¹ Miara-miasa aminy, izahay ihany koa dia mampirisika anareo tsy handray ny fahasoavan'Andriamanitra fahatany. ² Fa niteny izy hoe: "Tamin'ny fotoana mety dia nihaino anareo Aho, ary tamin'ny andron'ny famonjena dia nanampy anareo Aho. Jereo, ankehitriny no fotoana mety. Jereo, ankehitriny no andron'ny famonjena. ³ Tsy mametraka vato fanafintohinana eo anoloan'iza na iza izahay, fa izahay tsy maniry ny haharatsy laza ny asa fanompoanay. ⁴ Fa kosa, izahay dia manaporofo ny tenanay amin'ny asanay rehetra, fa mpanompon'Andriamanitra izahay. Izahay no mpanompony amin'ny fiaretana be, fahoriana, fahaterena, fahasarotana, ⁵ ireo kapoka, fanagadrana, fikomiana, amin'ny asa mafy, amin'ireo alina tsy misy torimaso, amin'ny hanoanana, ⁶ amin'ny fahadiovana, fahalalana, faharetana, fahatsoram-po, amin'ny Fanahy Masina, amin'ny tena fitiavana. ⁷ Izahay no mpanompony ao amin'ny tenin'ny fahamarinana, ao amin'ny herin'Andriamanitra. Izahay dia manana ny fiarovan'ny fahamarinana ho an'ny tanana havanana sy ny havia. ⁸ Izahay dia miasa amin'ny voninahitra sy amin'ny fahafam-baraka, amin'ny fanaratsiana sy ny fiderana. Izahay dia voampanga ho mpamitaka kanefa izahay dia marina. ⁹ Izahay dia miasa toy ireny tsy misy mahafatantra ireny kanefa izahay dia mbola fanta-daza. Miasa toy ny ho faty izahay-jereo-mbola miaina izahay. Miasa izahay toy ny saziana nohon'ny asanay nefa tsy toy ny voaheloka ho faty. ¹⁰ Izahay dia miasa toy ny malahelo, kanefa dia mifaly lalandava. Izahay dia miasa toy ny mahantra, kanefa dia mampanan-karena olona maro izahay. Miasa toy ny tsy manana na inona na inona izahay kanefa toy ny manana ny zavatra rehetra. ¹¹ Izahay dia niteny ny marina rehetra taminareo, ry Korintiana, ary ny fonay dia mivoha midanadana. ¹² Ny fonareo dia tsy nofehezinay, fa ianareo no namehy ireo fihetseham-ponareo manokana. ¹³ Ary ho valiny ara-drariny-miresaka aminareo toy ny amin'ny zaza aho-voay hidanadana ny fonareo. ¹⁴ Aza mifamatotra amin'ireo tsy mpino. Fa inona no iraisan'ny fahamarinana sy ny fandikan-dalàna? Fa inona no iarahan'ny mazava amin'ny maizina? ¹⁵ Inona no mety ho fifanarahana eo amin'i Kristy sy Beliala? Na inona no tokony anjara ananan'ny mpino iray sy amin'ny tsy mpino iray? ¹⁶ Ary inona no fifanarahana misy eo amin'ny tempolin'Andriamanitra sy ny sampy? Fa isika dia tempolin'Andriamanitra velona, araka ny efa nolazain'Andriamanitra hoe: "Hitoetra eo amin'izy ireo Aho ary handeha eo amin'izy ireo. Izaho dia ho Andriamanitr'izy ireo ary Izy ireo dia ho oloko." ¹⁷ Noho izany, " Mivoaha iala eo amin'izy ireo, ary mitokana," hoy ny Tompo. "Aza mikasika zavatra maloto, ary Izaho handray anareo. ¹⁸ Izaho dia ho Ray ho anareo, ary ianareo ho zanako lahy sy ho zanako vavy", hoy ny Tompo Tsitoha.