. ¹⁶ Araraoty ny fotoana satria izao andro izao dia ratsy. ¹⁷ Noho izany, aza miadaladala, fa takaro hoe inona no sitrapon'ny Tompo. ¹⁸ Ary aza manao mamon'ny divay, fa mitondra any amin'ny fahasimban-toetra izany. Fa kosa, aoka ho fenon'ny Fanahy Masina, ¹⁹ mifampiresaha aminareo samy ianareo amin'ny salamo sy fihirana ary hiram-panahy, mihirà ary mikaloa amin'ny Tompo amin'ny fonareo rehetra . ²⁰ Misaora mandrakariva amin'ny zavatra rehetra, amin'ny anaran'i Jesosy Kristy Tompontsika ho an' Andriamanitra ilay Ray, ²¹ mifanolora tena amim-panajana ho an'i Kristy. ²² Ry vehivavy, maneke ny vadinareo, tahaka ny amin'ny Tompo. ²³ Fa ny lehilahy no lohan'ny vavy tahaka an'i Kristy koa lohan'ny fiangonana, ary Kristy tenany no mpamonjy. ²⁴ Fa tahaka ny haneken'ny fiangonana an'i Kristy, dia toy izany koa no tokony haneken'ny vehivavy ny vadiny amin'ny zavatra rehetra. ²⁵ Ry lehilahy, tiavo ny vadinareo, tahaka ny nitiavan'i Kristy ny fiangonana sy nanomezany azy ny ainy. ²⁶ Nanolotra ny tenany ho an'ny fiangonana Kristy mba afahany manamasina azy, tamin'ny fanadiovana azy tamin'ny rano fanasana amin'ny teny, ²⁷ mba afahany mampiseho azy ho be voninahitra eo aminy, tsy misy pentina na kentrona na zavatra toy izany, fa masina sady tsy misy diso. ²⁸ Tahaka izany ihany koa ny lehilahy dia tokony ho tia ny vadin'izy ireo avy tahaka ny tenan'izy ireo. Izy izay tia ny vadiny dia tia ny tenany ihany koa. ²⁹ Tsy mbola nisy nankahala ny tenany, fa mamahana sy mikarakara izany tsara, tahaka an'i Kristy mamahana ny fiangonana sy mikarakara azy ihany koa, ³⁰ satria isika dia ratsam- batany. ³¹ Noho izany antony izany ny lehilahy dia handao ny ray sy ny reniny ka hikambana amin'ny vadiny, ary izy roa dia ho tonga nofo iray ihany.'' ³² Lehibe izany fahamarinana miafina izany _ fa Izaho dia miresaka momban'i Kristy sy ny fiangonana. ³³ Kanefa, ny tsirairay aminareo ihany koa dia tokony ho tia ny vadiny avy tahaka ny tenany, ary ny vehivavy dia tokony hanaja ny vadiny.